«Яңадан туу» кешенең Аллаһы белән яңа мөнәсәбәтләрен аңлата (Яхъя 3:3, 7). Аллаһы яңадан туган кешеләрне үз балалары итеп кабул итә (Римлыларга 8:15, 16; Гәләтиялеләргә 4:5; 1 Яхъя 3:1). Уллыкка алынган баланың статусы үзгәргән кебек, яңадан туган кешенең дә статусы үзгәрә — ул Аллаһы гаиләсенең әгъзасы булып китә (2 Көринтлеләргә 6:18).

Кеше нәрсә өчен яңадан туа?

 Гайсә болай дигән: «Беркем дә, яңадан тумаса, Аллаһы Патшалыгын күрә алмас» (Яхъя 3:3). Яңадан туу кешене Мәсих белән бергә Аллаһының Патшалыгында идарә итүгә әзерли. Бу Патшалык күктән идарә итә, менә ни өчен Изге Язмаларда, яңадан туу «күкләрдә саклана», дип әйтелә (1 Петер 1:3, 4). Яңадан туган кешеләр Гайсә Мәсих белән бергә патшалык итәрләр дип ышана (2 Тимутигә 2:12; 2 Көринтлеләргә 1:21, 22).

Кеше ничек итеп яңадан туа?

 Гайсә, яңадан туган кеше «судан һәм рухтан» туа, дигән (Яхъя 3:5). Димәк, андый кеше суга чумдырыла һәм соңрак «изге рухка чумдырыла» (Рәсүлләр 1:5; 2:1—4).

 Гайсә яңадан туган кешеләрнең беренчесе булган. Ул Үрдүн елгасында суга чумдырылган, аннары Аллаһы аны изге рух белән майлаган (ягъни изге рухка чумдырган). Шулай итеп, Гайсә изге рух ярдәмендә Аллаһының Улы булып яңадан туган һәм аның кире күккә күтәрелергә өмете булган (Марк 1:9—11). Аллаһы, Гайсә пәйгамбәрне рухи зат буларак терелтеп, аның өметен чынга ашырган (Рәсүлләр 13:33).

 Яңадан туган башка кешеләр дә башта суга чумдырыла, ә аннары изге рух ала a (Рәсүлләр 2:38, 41). Аларның күктә яшәргә өметләре бар; Аллаһы, аларны терелтеп, аларның шул өметләрен тормышка ашырачак (1 Көринтлеләргә 15:42—49).

Яңадан туу турында ялгыш карашлар

 Ялгыш караш. Кеше яңадан туаргамы, юкмы икәнен үзе сайлый.

 Факт. Бар кеше дә Аллаһы белән мөнәсәбәтләрен үстерә ала һәм коткарыла ала (1 Тимутигә 2:3, 4; Ягъкуб 4:8). Әмма кем яңадан туачак икәнен, ягъни кемне изге рух белән майларга икәнен, Аллаһы үзе сайлый. Изге Язмалар буенча, яңадан туу «берәр кемнең теләгенә яки тырышлыгына түгел, ә шәфкатьле Аллаһыга бәйле» (Римлыларга 9:16). «Яңадан туарга» дигән сүзтезмә «югарыдан» туарга дип тә тәрҗемә ителергә мөмкин (Яхъя 3:3, искәрмә). Бу шуны дәлилли: яңадан туачак кешеләрне Аллаһы сайлый, бу карар «югарыда» кабул ителә.