Йәһвә безгә «тугрылыкны кадерләргә» куша (Михей 6:8). Бу аеруча никахта мөһим, чөнки тугры булмаган кешегә ышаныч юк. Ә ышаныч мәхәббәт гөрләп чәчәк атып тору өчен мөһим.

Бүген никахтагы тугрылыкка куркыныч янап тора. Никахыңны яклар өчен сиңа ике киңәшне тотарга кирәк.

ИЗГЕ ЯЗМАЛАРНЫҢ КАРАШЫ. «Нәрсә мөһимрәк, шуны аера белегез» (Филипиялеләргә 1:10). Никахың — тормышыңдагы иң мөһим нәрсәләрнең берсе. Ул җитди караш таләп итә.

Йәһвә тормыш иптәшең турында уйлап һәм аның белән бергә «шатланып яшәвеңне» тели (Вәгазьче 9:9). Тормыш иптәшеңә һәрвакыт игътибарлы бул, аны бәхетле итәр өчен юллар эзлә. Бу — Йәһвә теләге (1 Көринтлеләргә 10:24). Тормыш иптәшең үзенең кирәк булуын һәм үзен кадерләгәннәрен сизеп торсын.

КИҢӘШЛӘР

• Бергә регуляр рәвештә вакыт үткәрегез. Игътибар үзәгендә тормыш иптәшең булсын

• «Мин» дип түгел, ә «без» дип уйларга өйрән

ИЗГЕ ЯЗМАЛАРНЫҢ КАРАШЫ. «Хатын-кызга җенси теләк белән карап торучы һәркем күңеленнән аның белән инде зина кылган була» (Маттай 5:28). Әгәр берәрсе әхлаксыз уйларга чумып йөрсә, ул үз тормыш иптәшенә тугры түгел дип әйтеп була.

Йәһвә сиңа үз «йөрәгеңне сакларга» куша (Гыйбрәтле сүзләр 4:23; Иремия 17:9). Моның өчен сиңа үз күзләреңә хуҗа булырга кирәк (Маттай 5:29, 30). Ыруг башлыгы Әюбтән үрнәк ал. Ул хатын-кызларга җенси теләк белән карамас өчен үз күзләре белән килешү төзегән (Әюб 31:1). Порнография карамаска тәвәккәл бул. Романтик хисләр тормыш иптәшеңә карата гына булсын

КИҢӘШЛӘР

• Тормыш иптәшеңә тугры булуың һәркемгә ачык күренеп торсын

• Тормыш иптәшеңнең хисләрен исәпкә ал һәм аны уңайсыз хәлдә калдыра алган һәркайсы мөнәсәбәтләрне шунда ук өз