Nangwa. Kulengesaniza ebyahandiikirwe ebiroho hati, hamu n’ebya kara nikyoleka ngu Baibuli tekahindukaga n’obukiraaba ngu kumara emyaka nyingi baikaire nibagikoporra kandi nibagihandiika ha bintu ebihyaka kandi ebirukusiisikara bwangu.

 Enkumi n’enkumi ez’ebihandiiko bya Baibuli bizoirwe. Bimu halibyo nibyahukana, ekirukwoleka ngu ensobi zikakorwa omu kugikoporra. Enyahukana eyerukukira obwingi teri y’amaani kandi tehindura amakuru g’ebigambo. Baitu haroho embaganiza nke ezizoirwe, kandi nikizooka ngu ezimu zikakorwa kara muno n’ekigendererwa ky’okuhindura amakuru g’obutumwa bwa Baibuli. Tekerezaaho ebyokurorraho binu bibiri:

1.   Omu 1 Yohana 5:7, omu mpindura za Baibuli ezimu eza kara harumu ebigambo binu: “omu iguru, Isiitwe, Kigambo, na Mwoyo Arukwera: kandi banu basatu bali omu.” Baitu, ebihandiiko ebya kara ebirukwesigwa nibikigumya ngu ebigambo binu tibiri omu bihandiiko ebyabandize. Ebigambo binu bikongerwamu hanyuma. a Enu niyo ensonga habwaki, empindura za Baibuli ez’omu kasumi kanu zibiihamu.

2.   Ibara lya Ruhanga nirisangwa omu bihandiiko bya Baibuli ebya kara emirundi nyingi muno. Baitu empindura za Baibuli nyingi, omu kiikaro kyalyo zitairemu ebitiinisa nka “Mukama” rundi “Ruhanga.”

 Kasumi kanu, ebihandiiko bingi ebya kara ebirukukwata ha Baibuli bizoirwe, kandi nikisobora kwanguha kurora ensobi. b Kulengesaniza Baibuli enyakuroho kasumi kanu n’ebihandiiko ebi, kyolekere kita ngu ehikire?

•   Omukugu arukwetwa William H. Green obw’akaba n’abazaaho ebihandiiko eby’Ebyahandiikirwe by’Oruheburaniya (ebikira kwetwa “Endagaano Enkuru”) akagamba ati: “Ninsobora kugamba ntarukutiina ngu busaho ebihandiiko ebindi ebya kara muno ebyakoporoirwe kurungi nka binu.”

•   Obukuruhika ha Byahandiikirwe by’Oruyonaani, rundi “Endagaano Empyaka,” omukugu ha bya Baibuli arukwetwa F. F. Bruce akahandiika ati: “Obwakaiso oburukwoleka ngu ebihandiiko by’Endagaano Empyaka bihikire bweyongiire kukanya kukira obwakaiso obw’ebihandiiko eby’abahandiiki abandi, kandi busaho n’omu asobora kuteekereza ngu tibihikire.”

•   Sir Frederic Kenyon, arukumanywa omu kuseruliirizaaho ebihandiiko bya Baibuli ebya kara, akagamba ati: “omuntu n’asobora kukwata Baibuli mu ngaro ze atarukutiina kandi atarukugurukyagurukya ngu akwasire Ekigambo kya Ruhanga, ekimazire emyaka nyingi muno kandi ngu byona ebirumu bihikiire kimu.”

•   Abayudaaya hamu n’Abakristaayo abaakozere omulimo gw’okukoporra bakalekamu ensobi ez’amaani ezakozerwe abantu ba Ruhanga. c (Okubara 20:12; 2 Samuiri 11:​2-4; Abagaratiya 2:​11-​14) Ekindi, bakalekamu enkarra ezirukujumirra obujeemu bw’Abayudaaya kandi ezirukwoleka emigenzo eyatairweho abantu. (Hoseya 4:2; Maraki 2:​8, 9; Matayo 23:​8, 9; 1 Yohana 5:​21) Habwokuba bakakoporra kurungi ebyahandiikirwe binu, bakooleka ngu besigwa kandi nibatamu ekitiinisa Ekigambo kya Ruhanga ekirukwera.

•   Ruhanga ayahandikisize Baibuli, akaba n’asobora kugirinda nukwo etafurungurwa? d (Isaya 40:8; 1 Petero 1:24, 25) Akaba n’agonza egasire abantu boona, hatali aba akara bonka baitu n’aba kasumi kanu. (1 Abakolinso 10:11) Amananu gali ngu, “byona ebyahandikirwe ira, bikahandikwa obwokwegesa itwe, nukwo tube nokunihira obwokugumisiriza nobwokuhumura okwomu byahandikirwe.”​—Abarumi 15:4.

•   Yesu n’abahondezi be bakajuliza kuruga omu Byahandiikirwe by’Oruheburaniya kandi batooleke ngu nibagurukyagurukya ebihandiiko binu ebya kara.​—Luka 4:16-21; Engeso Ezabakwenda 17:1-3.