Nangwa, teyegesa ngu ‘omuntu obw’ajunwa aba ajunirwe ebiro n’ebiro.’ Omuntu ow’atungire okujunwa kuraba omu kwikiririza omuli Yesu Kristo, okwikiriza kwe nikusobora kumuhwaho otwaliiremu n’okujunwa okurukuleetwa okwikiriza oku. Baibuli egamba ngu nikyetaagisa kutamu amaani rundi “okurwana muno” kusobora kwikara oine okwikiriza. (Yuda 3, 5) Abakristaayo aba kara abaali bamazire kwikiriza Kristo bakagambirwa bati: “Muhikirizege okujunwa kwanyu inywenka omu kutina nokutukumira.”—Abafiripi 2:12.

Enkarra za Baibuli ezitarukwikiranganiza n’enyegesa ey’erukugamba ngu ‘omuntu obw’ajunwa aba ajunirwe ebiro n’ebiro’

•   Baibuli etuteererra kwetantara ebibi eby’amaani ebisobora kutulemesa kutaaha omu Bukama bwa Ruhanga. (1 Abakolinso 6:9-11; Abagaratiya 5:19-21) Kakuba twali tutasobora kufeerwa okujunwa, okutererra oku kwakubaire kutarukukora makuru. Oihireho, Baibuli eyoleka ngu omuntu ow’ajunirwe n’asobora kugwa kuraba omu kwongera akakora ekibi eky’amaani. Ekyokurorraho, omu Abahebraniya 10:26 nihagamba: “Obutugenderra okusiisa, tumazire okuhabwa okumanyira kimu amazima, tihakyasigaireho ekyonzira obwebibi.”—Abaheburaniya 6:4-6; 2 Petero 2:20-22.

•   Yesu akabazaaho obukuru obw’okwikara tulinzire okwikiriza kuraba omu kuha ekyokurorraho nambere yayerengesaniize n’omuzabibu kandi abahondezi be yabalengesaniza n’amataagi gagwo. Abamu hali bo baakuhikire booleka ngu nibamwikiririzaamu kuraba omu byana byabo rundi ebikorwa, baitu baakuhikire balemwa kubyoleka kandi ‘banagwa aheru nk’itaagi eritakwana ebyana,’ kandi bafeerwa okujunwa kwabo. (Yohana 15:1-6) Omukwenda Paulo akakozesa ekyokurorraho nikyo kimu obuyagambire ngu Abakristaayo abatalinda okwikiriza kwabo ‘balitemwaho.’—Abarumi 11:17-22.

•   Abakristaayo nibaragirwa kwikara bali bulindaara. (Matayo 24:42; 25:13) Abo abagwijagira omu by’omwoyo kababe nibakikora kuraba omu kukora “engeso ezomuirima” rundi kutejumbira muno omu mirimo Yesu yaragiire, bafeerwa okujunwa kwabo.—Abarumi 13:11-13; Okusuku’rwa 3:1-3.

•   Ebyahandiikirwe bingi byoleka ngu naabo abajunirwe basemeriire kugumiisiriza n’obw’esigwa, kuhikira kimu ha mpero. (Matayo 24:13; Abaheburaniya 10:36; 12:2, 3; Okusuku’rwa 2:10) Abakristaayo ab’omu kyasa eky’okubanza bakasemererwa obubaakimanyire ngu Abakristaayo bagenzi baabo baali nibagumiisiriza omu kwikiriza kwabo. (1 Abasesalonika 1:2, 3; 3 Yohana 3, 4) Kyakubaire ky’amagezi Baibuli kutwekambisa kugumiisiriza tuli besigwa kakuba abo abatarukugumiisiriza baakubaire nibaija kujunwa?

•   Paulo obuyarozere ngu ali haihi kufa nubwo yayehuliire ngu okujunwa kwe kugumiibwe. (2 Timoseo 4:6-8) Obw’akaba atakafiire, akakyetegereza ngu akaba n’asobora kufeerwa okujunwa kwe obuyakuhondiire okwegomba kw’omubiri. Akahandiika ati: “Nyesaliza nyenka omubiri gwange, ningulema, rundi obundikamara okutebeza abandi, nyowe nyenka ntaba atarukusimwa.”—1 Abakolinso 9:27; Abafiripi 3:12-14.