N’osobora Ota Kwomeera Ebiro Byona?
N’osobora Ota Kwomeera Ebiro n’Ebiro?
Eky’okugarukamu kuruga omu Baibuli
Baibuli neraganiza eti: “Anyakukora Ruhanga ebyagonza aikaraho ebiro nebiro.” (1 Yohana 2:17) Bintu ki Ruhanga ebyarukugonza okole?
● Yega hali Ruhanga n’Omwana we Yesu. Yesu obwakaba nasaba akagambira Ruhanga ati: “Bunu nubwo obwomeezi obutahwaho, okumanya iwe Ruhanga omu owamananu, nogu ouwatumire, Yesu Kristo.” (Yohana 17:3) Nikitwarramu ki ‘kumanya’ Ruhanga na Yesu Kristo? Tubamanya obutwega Baibuli kandi tukateeka omu nkora ebitwegere. a Baibuli etwoleka entekereza y’Omuhangi waitu Yahwe Ruhanga, ow’atuha obwomeezi. (Engeso Ezabakwenda 17:24, 25) Ekindi, Baibuli etugambira ha Mwana we, Yesu ayayegeseze “ebigambo ebyobwomeezi obutahwaho.”—Yohana 6:67-69.
● Ikiririza omu kicunguro kya Yesu. Yesu akaija omu nsi “okuhereza, nokuhayo obwomezibwe okucungura baingi.” (Matayo 20:28) Ekicunguro kya Yesu kikaha abantu omugisa ogw’okwomeera omu nsi omu rugonjo orurungi. b (Zabuli 37:29) Yesu akagamba ati: “Ruhanga nukwo yagondeze ati ensi, nahayo Omwana we ayazairwe omu wenka, omuntu wena anyakumuikiriza aleke okubura, baitu atunge obwomeezi obutahwaho.” (Yohana 3:16) Okyetegeriize ngu tikirukumara kwikiririza omuli Yesu kyonka? Tusemeriire kuteeka omu nkora ebiyayegeseze n’okukora Ise ebyagonza.—Matayo 7:21; Yakobo 2:17.
● Gumya enkoragana yaawe na Ruhanga. Ruhanga nagonza tumwirre haihi kandi tufooke banywani be. (Yakobo 2:23; 4:8) Ruhanga aikaraho ebiro n’ebiro kandi nagonza naitwe twomeere ebiro byona. Kuraba omu Kigambo kye, atugambira ekyarukugondeza abo boona abamuserra. N’agamba ati: “Omutima gwanyu gwomeerege ebiro byona.”—Zabuli 22:26.
Ebintu Ebitahikire ha Kwomeera Ebiro n’Ebiro
Ekitahikire: Abantu nibasobora kuleetaho obwomeezi obutahwaho.
Ekihikire: N’obukiraaba ngu habaireho enkurakurana omu by’obujanjabi eziretiire abantu kweyongera kuhangaara, abantu tibalisobora kuleetaho obwomeezi obutahwaho. Ruhanga nuwe wenka asobora kutuha obwomeezi obutahwaho habwokuba nuwe “ensoro eyobwomezi.” (Zabuli 36:9) Naraganiza ‘kumirra kimu okufa ebiro byona’ kandi ahe abantu be abesigwa obwomeezi obutahwaho.—Isaya 25:8; 1 Yohana 2:25.
Ekitahikire: Abantu ab’enganda ezimu nubo balyomeera ebiro byona.
Ekihikire: Yahwe tasoroora omu bantu. Oihireho, “omu ihanga lyona lyona, anyakumutina nakora okuhikirra nuwe asiimwa.” (Engeso Ezabakwenda 10:34, 35) Abantu ab’enganda zoona kandi abarukuruga omu biikaro ebirukwahukana abamworobera, nibasobora kwomeera ebiro n’ebiro.
Ekitahikire: Obwomeezi obutahwaho nibwija kututama.
Ekihikire: Obwomeezi obutahwaho kisembo kuruga hali Ruhanga, ow’arukutugonza kandi nagonza tube n’okusemererwa. (Yakobo 1:17; 1 Yohana 4:8) Akimanyire ngu kuba n’eby’okukora eby’omugaso kireta okusemererwa. (Omugambizi 3:12) Abarayomeera omu nsi ebiro n’ebiro n’abaraganiza ngu nibaija kukora emirimo eibarukwegondezaamu kandi ey’erabagasira.—Isaya 65:22, 23.
Ekindi, nibaija kugumizaamu kwega ebintu ebihyaka ebirukukwata ha Muhangi wabo, n’emirimo ye erukuhuniiriza. Akahanga omuntu, yamuha eky’etaago eky’okwomeera ebiro n’ebiro n’okumwegaho n’obukiraaba ngu “tarukusobora okuzora omulimo Ruhanga oguyakozire okuruga ha kubanza nokuhikya ha mpero.” (Omugambizi 3:10, 11) Nahabweki, abarukwija kwomeera ebiro n’ebiro nibaija kuba baine ebintu bingi eby’okwega n’okukora.
[OBUGAMBO OBULI HANSI]
a Abakaiso ba Yahwe bagira entekaniza ey’okwegesa abantu Baibuli hataroho kusasura sente. Kumanya ebirukukiraho, rora vidiyo Omulingo Twegesa Abantu Baibuli.
b Rora ekicweka “Yesu Ajuna—Omu Mulingo Ki?”
Nosobora Kugonza na Binu;
EBY’OKUGARUKAMU EBY’EBIKAGUZO EBIRUKUKWATA HA BAIBULI
Yesu Ajuna—Omu Mulingo Ki?
Habwaki nitwetaaga Yesu kututonganirra? Kwikiririza omu Yesu nikyo kyonka ekirukwetaagisa kusobora kujunwa?
OMUNAARA GW'OMULINZI
N’osobora Kwomeera Ebiro n’Ebiro omu Nsi
Baibuli n’ebazaaho ekigendererwa kya Ruhanga hali abantu.
EBIRUKUTUKWATAHO
Saba Kubungirwa
Tunga eky’okugarukamu ky’ekikaguzo kyawe, rundi omanye ebirukukiraho ebirukukwata h’Abakaiso ba Yahwe.