Ekigambo ky’Oruheburaniya ruʹach hamu n’ekigambo ky’Oruyonaani pneuʹma, ebikira kuhindurwa nka “omwoyo,” biine amakuru gatali gamu. Baitu hoona nambere kikozesebwa kiba nikimanyisa eki omuntu ekyatasobora kurora kandi amaani gakyo geyolekera omu kukora. Ebigambo eby’Oruheburaniya n’Oruyonaani bikozesebwa kumanyisa (1) omuyaga, (2) amaani g’obwomeezi agali omu bihangirwe omu nsi, (3) enyehurra enyakuli omu mutima gw’omuntu ogw’akokurorraho kandi eyemuleetera kugira omulingo yabazaamu rundi yakoramu ebintu, (4) Ebigambo ebiterekereziibwe amaani agatarukurorwa, (5) ebihangirwe eby’omwoyo, hamu (6) n’amaani ga Ruhanga, rundi omwoyo ogurukwera.—Okuruga 35:21; Zabuli 104:29; Matayo 12:43; Luka 11:13.

 Yahwe Ruhanga obuyahangire omuntu ow’okubanza, Adamu, Baibuli n’egamba ngu “yamuhuha omu nyindo orwoya rwobwomeezi; omuntu yafoka obwomezi obwomiire.” (Okubanza 2:7) Nk’oku turukurora omu rukarra runu, Ruhanga akahuuha omu muntu orwoya rundi amaani agasobozesa omuntu kuba mwomeezi.

Mali Omuntu Aine Omwoyo Ogutafa?

 Abahandiiki ba Baibuli bakakozesa ekigambo ky’Oruheburaniya ru’ach rundi eky’Oruyonani pneu’ma obubakaba nibahandiika ha “mwoyo.” Ebyahandiikirwe byonyini byoleka amakuru g’ebigambo ebyo. Nk’eky’okurorraho Zabuli 104:29 rugamba “Obiihamu orwoya rwabyo, bifa, bigaruka omu cucu yabyo.” Kandi Yakobo 2:26 rugamba ruti: “Baitu nkomubiri hataloho mwoyo [pneu’ma] okuguba gufire,” Omu nkarra zinu, “omwoyo” nikimanyisa ekyo ekihaisa omubiri obwomezi. Hataroho mwoyo, omubiri guba gufiire. Nahabweki, ekigambo ru’ach kihindurwa nka “omwoyo” rundi amaani agatungisa obwomezi. Nk’ekyokurorraho, ha bikwatiraine n’okusandaara kw’amaizi omu busumi bwa Nuha, Okubanza 6:17 nirugamba: “Ndireta okusandaara kw’amaizi ha nsi okuhwerekereza byona ebinyina omubiri ebirumu orwoya [ru’ach] rw’obwomezi, hansi yiguru.” (Okubanza 7:15, 22) Nahabweki, “omwoyo” kimanyisa amaani agatakurorwa agaikazaho ebyomezi byoona.

Ekyokurorraho

 Omubiri gwetaaga omwoyo nka rediyo okweyetaga amasanyarazi—kusobora kukora. Kwongera kukisoborra, tekereza ha rediyo. Obw’ogitamu amanda, amasanyarazi agayahwirwe omu manda gatungisa rediyo amaani kukora. Amanda gatarumu, rediyo egi, tesobora kukora. Omu mulingo nugwo gumu, omwoyo nugwo gutungisa omubiri gwaitu amaani agafoora omubiri gwaitu mwomezi. Kusisana n’amasanyarazi omwoyo tigwine nyehurra, kandi tigusobora kutekereza. Gali maani bwaani. Baitu tutaina mwoyo rundi rwoya rw’obwomezi, emibiri yaitu “efa, kandi agaruka kufooka itaka” nk’Omuhandiiki wa zabuli okuyahandiikire. Ekitabu kya Omugambizi 12:7 obukiba nikibaza ha kufa kw’omuntu, kigamba kiti: “Ecucu [y’omubiri gwe] obwegaruka ha itaka nkokwekaba eri, n’omwoyo obugugaruka hali Ruhanga ayaguhaire.” Omwoyo, rundi amaani g’obwomezi obu garuga omu mubiri, omubiri gufa nigugaruka nambere gwaihirwe—omu cucu. Nitusobora kugamba ngu amaani g’obwomezi gagaruka nambere gaarugire—owa Ruhanga. (Yobu 34:14, 15; Zabuli 36:9) Kinu tikimanyisa ngu amaani g’obwomezi garubata nigagenda owa Ruhanga. Baitu, kimanyisa ngu wena anyakufa, kugarukamu kutunga obwomezi obundi kiri omu busobozi bwa Yahwe Ruhanga wenka. Nukwo kugamba, obwomezi bwe buba buli omu mikono ya Ruhanga. Amaani ga Ruhanga gonka nigo gasobora kugarurra omuntu ogu omwoyo, rundi amaani g’obwomezi nubwo omuntu agaruke kuba mwomezi.

Enyegesa Erukugamba ngu Omwoyo Tigufa Ekaruga Nkaha?

 Enyikiriza erukugamba ngu haroho ekintu ekiruga omu muntu kikaikara kiri kyomeezi terukusangwa omu Baibuli, baitu n’esangwa omu nyegesa ezindi ez’ebisuba nk’ezo ezirukusangwa omu bufirosoofu by’Abayonaani abaakara. Ruhanga tagondeza kimu enyegesa ze kutaburwamu ez’abantu. Oihireho, Baibuli egamba ngu: “Mwerinde rundi hataba arukubanyaga omu bifirosofu nebyebisuba ebitarumu okukuratira ebirukwegesebwa abantu.”—Abakolosai 2:8.

Ruhanga obuyahangire omuntu, akamuha amaani g’obwomeezi​—“yafoka obwomezi obwomiire”