Ruhanga n’asobora kurora buli kimu kyona kandi n’okuhika buli hamu kakuba aba agondeze. (Enfumo 15:3; Abaheburaniya 4:13) Baitu Baibuli teyegesa ngu Ruhanga ali buli hamu hoona rundi omu bintu byona. Oihireho eyoleka ngu ali muntu kandi aine ekiikaro nambere aikara.

•   Ruhanga muntu wa mulingo ki: Ruhanga omwoyo kwonka. (Yohana 4:​24) Abantu tibasobora kumurora. (Yohana 1:​18) Omu kwolekwa okwahandiikirwe omu Baibuli, Ruhanga arorwa aine ekiikaro nambere ali. Takarorwaga ali buli hamu hoona.​—Isaya 6:1, 2; Okusuku’rwa 4:2, 3, 8.

•   Ekiikaro nambere Ruhanga aikara: Ruhanga aikara omu kiikaro eky’omwoyo ekitarukurorwa, ekirukwahukana ha bihangirwe ebirukurorwa n’amaiso. Omu kiikaro eki, nuho hali “iguru ekiikaro [kya Ruhanga] ekyokuikaramu.” (1 Ekyabakama 8:30) Baibuli ebazaaho akasumi bamalaika “obubaizire okukurata omu maiso ga [Yahwe],” a ekirukwoleka ngu Ruhanga aine ekiikaro kimu kyonka nambere aikara.​—Yobu 1:6.

Ruhanga obwaraaba atali buli hamu hoona, n’asobora kunfaaho nyowe nk’omuntu?

 Ego. Ruhanga afaaho abantu omu omu. N’obukiraaba ngu aikara omu kiikaro ky’omwoyo, Ruhanga arora abo boona abali mu nsi abarukugonza kumusemeza kandi abakonyera. (1 Ekyabakama 8:39; 2 Ekyebyomubusinge 16:9) Wetegereze omulingo Yahwe ayoleka ngu n’afaaho abo abamuheereza omu mananu:

•   Obwoba n’osaba: Yahwe n’asobora kuhurra esaara yaawe obwire bwona obw’orasaba.​—2 Ekyebyomubusinge 18:31.

•   Obworukuba oyetuntwire: “[Yahwe] aikara haihi nabo abomutima ogucwekere, abajuna abanyakuina omutima oguzizire.”​—Zabuli 34:18.

•   Obworukuba noyetaaga obuhabuzi: Yahwe ‘arakwegesaaga, kandi arakuragirraga’ kurabira omu Kigambo kye Baibuli.​—Zabuli 32:8.

Ebintu ebitahikire ebirukukwata hali Ruhanga kuba buli hamu hoona

 Ekitahikire: Ruhanga ali omu byahangirwe byona.

 Ekihikire: Ruhanga taikara omu nsi rundi omu byahangirwe ebindi ebirukurorwa. (1 Ekyabakama 8:​27) Ky’amananu ngu enyunyuzi hamu n’ebihangwa ebindi “bigamba ekitinisa kya Ruhanga.” (Zabuli 19:1) Baitu nk’oku omusiigi w’ebisisani atasobora kwikara omu kisisani eky’asiigire, na Ruhanga tasobora kwikara omu bintu ebiyahangire. Baitu nabwo nitusobora kwega bingi ebirukukwata ha musiigi kakuba turora ekisisani eky’asiigire. Omulingo nugwo gumu, ebyahangirwe ebiturora bitwegesa bingi ha miringo ya Ruhanga etarukurorwa. Ekyokurorraho amaani ge, amagezi n’okugonza.​—Abarumi 1:​20.

 Ekitahikire: Ruhanga aine kuba ali buli hamu hoona nukwo asobole kumanya ebintu byona n’okuba arukukirrayo kimu amaani.

 Ekihikire: Omwoyo gwa Ruhanga ogurukwera, nugwo maani ga Ruhanga. Kurabira omu mwoyo gwe ogurukwera, Ruhanga n’asobora kumanya kandi akakora buli kimu, buli hamu hoona, obwire bwona, atabandize kuruga nambere ali.​—Zabuli 139:7.

 Ekitahikire: Zabuli 139:8 niheegesa ngu Ruhanga ali buli hamu hoona habwokuba nihagamba ngu: “Obundatemba omu iguru, nuho oli: obundayara ekitabu kyange okuzimu, dora, nuho oli.”

 Ekihikire: Ekyahandiikirwe kinu tikirukubazaaho ekiikaro nambere Ruhanga aikara. Omu mulingo gw’akokurorraho nikitwegesa ngu busaho ekiikaro nambere Ruhanga asobora kulemwa kuhika nukwo atukonyere.