Nk’Oku Yahandiikirwe Luka 13:1-35
-
Mwegarukemu rundi muhwerekerezebwe (1-5)
-
Orufumo orurukukwata ha muti omutiini ogutarukwana (6-9)
-
Omukazi ow’azingamire akizibwa ha Sabbiti (10-17)
-
Orufumo orurukukwata h’akajuma aka karadaali hamu n’ekitumbisa (18-21)
-
Nikyetaagisa kwekamba muno kutaaha omu mulyango ogufunzire (22-30)
-
Herodi, “eboha egi” (31-33)
-
Yesu alirirra Yerusalemu (34, 35)
13 Omu bwire obu, bamu abaali baroho baagambira Yesu ebirukukwata hali Abagaliraaya Pirato abayaisire, esagama yabo yagitabura n’ebihongwa byabo.
2 Yesu yabagarukamu ati: “Nimuteekereza Abagaliraaya abaahikirweho ebintu binu bakaba bali basiisi muno kukira Abagaliraaya abandi boona?
3 Nangwa, nimbagambira nti, kakuba muteegarukamu na inywe nimwija kuhwerekerra.
4 Rundi nimuteekereza abo 18 abaagweriirwe omunaara omu Siroamu baafa—bakaba baine omusango ogw’amaani kukira abantu abandi boona abarukwikara omu Yerusalemu?
5 Nangwa, nimbagambira nti; baitu kakuba muteegarukamu, na inywe nimwija kuhwerekerra nk’oku baahwerekeriire.”
6 Hanyuma yabacwera orufumo runu: “Omusaija akaba abyaire omuti ogw’omutiini omu musiri gwe ogw’emizabbibbu, akaija naaguserraho ebijuma baitu atasangeho na kimu.
7 Hanyuma yagambira ow’akaba naarolerra omusiri gw’emizabbibbu ati: ‘Mmazire emyaka esatu ninyija ha muti gunu ogw’omutiini ninserraho ebijuma, baitu busaho kijuma kyona eki naakasangahoga. Guteme! Habwaki nigusiisira busa omwanya?’
8 Yamugarukamu ati: ‘Mukama wange guleke gwikaleho omwaka ogundi gumu, kuhikya obu ndagulimirra kandi nkaguteekaho orwezo.
9 Obu gurayana ebijuma omu kasumi ak’omumaiso, nikiija kuba kirungi; baitu kakuba gulema kwana, oguteme.’”
10 Yesu akaba naayegesa omu limu h’amasorrokaniro ha kiro kya Sabbiti.
11 Kandi dora! hakaba haliyo omukazi ow’akaba aine omwoyo omubi, ogukaba gumuletiire kurwara muno kumara emyaka 18; kandi akaba atarukusobora kwemerra aterekeriire.
12 Yesu obu yamurozere, yamugambira ati: “Mukazi iwe, okiziibwe oburwaire bwawe.”
13 Yamukwataho n’emikono ye, ahonaaho omukazi yayemerra aterekeriire, yatandika kukugiza Ruhanga.
14 Baitu omukuru w’isorrokaniro yabiihirwa muno habwokuba Yesu akirize omukazi ha kiro kya Sabbiti, kandi yagambira ekitebe ky’abantu ati: “Haroho ebiro mukaaga abantu ebi basemeriire kukorramu emirimo; nahabweki mwije mukizibwe omu biro ebi, hatali ha kiro kya Sabbiti.”
15 Baitu Mukama waitu yamugarukamu ati: “Bagobya inywe, ha kiro kya Sabbiti buli omu hali inywe, tasumurra enimi ye rundi endogoya kuruga omu isibiko lyayo kandi akagitwara kugyesera amaizi?
16 Tikihikire omukazi onu anyakuli muhara wa Iburahimu, kandi Sitaani ow’abohere kumara emyaka 18, kukizibwa ha kiro kya Sabbiti?”
17 Obu yabalize ebigambo ebi, abo boona abakaba nibamuhakaniza baatandika kuswara, baitu ekitebe ky’abantu boona baasemererwa habw’ebintu ebirukuhuniiriza ebi akaba akozere.
18 Hanyuma yagamba ati: “Obukama bwa Ruhanga nibusisana ki kandi ninsobora kubulengesaniza na ki?
19 Nibusisana n’akajuma aka karadaali, omuntu akayatwaire yabyara omu musiri gwe, kaakura kandi kaafooka omuti kandi ebinyonyi eby’omu mwanya byayombeka ebiju omu mataagi gaagwo.”
20 Ayongera agamba ati: “Obukama bwa Ruhanga ninsobora kubulengesaniza na ki?
21 Nibusisana ekitumbisa omukazi eki yatabwire omu bipimo bisatu eby’ensaano kuhikya yoona obu yatumbire.”
22 Yesu obu akaba naagenda Yerusalemu, yaraba omu mbuga zoona, n’omu byaro byona, naatebeza.
23 Nubwo omusaija yamukaguza ati: “Mukama wange, abo abarukujunwa, bake?” Yesu yabagambira ati:
24 “Mwekambe muno kuraba omu mulyago ogufunzire, habwokuba nimbagambira nti, baingi baligonza kutaahamu, baitu tibalisobora.
25 Mukama w’enju obu aliimuka akakinga orwigi, mulyemerra aheeru y’orwigi nimuteera kodi nimugamba muti: ‘Mukama waitu, tukingurreho.’ Baitu alibagarukamu ati: ‘Tindukumanya nambere murukuruga.’
26 Hanyuma mulitandika kugamba muti: ‘Tukalya kandi twanywa na iwe, kandi okeegeseza omu mihanda y’owaitu.’
27 Baitu alibagambira ati: ‘Timmanyire nambere murukuruga. Mundugeho inywe abarukukora ebikorwa ebitali by’okuhikirra!’
28 Oku nuho muliririrra kandi mukanena ensaya zanyu, obu mulirora Iburahimu, Isaka, Yakobo na banabbi boona omu Bukama bwa Ruhanga, baitu inywe munagirwe aheeru.
29 Ekindi, abantu baliruga bugwaizooba, burugaizooba, bukiizi bw’emoso, na bukiizi bw’obulyo kandi baliikarra ha meeza omu Bukama bwa Ruhanga.
30 Kandi dora! haroho ab’okumalirra abaliba b’okubanza, kandi haroho ab’okubanza abaliba b’okumalirra.”
31 Omu bwire obu, bamu h’Abafalisaayo bakaija baamugambira bati: “Turuka aheeru oruge hanu ogende habwokuba Herodi naagonza kukwita.”
32 Baitu yabagambira ati: “Mugende mugambire eboha egi muti: ‘Dora! Nimbinga daimooni kandi ninkiza abantu kiro kinu na nyenkya, kandi ha kiro ekya kasatu, ninyija kuba mmaliriize.’
33 N’obu haraabaho ki, nsemeriire kugumizaamu n’omulimo gwange kiro kinu, nyenkya, n’ekiro ekirukuhonderaho, habwokuba tikirukusoboka nabbi kwitirwa aheeru ya Yerusalemu.
34 Yerusalemu, Yerusalemu, omwisi wa banabbi kandi anyakuteera amabaale abo abatumirweyo. Emirundi nyingi nkagonza kusorooza hamu abaana baawe nk’oku enkonko esorooza obwana bwayo hansi y’amapapa gaayo! Baitu mutakigonze.
35 Dora! Enju yanyu ebalekiirwe nk’ekifurukwa, baitu nimbagambira nti, timulyongera kundora kuhikya obu muligamba muti: ‘Aine omugisa ogu ow’aizira omu ibara lya Yahwe!’”
