Nk’Oku Yahandiikirwe Yohana 5:1-47
5 Hanyuma y’ebi hakabayo obugenyi obw’Abayudaaya, kandi Yesu yagenda Yerusalemu.
2 Omu Yerusalemu ha Mulyango gw’Entaama hakaba haliyo ekidiba omu Ruheburaniya ekirukwetwa Besizasa, ekikaba kiroho obuju butaano.
3 Abantu baingi abarwaire, abafu b’amaiso, abalema, n’abazingamire, baabyamaga omu buju bunu.
4 ——
5 Baitu hakaba haroho omusaija ow’akaba arwaire kumara emyaka 38.
6 Yesu obu yarozere omusaija ogu abyamire kandi yakimanya ngu ataaha arwaire kumara akasumi akaraihire, yamukaguza ati: “Noogonza kukira?”
7 Omusaija ow’akaba arwaire yamugarukamu ati: “Waitu, tinyine omuntu weena ow’okunkonyera akanta omu kidiba, amaizi obu garukuba nigatabura, obu mba ndiyo ningenda kusirimukayo, omuntu ondi ambanzaayo.”
8 Yesu yamugambira ati: “Imuka, okwate omukeeka gwawe, orubate.”
9 Ahonaaho omusaija yakira, yakwata omukeeka gwe, yatandika kurubata.
Ekiro eki ekaba eri Sabbiti.
10 Nubwo Abayudaaya baagambira omusaija ayakiziibwe bati: “Kiro kinu Sabbiti kandi tikirukwikirizibwa iwe kuhimba omukeeka.”
11 Baitu yabagarukamu ati: “Ogu anyakunkirize nuwe angambiire ati, ‘Kwata omukeeka gwawe orubate.’”
12 Nubwo baamukaguza bati: “Omusaija ogu nooha akugambiire ati, ‘Kwata omukeeka gwawe orubate?’”
13 Baitu omusaija ow’akaba akiziibwe akaba atamumanyire habwokuba Yesu akaba abuliire omu kitebe ky’abantu abakaba baroho aho.
14 Hanyuma Yesu yamusanga omu yekaru kandi yamugambira ati: “Dora, hati okizire. Otongera kusiisa, nukwo ekintu ekirukukiraho kuba kibi kitakuhikaho.”
15 Omusaija yagenda yagambira Abayudaaya ngu Yesu nuwe akaba amukirize.
16 Habw’ensonga enu, Abayudaaya bakahiiganiza Yesu, habwokuba akaba naakora ebintu binu ha Sabbiti.
17 Baitu yabagambira ati: “Isenyowe aikaire naakora kuhikya na hati, kandi na nyowe nyikara ninkora.”
18 Egi niyo ensonga habwaki Abayudaaya baatandikire kuserra omulingo baraamwita, habwokuba akaba atarukucwa ekiragiro kya Sabbiti kyonka, baitu akaba naayeta Ruhanga Ise, naayefoora nk’ow’arukwingana Ruhanga.
19 Kandi Yesu yabagambira ati: “Mananu kwo nimbagambira nti, Omwana tasobora kukora ekintu kyona habwe wenka, baitu akora ebi arora Ise naakora. Byona Ogu ebi akora, n’Omwana nibyo akora omu mulingo nugwo gumu.
20 Habwokuba Ise agonza Omwana, amwoleka byona uwe wenyini ebi akora, kandi alimwoleka ebirukukira hali binu, nukwo musobole kuhunirra.
21 Isenyowe nk’oku ahumbuura abafu kandi akabafoora abomeezi, n’Omwana na uwe afoora mwomeezi weena ow’agonza.
22 Habwokuba Isenyowe tacwera omuntu weena omusango, baitu obujunaanizibwa bwona obw’okucwa omusango abuhaire Omwana,
23 nukwo boona batemu Omwana ekitiinisa nk’oku bakitamu Isenyowe. Ogu weena atateekamu Omwana ekitiinisa, tateekamu ekitiinisa Ise ayamutumire.
24 Mananu kwo nimbagambira nti, ogu weena anyakuhurra ekigambo kyange kandi akaikiriza Ogu ayantumire, aine obwomeezi obutahwaho kandi tacwerwa omusango baitu aba arugire omu kufa naataaha omu bwomeezi.
25 “Mananu kwo nimbagambira nti, akasumi nikaija, kandi akasumi ako nuko kanu, abafu obu balihurra iraka ery’Omwana wa Ruhanga kandi abo abahuliriize bataireho omutima balifooka bomeezi.
26 Nk’oku Isenyowe aine obwomeezi omuli uwe, aikiriize n’Omwana na uwe kuba n’obwomeezi omuli uwe.
27 Kandi amuhaire obusobozi obw’okucwa omusango habwokuba nuwe Omwana w’omuntu.
28 Eki kitabahuniiriza, habwokuba akasumi nikaija boona abali omu bituuro* obu balihurra iraka lye
29 kandi balirugamu; abo abaakozere ebintu ebirungi balihumbuuka batunge obwomeezi, n’abo abaakozere ebintu ebibi balihumbuuka bacwerwe omusango.
30 Tinsobora kukora ekintu kyona habwange. Ncwa omusango nk’oku Isenyowe aba angambiire, kandi ncwa omusango omu mulingo gw’okuhikirra* habwokuba tinserra eki ndukugonza, baitu nserra Ogu ayantumire eki arukugonza.
31 “Kakuba nyeheera obwakaiso nyenka, obwakaiso bwange nibuba butali bw’amananu.
32 Haroho arukumpeera obwakaiso, kandi mmanyire ngu obwakaiso obu arukuha hali nyowe, bw’amananu.
33 Mukatuma abasaija hali Yohana kandi yaha obwakaiso oburukukwata h’amananu.
34 Baitu, tindukwikiriza obwakaiso kuruga hali abantu, oihireho nimbaza ebintu binu nukwo musobole kujunwa.
35 Omusaija ogu akaba ali taara erukwaka kandi erukumuliikana, kandi mukaba mweteekaniize kusemerererwa omu kyererezi kye habw’akasumi kake.
36 Baitu obwakaiso obu nyine nibukira obwa Yohana, habwokuba emirimo Isenyowe yampaire kukora, niyo empeera obwakaiso ngu Isenyowe nuwe yantumire.
37 Kandi Isenyowe ayantumire uwe wenyini amperiire obwakaiso. Timukahurraga iraka lye, kandi timukaroraga okusisana kwe,
38 kandi timwine kigambo kyona ekirukwikara omuli inywe, habwokuba timurukwikiriza ogu ou yatumire.
39 “Nimuseruliiriza omu byahandiikirwe habwokuba nimuteekereza ngu kuraba omuli byo nimwija kutunga obwomeezi obutahwaho; kandi ebi byonyini nibyo birukumpeera obwakaiso.
40 Kandi timurukugonza kwija nambere ndi nukwo musobole kutunga obwomeezi.
41 Tinyikiriza ekitiinisa ekiruga hali abantu,
42 baitu nkimanyire kurungi ngu timurukugonza Ruhanga.
43 Nyizire omu ibara erya Isenyowe, baitu timuntangiriire. Kakuba omuntu ondi aija omu ibara lye wenka, ogu mwakumutangiriire.
44 Nimusobora muta kwikiriza kandi kunu nimugonza ekitiinisa kuruga omuli inywe inywenka kandi mutarukuserra ekitiinisa ekiruga hali Ruhanga wenka?
45 Mutateekereza ngu ndibajunaana hali Isenyowe; haroho omu wenka arukubajunaana, ogu nuwe Musa, kandi nuwe mutairemu okunihira kwanyu.
46 Amananu gali, obu muraaba nimwikiririza omuli Musa, na nyowe mwakubaire nimunyikiririzaamu, habwokuba akahandiika ebirukunkwataho.
47 Baitu obu muraaba mutarukwikiriza ebi yahandiikire, muraikiriza muta ebi ndukugamba?”
Obugambo Obuli Hansi
^ Ebi nibyo, ebituuro eby’abo abaafiire kandi Ruhanga abaarukwijuka.
^ Rundi “gw’obwinganiza.”
