Mu buli diini harumu abantu ab’emitima ennungi. Tikiri kirungi kukimanya ngu abantu abo Ruhanga abarora kandi abafaaho muno? Baitu eky’ennaku kiri nti, ebikorwa ebibi biingi bikozerwe omu ibara lye diini. (2 Abakolinso 4:3, 4; 11:13-15) Okusigikirra ha alipoota z’amahu’re, amadiini agamu gasagika obutuju, obulemu bw’enganda, obulemu, n’okubonabonesa abaana. Ebintu binu bilereta abantu abaikiririza omu Ruhanga ennaku!​—Soma Matayo 24:3-5, 11, 12.

Ediini ey’amananu ehaisaniza Ruhanga baitu ey’ebisuba emwegesaho ebintu ebitali omu Baibuli, gamba nk’ebikwatiraine n’abafiire. Kyonka Ruhanga n’agonza abantu bamanye amananu agarukumukwataho.​—Soma Ezekyeri 18:4; 1 Timoseo 2:3-5.

Ruhanga tasobora kubihwabihwa amadiini goona agefoora nigamuheereza kandi kunu nigakora ebirukusemeza Setani. (Yakobo 4:4) Ekigambo kya Ruhanga kweta amadiini goona ag’ebisuba “Baburoni Orukooto,” nikirugiira ha rubuga rumu nambere amadiini ag’ebisuba g’atandikiire, orwabaireho omu kasumi k’okusandaara kw’amaizi okw’omu kasumi ka Nuha. Omu kasumi akatali kahara Ruhanga n’agenda kuhwerekereza amadiini goona agabonabonesa kandi agabihabiha abantu.​—Soma Okusuku’rwa 17:1, 2, 5, 16, 17; 18:8.

Amakuru agandi amarungi gali nti, Yahwe tayeberwe abantu abarungi abakyali omu madiini ag’ebisuba okwehinguliriza ensi yoona. N’abateraniza omu kuramya okw’amananu kakuba baikiriza entekaniza ye eyokubegesa amananu.​—Soma Mika 4:2, 5.

Yahwe afaayo hali abantu abarukugonza kukora ebihikire. Abatererra kuleka amadiini ag’ebisuba. Abantu abagonza Ruhanga betekaniize kukora empindahinduka ezirukwetaagisa kusobora kusemeza Ruhanga.​—Soma Okusuku’rwa 18:4.

Omu kyasa eky’okubanza, abantu ab’emitima emirungi obu bahuliire amakuru amarungi kuruga hali abakwenda, bakasemererwa. Yahwe akabegesa kuba n’okunihira hamu n’ekigendererwa. Bali kyokuroraho ekirungi habwokuba bakacwamu kwebembeza Yahwe omu bwomezi bwabu.​—Soma 1 Abasesalonika 1:8, 9; 2:13.

Yahwe aikiriza abo abarugire omu madiini ag’ebisuba kweteraniza hali abo ab’amuramya. Obw’oraikiriza okuralizibwa kwa Yahwe, n’oija kufooka nganjani ye, obe omu hali abo abamuramya, kandi otunge obwomezi obutahwaho.​—Soma Marako 10:29, 30; 2 Abakolinso 6:17, 18.

Amakuru amarungi gali nti amadiini ag’ebisuba nigaija kucwerwa omusango. Kinu nikiija kumaraho okunyigiriziribwa kwoona. Amadiini ag’ebisuba galiba gatakyasobora kuhabisa rundi kwahukaniza abantu, boona nibaija kuba beteranirize omu kuramya Ruhanga omu wenka ow’amananu.​—Soma Okusuku’rwa 18:20, 21; 21:3, 4.