Ruhanga ow’amananu nuwe muhangi w’ebintu byoona. Atabe n’etandikwa kandi talihwaho. (Zabuli 90:2) Nuwe ensoro y’amakuru amarungi agasangwa omu Baibuli. (1 Timoseo 1:11) Nkoku y’atuhaire obwomezi, nuwe wenka tusemerire kuramya.​—Soma Okusuku’rwa 4:11.

Busaho muntu ararozire Ruhanga habwokuba muntu w’omwoyo, ekirukumanyisa ngu obwomezi bwe bwa haiguru muno kukira obw’ebihangwa eby’omubiri ebiikara omu nsi. (Yohana 1:18; 4:24) Nobu kiraaba kiri kiti, ebintu ebi y’ahangire bitukonyera kumanya emiringo ye. Nk’ekyokurorraho, embibo nyamwingi ez’ebijuma n’ebyakyo ebiturora bitwoleka engonzi n’amagezi ga Ruhanga. Kandi n’obukooto bw’ensi butwoleka amaani ge.​—Soma Abarumi 1:20.

Kwega Baibuli nakyo kisobora kutukonyera kumanya emiringo endi Ruhanga eyaina. Nk’ekyokurorraho, Baibuli etugambira ebintu Ruhanga agonza n’ebyanoba, omulingo atwazamu abantu, n’omulingo akwatamu ensonga ez’enyahukana.​—Soma Zabuli 103:7-10.

Yesu akagamba: “Isitwe ali omu iguru, Ibara lyawe dyezebwe.” (Matayo 6:9) Nobu kiraaba ngu Ruhanga aina ebitiinisa bingi, aina ibara limu lyonka. Lyaturwa kundi omu buli rulimi. Omu Rutooro lyaturwa “Yahwe.”​—Soma Zabuli 83:18.

Omu Baibuli ezirukukira obwingi ibara lya Ruhanga lihirwemu kandi omu kiikaro kyalyo hatekwamu ebitiinisa nka Mukama rundi Ruhanga. Baibuli obu yahandiikirwe ibara eryo likabamu emirundi haihi 7,000. Yesu akamanyisa ibara eryo obu  y’ayegeseze abantu ebirukukwata hali Ruhanga.​—Soma Yohana 17:26.

Rora vidiyo Ruhanga Aine Ibara?

Okubonabona oku turabamu nikumanyisa ngu Yahwe tafaayo? Abantu abamu bagamba ngu atubonabonesa asobole kutulengesa. Baitu ebyo bisuba.​—Soma Yakobo 1:13.

Ruhanga atuhaire obugabe bw’okwecweramu ekiturukugonza kukora. Titwakusiimire obugabe obw’okumuramya obu twiine? (Yosuha 24:15) Baitu habwokuba abantu baingi bacwamu kukora abandi kubi, okubonabona kweyongera. Yahwe tikimusemeza kurora obutali bwinganiza obwo.​—Soma Okubanza 6:5, 6.

Yahwe atufaaho muno. N’agonza tube n’obwomezi oburungi. Omu kasumi akatali kahara naija kumarraho kimu okubonabona n’abo abakuleta. Habw’akacu kake, aky’akulekereho habw’ensonga ennungi. Nitwija kwega ha nsonga egyo omu ssura 8.​—Soma 2 Petero 2:9; 3:7, 13.

Okusaba nikusobora kutukonyera kugumya enkoragana yaitu na Yahwe. N’afaayo ha buli omu. (Zabuli 65:2; 145:18) Ayetekaniize kutuganyira ensobi zaitu. Gonze obundi tulemesebwa, obutwekamba kumusemeza akirora kandi akisiima. Nahabwekyo, nobuturaba tuli bantu abatahikirire, nitusobora kuba n’enkoragana ennungi na Ruhanga.​—Soma Zabuli 103:12-14; Yakobo 4:8.

Tusemerire kugonza Yahwe kukira omuntu ondi wena habwokuba nuwe y’atuhaire obwomezi. (Marako 12:30) Obw’orayeyongera kugonza Ruhanga n’oyeyongera kwega ebirukumukwataho kandi okekamba kukora eby’agamba, n’oija kwongera kugumya enkoragana yawe nawe.​—Soma 1 Timoseo 2:4; 1 Yohana 5:3.