EKIKAGUZO 3
Abazaire Bange Nsemeriire Kubaza Nabo omu Mulingo Ki?
WAKUKOZERE KI?
Teramu akasisani: Ekiro kiri Kyakasatu rwebagyo, Geoff ow’emyaka 17 amazire emirimo ye hati n’agonza kuhumuraho. Aikarra omu ntebe atandika kurora Ttivi.
Omu bwire obu bwonyini, Ise aija n’ayemerra omu mulyango baitu nikizooka ngu tasemeriirwe.
Amukaguza, “Geoffrey! Habwaki n’osiisa obwire n’orora Ttivi kandi kunu wakubaire n’okonyera muto waawe n’ebimuhairwege kuruga isomero? Baitu habwaki otahurra!”
Geoff atontorroma n’agamba “obu watandika.”
Ise amwirra haihi, amukaguza, “ogambire ki?”
Geoff agarukamu: “Busaho ekingambire.”
Ise amucomera n’amugamba: “Niiwe oha kungarukamu oti?”
Kakuba niiwe Geoff, wakukozere ki?
TEKEREZA HALI KINU!
Kubaza n’abazaire baawe kuba nk’okuvuga emotoka. Kakuba osanga omuhanda bagwisire, n’osobora kuserra omuhanda ogundi.
EKYOKURORRAHO:
Omwisiki ou barukweta Leah agamba ngu “Obwire obumu kingumirra kubaza na ise nyowe. Haroho obu mugambira ekintu hanyuma n’ankaguza, ‘ogambire ki?’”
LEAH ASOBORA KUKORA KIMU H’ABINTU BINU EBISATU.
-
Amukunganise.
Leah agamba ise ngu, “Baitu taata okaba ki? Omuntu n’obwaba n’akugambira ekintu ekikuru tofaayo kuhurra!”
-
Amweganyire.
Aleke kumugambira ekizibu kye.
-
Alinde obwire obusemeriire nukwo agaruke agambire ise ekyabairege n’agamba.
Leah atunge obwire bundi amugambire ekizibu kye, rundi ahandiike ebbaruha n’amusoborra ekizibu ekyaine.
Leah wakumuhaire magezi ki?
IJUKA NGU: Ise Leah aine ebintu bindi eby’arukukora—tarukumanya ngu omuhara abihiirwe. Nahabweki, kakuba Leah acwamu kukora ekigambirweho omu A, eky’okukunganiza ise, omuzaire tarukwija kumanya ekizibu kyonyini ekirukumukunganisa. Nahabweki, ise tarukwija kukoraho kintu kyona habwokuba aija kuba atamanyire ekizibu ky’omuhara. Kandi, Leah n’aija kuba atarukutamu ise ekitiinisa. (Abefeso 6:2) Amagezi ganu tigarukwija kumukonyera.
Nk’oku ebibaale ebiteirwe omu muhanda bitasobora kukulemesa kweyongerayo ha rugendo rwawe, osobora kutunga omulingo ogundi ogw’okubazaamu n’abazaire baawe
Nikisobora kwanguha kukora ekibazibweho omu B baitu, tikiri ky’amagezi. Habwaki? Habwokuba, kusobora kutunga obukonyezi obw’arukwetaaga, Leah asemeriire kumusoborra nukwo ise amanye ebizibu bye. Kuculeera kwonka tikirukusobora kukonyera.
Amagezi agahairwe omu C nigoleka ngu Leah tarukuleka ekizibu kinu kumulemesa kutamu amaani okubaza nauwe. Alinda obwire obundi obw’okubaza na ise. Kandi, nikisobora kumukonyera okwehurra kurungi kakuba ahandiikira ise ebbaruha.
Kakuba Leah ahandiika ebbaruha, nikisobora kumukonyera kusoborra kurungi ensonga ye. Ise obw’arasoma ebbaruha, neija kumukonyera kumanya ekya muhara we abaire n’alengaho kumugambira nukwo kimukonyere kumanya ekizibu kye. Nahabwekyo, amagezi agahairwe omu C nigakonyera Leah hamu na ise. Leah obwarabaza na ise, rundi akamuhandiikira ebbaruha, n’aija kuba n’ahondera omusingi ogurukugamba “nukwo tuhonderege ebyobusinge.”—Abarumi 14:19.
Leah asobora kukora kintu ki ekindi?
Tekereza ha kintu ekindi eky’asobora kukora. Hati teekereza hali ekisobora kurugamu kakuba ahondera amagezi ag’omuhaire.
OTABAZA OMU MULINGO OGURALETERA ABANDI KUKWETEGEREZA KUBI
Obwire obumu, osobora kubaza ekintu baitu abazaire baawe nibakyetegereza omu mulingo ogundi.
EKYOKURORRAHO:
Abazaire baawe basobora kukurora obihiirwe nibakukaguza “obaire ki?” Omu kiikaro ky’okubagambira ekizibu kyawe n’obagarukamu ngu, “busaho.”
Eky’obagarukiremu kisobora kumanyisa ngu: Torukubeesiga ekikumara kubagambira ebizibu byawe. Hakire orabigambira abanywani baawe.
Osobora kuba oine ekizibu ky’amaani abazaire baawe bakagonza kukukonyera baitu okabagamba: “Mutafaayo, ninyija kukyemarra.”
-
Abazaire baawe barateekereza ki?
-
Osobora ota kubagarukamu omu mulingo ogurukukiraho oburungi?
