ISOMO 35

Omulingo Tusobora Kukora Encwamu Enungi

TEKAHO

Itwena twine encwamu ez’okukora. Ezirukukira obwingi nizisobora kuturugiramu ebirungi rundi ebibi kandi nizisobora n’okukwataho muno enkoragana yaitu na Yahwe. Ekyokurorraho, nitusobora kucwamu nambere turaikara, nk’oku turatunga sente eziturukwetaaga, rundi obuturaaba nitugonza kutaaha obuswere. Obutukora encwamu enungi, nitusobora kuba n’obwomeezi oburumu okusemererwa kandi nitusemeza Yahwe.

1. Baibuli esobora eta kukukonyera kukora encwamu enungi?

Otakakozere encwamu, banza osabe Yahwe obukonyezi kandi oseruliirize omu Baibuli orole omulingo arukuroramu ensonga egi. (Soma Enfumo 2:3-6.) Omu nyikara ezimu, Yahwe aha ekiragiro ekirukwetegerezebwa kurungi. Obukiraaba nukwo kiri, encwamu erukukirrayo kimu oburungi ey’osobora kukora nukwo kworobera ekiragiro eki.

Baitu kandi kakuba omu Baibuli haba hatarumu ekiragiro ekirukukugambira eky’okukora? Nabwo Yahwe naija kukuterekereza ‘omu muhanda ogw’osemeriire kugendamu.’ (Isaya 48:17) Omu mulingo ki? N’asobora kukuha emisingi ey’erakuhabura. Emisingi ya Baibuli ziri nyegesa ez’amananu ezooleka entekereza ya Ruhanga n’enyehurra ye. Tukira kumanya enyehurra ya Ruhanga ha bintu ebimu, obutusoma ebyabaireho ebirukusangwa omu Baibuli. Kakuba tumanya omulingo Yahwe ayehurra, nitusobora kukora encwamu enungi ezirukumusemeza.

2. Bintu ki eby’osemeriire kutekerezaaho otakakozere encwamu?

Baibuli egamba eti: “Omuntu omwekengi arora muno omuhandagwe.” (Enfumo 14:15) Kinu nikimanyisa ngu tutakakozere encwamu, tusemeriire kubanza kutekerezaaho muno ekiturukugenda kucwamu. Obw’oraaba n’otekerezaaho eky’okukora, wekaguze: ‘Musingi ki ogwa Baibuli ogurukukwata ha nsonga enu? Ncwamu ki ey’erandetera kuba n’obusinge omu bitekerezo? Encwamu yange erakwataho eta abandi? Ekirukukirayo obukuru, erasemeza Yahwe?’—Ekyebiragiro 32:29.

Yahwe aine obusobozi obw’okutugambira ekirungi n’ekibi. Obutumanya kurungi ebiragiro bye n’emisingi ye kandi tukacweramu kimu kugihondera tuba nitutendeka omuntu waitu ow’omunda. Omuntu ow’omunda niyo enyehurra ey’etukonyera kumanya ekintu obukiraaba kihikire rundi tikihikire. (Abarumi 2:14, 15) Omuntu ow’omunda ow’atendekerwe kurungi naija kutukonyera kukora encwamu enungi.

YEGA EBIRUKUKIRAHO

Wetegereze omulingo emisingi ya Baibuli hamu n’omuntu w’omunda bitukonyera kukora encwamu enungi.

3. Leka Baibuli ekuhabule

Emisingi ya Baibuli n’esobora eta kutuhabura obuturukuba nitukora encwamu? Mutekeho VIDIYO, hanyuma mubazeeho ebikaguzo ebirukuhonderaho.

VIDIYO: Leka Emisingi ya Baibuli Ekuhabule (5:54)

Kisembo ki ekirungi Yahwe kiyatuhaire?
Habwaki Yahwe yatuhaire obugabe bw’okwecweramu?
Kiki eky’atuhaire kutukonyera kukora encwamu ezirukukirayo oburungi?

Kurora ekyokurorraho eky’omusingi gwa Baibuli, musome Abefeso 5:15, 16. Hanyuma mubazeho omulingo osobora kukozesa kurungi obwire bwawe kusobora . . .

kusoma Baibuli buli kiro
kuba nyineeka, nyinabwenge, omuzaire rundi omwana omurungi.
kugenda omu nsorrokano.

4. Tendeka omuntu waawe ow’omunda kukora encwamu enungi

Omu Baibuli obuharukuba harumu ekiragiro ekirukwetegerezebwa ekirukukwata ha nsonga, nikisobora kwanguha kumanya eky’okukora. Baitu kakuba haba hatarumu ekiragiro kyona? Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: “Ikara Oine Omuntu w’Omunda Omurungi” (5:13)

Omu vidiyo, bintu ki munyaanya itwe ebiyakozere kutendeka omuntu we ow’omunda n’okukora encwamu ey’erasemeza Yahwe?

Habwaki tutasemeriire kugambira omuntu ondi kutukorra encwamu eitusemeriire kwekorra? Musome Abaheburaniya 5:14, hanyuma mubazeeho ebikaguzo binu:

N’obukiraaba ngu nikisobora kutwanguhira kusaba abandi kutukorra encwamu, tusemeriire kuba n’obusobozi bw’okubaganizaamu ki?
Bintu ki ebisobora kukukonyera kutendeka omuntu waawe ow’omunda kandi okakora encwamu enungi?

Kusisanaho na maapu, omuntu waitu ow’omunda atukonyera kucwamu omulingo turakozesa obwomeezi bwaitu

5. Teekamu ekitiinisa omuntu ow’omunda ow’abandi

Abantu abarukwahukana nibasobora kukora encwamu ezitarukusisana. Nitusobora kwoleka tuta ngu nitutekamu ekitiinisa omuntu ow’omunda ow’abandi? Tekerezaaho enyikara zinu ibiri:

Enyikara 1: Munyaanya itwe ow’arukugonza kusiiga amaiso n’omunwa agenda omu kitebe nambere banyaanya itwe baingi batabaijuka obubarora ayesiigire.

Musome Abarumi 15:1 na 1 Abakolinso 10:23, 24, hanyuma mubazeeho ebikaguzo binu:

Kusigikirra ha nkarra zinu, munyaanya itwe n’asobora kucwamu kukora ki? Orakora ki kakuba ekintu ekyorukukora kiba nikitabaijura omuntu ow’omunda owa mutaahi waawe?

Enyikara 2: Ow’oruganda akimanyire ngu Baibuli tegamba ngu kibi kunywa amaarwa make, baitu acwamu kugalekera kimu. Araalizibwa ha kagenyi nambere arora ab’oruganda nibanywa amaarwa.

Musome Omugambizi 7:16 na Abarumi 14:1, 10, hanyuma mubazeeho ebikaguzo binu:

Kusigikirra ha nkarra zinu, ow’oruganda n’asobora kucwamu kukora ki? Orakora ki kakuba orora omuntu ondi n’akora ekintu eky’omuntu waawe ow’omunda atarukukwikiriza kukora?

Bintu ki ebitukonyera kukora encwamu enungi?

1. Saba Yahwe akukonyere kumanya eky’okukora.—Yakobo 1:5.

2. Seruliiriza omu Baibuli n’omu bitabu ebirukusigikirra ha Baibuli kutunga emisingi erakukonyera. N’osobora n’okwekaguzaaho ab’oruganda na banyaanya itwe abakuzire omu by’omwoyo.

3. Tekerezaaho omulingo encwamu yawe erakwataho omuntu waawe ow’omunda hamu nʼowʼabandi.

ABANTU ABAMU BAGAMBA: “Oine obugabe kukora kyona eky’orukugonza. Otafaayo, abandi ekibaratekereza tikiri kikuru.”

Habwaki tusemeriire kutekerezaaho omulingo Ruhanga arayehurramu, n’omulingo abantu abandi barayehurra?

OYEGERE KI?

Tukora encwamu enungi obutumanya omulingo Yahwe ayehurramu ha nsonga n’obututekerezaaho ebikorwa byaitu obubiraaba nibiija kukonyera abandi rundi kubakora kubi.

Kweijukyamu

N’osobora ota kukora encwamu ezirukusemeza Yahwe?
N’osobora ota kutendeka omuntu waawe ow’omunda?
N’osobora ota kuteekamu ekitiinisa omuntu ow’omunda ow’abantu abandi?

Ekiro tumaliriize isomo linu:

Lengaho Kinu

Tekerezaaho encwamu ey’orukunihira kukora omu busumi obutali bwa hara. Hondera amadaara asatu agolekerwe omu kasanduuko “ Bintu ki Ebitukonyera Kukora Encwamu Enungi?”

Ekindi:

Your other goal