HAROHO entekereza nyingi ezirukwahukana ezirukukwata ha bwomeezi n’okufa. Abamu bateekereza ngu nibaija kweyongera kwomerra hanyuma y’okufa rundi nibaija kugenda omu nsi endi. Abandi bateekereza ngu nibaija kuzaarwa omurundi gundi. Kandi abandi bateekereza ngu omuntu obwafa ebye biba bihoire.

Naiwe n’osobora kuba oine entekereza eyawe ha nsonga enu, kusigikirra ha kiikaro nambere wakuliire rundi enyikiriza ez’owanyu. Nk’oku haroho entekereza nyingi ezirukukwata ha kufa, notekereza haroho nambere tusobora kutunga, rundi haroho omuntu arukusobora kutuha eky’okugarukamu ekihikire eky’ekikaguzo kinu ekigumire?

Habw’akasumi kaingi muno, abegesa b’amadiini baikaire nibegesa ngu omuntu aine omwoyo ogutafa. Abahondezi ab’amadiini amakooto nk’Abakristaayo, ediini ey’Ekihindi, ey’Abayudaya, ey’Obusiramu hamu n’ezindi​—geegesa ngu omuntu aine omwoyo ogumurugamu hanyuma y’okufa. Kandi bo Ababbuda, baikiriza ngu omuntu hanyuma y’okufa aikara n’azarwa buhyaka kuhikya obwahika omu nyikara erukwetwa Nirvana enyakurumu okusemerwa kwingi.

Kusigikirra ha nyegesa zinu, abantu abaingi baikiriza ngu omuntu obwafa agenda omu nsi endi. Nahabweki, kinu kiretera baingi kwikiriza ngu, omuntu obwafa aba ahikire ha idaara erikuru omu bwomeezi bwe kandi kinu kirugamu baingi kwikiriza ngu kufa kugonza kwa Ruhanga. Baitu Baibuli eyegesa ki ha nsonga enu? Soma ekicweka ekirukwongeraho habwokuba eky’okugarukamu ekirumu nikisobora kukuhuniiriza.