1. Habwaki Abababuroni baagondeze nabbi Danieri?

 NABBI Danieri akaba akyali musigazi muto, Abababuroni obubaamwihire Yerusalemu bamutwara Baburoni nk’omunyagwa. N’obukiraaba ngu akaba akyali muto, abaamunyagire bakamugonza. “Bakarora okusisana okwa haruguru,” ngu Danieri akaba ‘ataroho kamogo, baitu agomekere kurungi’ kandi akaba naruga omu ka ey’amaani. (1 Sam. 16:7) Nahabweki Abababuroni bakacwamu kumutendeka nukwo aheereze omu kikaali.​—Dan. 1:3, 4, 6.

2. Habwaki Yahwe yagondeze Danieri? (Ezekyeri 14:14)

² Yahwe akagonza Danieri, hatali ngu habwokuba akaba nazooka kurungi, rundi habw’okuheereza omu kikaali baitu habwokuba akacwamu kuba mwesigwa haluwe. Danieri n’asobora kuba akaba aine emyaka nka 20, Yahwe obuyamulengesaniize na Nuha na Yobu, abaamazire emyaka nyingi bali besigwa. (Kub. 5:32; 6:9, 10; Yob. 42:16, 17; soma Ezekyeri 14:14.) Yahwe akagumizaamu n’agonza Danieri, obwomeezi bwe bwona.​—Dan. 10:11, 19.

3. Kiki ekiturabazaaho omu kicweka kinu?

³ Omu kicweka kinu, nitwija kubazaaho emiringo ebiri Danieri ey’akaba aine eyamufoire w’omuhendo hali Yahwe. Nitwija kubanza kubazaaho emiringo enu, n’ekyamukonyiire kugikurakuraniza. Hanyuma, nitwija kurora omulingo tusobora kumwegeraho. N’obukiraaba ngu ekicweka kinu nikibazaaho abato, itwena, nitusobora kwegera ha kyokurorraho kya Danieri.

4. Danieri akooleka ata obumanzi? Bazaaho ekyokurorraho.

⁴ Danieri akooleka obumanzi obwakaba ali musigazi. Tekerezaaho enyikara z’emiringo ebiri nambere yayolekere obumanzi. Ey’okubanza n’esobora kuba yabaireho nk’emyaka ebiri hanyuma y’Abababuroni kuhwerekereza Yerusalemu. Omukama Nebukadeneza owa Baburoni akaroota ekirooto nambere yarozere ekisisani ekirukutiinisa. Akagamba ngu abasaija boona ab’amagezi, otwaliiremu na Danieri baitwe, kakuba balemwa kumugambira ekyarosere n’amakuru gaakyo. (Dan. 2:3-5) Danieri akaba aine kugira ekiyakoraho omu bwangu, kitali eki, abantu baingi baakufiire. “Yatahamu, yayesengereza omukama amuraganize omwanya, amusoborre . . . amakuru” g’ekirooto. (Dan. 2:16) Kinu kiketaagisa obumanzi n’okwikiriza. Busaho ekirukwoleka ngu Danieri yarotorraga ebirooto. Akasaba banywani be Saduraki, Mesaki, na Abedenego b “basabe ebyokuganyirwa hali Ruhanga womu iguru habwekyensita eki.” (Dan. 2:18) Yahwe akagarukamu esaara zaabo. Akakonyera Danieri kurotorra ekirooto eki. Kandi Danieri n’abanywani be bataitwe.

5. Kintu ki ekindi ekyabaireho kyayetaagisa Danieri kwoleka obumanzi?

⁵ Hanyuma y’emyaka kurabaho Danieri amazire kusoborra ekirooto eky’ekisisani ekikooto, hakabaho ekintu ekindi ekyamwetaagisize kwoleka obumanzi. Nebukadeneza akongera yaroota ekirooto ekindi ekirukukwataho omuti omukooto muno. N’obumanzi, Danieri akasoborra omukama amakuru g’ekirooto kinu, otwaliiremu n’okumugambira ngu naija kugwa iraru kandi aihwe ha bukama habw’akusumi. (Dan. 4:25) Omukama akaba n’asobora kutekereza ngu Danieri munyanzigwa we kandi akaba n’asobora n’okumwita. Baitu Danieri akooleka obumanzi, yamusoborra ekirooto.

6. Kiki ekisobora kuba kyakonyiire Danieri kwoleka o bumanzi?

⁶ Kiki ekisobora kuba kyakonyiire Danieri kwoleka obumanzi omu bwomeezi bwe bwona? Hataroho kugurukyagurukya, bazaire be baine kuba baamuteriireho ekyokurorraho  ekirungi. Baine kuba bayorobiire ekiragiro Yahwe eky’akaba ahaire abazaire Abaisaleri eky’okwegesa abaana baabo ebiragiro bye. (Bir. 6:6-9) Danieri akaba amanyire ebiragiro ikumi, hamu n’ebiragiro ebindi. Akaba amanyire Omunyaisaleri eky’akaba asemeriire kulya n’okutalya. c (Lev. 11:4-8; Dan. 1:8, 11-13) Ekindi, Danieri akegesebwa ebyafaayo by’abaheereza ba Ruhanga kandi akaba amanyire ebyabahikireho obubaajemiire Ruhanga. (Dan. 9:10, 11) Ebintu Danieri yarabiremu omu bwomeezi, bikamuleetera kukigumya ngu Yahwe n’abamalaika be ab’amaani nibamusagika.​—Dan. 2:19-24; 10:12, 18, 19.

7. Kintu ki ekindi ekyakonyiire Danieri kutunga obumanzi? (Rora ekisisani.)

⁷ Danieri akesomesa ebintu ebyahandiikirwe banabbi, otwaliiremu n’obunabbi bwa Yeremiya. Omu kwesomesa oku, akakyetegereza ngu Abayudaaya bakaba bali haihi kuruga omu bunyagwa. (Dan. 9:2) Kurora obunabbi obu nibuhikirra kikaleetera Danieri kweyongera kwesiga Yahwe, kandi abo abamwesiga nibasobora kutunga obumanzi oburukirrayo kimu. (Lengesaniza na Abarumi 8:31, 32, 37-39.) Ekirukukira obukuru, Danieri yasabaga hali Yahwe. (Dan. 6:10) Yasabaga Yahwe ekiganyiro kandi namugambira omulingo arukwehurramu. Ekindi, Danieri yasabaga obukonyezi. (Dan. 9:4, 5, 19) Nauwe akaba ali muntu nkaitwe kandi atazaarwe ali mumanzi. Oihireho, akakurakuraniza obumanzi kuraba omu kwesomesa, kusaba, n’okwesiga Yahwe.

8. Nitusobora tuta kukurakuraniza obumanzi?

⁸ Kiki ekitusemeriire kukora kusobora kukurakuraniza obumanzi? Abazaire baitu nibasobora kutwekambisa kwoleka obumanzi, baitu tibasobora kutugweta omulingo gunu. Kwoleka obumanzi nikisisana n’okukora ekintu ekyotakakoraga. Omulingo gumu ogw’okukikora nukwo kwetegereza omulingo omwegesa waawe arukukikoramu, hanyuma n’okora nk’oku akozere. Naitwe, twega kwoleka obumanzi obuturora omulingo abantu abandi barukubwolekamu kandi hanyuma tuhondera ekyokurorraho kyabo. Hati kiki ekitusobora kwegera hali Danieri? Nka Danieri, tusemeriire kwesomesa kurungi Ekigambo kya Ruhanga. Tusemeriire kugumya enkoragana yaitu na Ruhanga kuraba omu kumusaba butoosa nitumugambira omulingo turukwehurramu. Kandi tusemeriire kwesiga Yahwe, kuraba omu kukigumiza kimu ngu naija kutukonyera obwire bwona. Hanyuma, okwikiriza kwaitu obukuralengwa, nitwija kwoleka obumanzi.

9. Tugasirwa tuta obutwoleka obumanzi?

⁹ Kitugasira muno obutwoleka obumanzi. Tekerezaaho ekyokurorraho kya Ben. Akasomera omu isomero lya Germany nambere buli omu yaikirizaaga ngu ebintu bitahangwe kandi ngu Baibuli eby’ebazaaho okuhanga ruganikyo kwonka. Kiro kimu, Ben akasabwa kwemerra omu maiso g’abaana asoborre habwaki naikiriza ngu ebintu bikahangwa. Akooleka obumanzi yasoborra buli omu. Kiki ekyarugiremu? Ben n’agamba ati: “Omwegesa akahuliiriza kurungi, yayogesamu ebinkaba nkozeseze kusoborra kandi buli mwana yamuha kopi.” Abeegi abandi bakwetwaza bata? Ben n’agamba ati: “Baingi bakahuliiriza kandi bangambira ngu baakugondeze kuba nka nyowe.” Nk’oku twarora omu kyokurorraho kya  Ben, obutwoleka obumanzi abantu abandi batuteekamu ekitiinisa. Nikisobora n’okuleetera abantu abandi kugonza kwegaho Yahwe. Mali twine ensonga enungi habwaki tusemeriire kukurakuraniza obumanzi.

10. Obwesigwa nikimanyisa ki?

¹⁰ Omu Baibuli ekigambo eky’Oruheburaniya “obwesigwa” rundi okugonza okutalekera, kikira kukozesebwa kubazaaho okugonza okw’amaani Ruhanga okwainiire abaheereza be. Ekigambo nikyo kimu kikira kukozesebwa kumanyisa okugonza abaheereza ba Ruhanga okubolekangana. (2 Sam. 9:6, 7) Kandi Yahwe nagonza naitwe tube besigwa haluwe. Obwesigwa bwaitu bweyongera kuguma obutubwoleka kumara akasumi. Wetegereze omulingo Danieri yayolekere obwesigwa.

11. Danieri akooleka ata obwesigwa obwakaba akuzire omu myaka? (Rora ekisisani.)

¹¹ Danieri akahikwaho enyikara nyingi ezamwetaagisize kwikara ali mwesigwa hali Yahwe. Baitu ekirukukirayo kikabaho obw’akaba ali nk’omu myaka 90. Kasumi ako, Abamedi n’Abaperesi bakaba basingwire Baburoni kandi ekaba neremwa Omukama Daliyo. Abakuru omu bukama obu tibaagonzaga Danieri kandi tibaateekamuga ekitiinisa Ruhanga ouyaramyaga. Nahabweki bakagonza kwita Danieri. Bakaleetera omukama kutaho ekiragiro ekyakwetaagisize Danieri kwoleka obwaraaba ali mwesigwa hali Ruhanga we rundi hali omukama. Danieri eky’akaba aine kukora kwoleka ngu mwesigwa hali omukama n’okuba nk’abantu abandi nukwo kuleka kusaba hali Yahwe kumara ebiro 30. Baitu akacwamu kwikara ali mwesigwa hali Yahwe. Ekyarugiremu, akanagwa omu kiina ky’entale. Yahwe akaha Danieri omugisa habw’okwikara ali mwesigwa haluwe, yamulinda tiyaliibwa entale. (Dan. 6:12-15, 20-22) Nitusobora tuta kwoleka obwesigwa nk’obwa Danieri?

12. Kiki ekyakonyiire Danieri kwikara ali mwesigwa hali Yahwe?

¹² Nk’oku tusangirwe turozere, kusobora kuba besigwa hali Yahwe, tusemeriire kumugonza muno. Danieri akasobora kwikara ali mwesigwa hali Yahwe habwokuba akaba namugonza muno. Hataroho kugurukyagurukya, akakurakuraniza obwesigwa bwe kuraba  omu kutekerezaaho emiringo ya Yahwe n’omulingo agyoleka. (Dan. 9:4) Ekindi, Danieri akecumiitirizaaho ebirungi Yahwe akaba amukoliire n’abantu be.​—Dan. 2:20-23; 9:15, 16.

13. (a) Nyikara ki ezirukulenga obwesigwa bw’abato? Bazaaho ekyokurorraho. (Rora Ekisisani.) (b) Nk’oku kyolekerwe omu vidiyo, n’osobora kugarukamu ota kakuba abandi bakukaguza Abakaiso ba Yahwe obubaraaba basagika obukuuhya?

¹³ Nka Danieri, abato betoroirwe abantu abatateekamu Yahwe n’endengo ze ekitiinisa. Abantu nkaabo nibasobora kunoba omuntu wena owaine enyikiriza ekirukwahukana n’ezaabo. Abamu nibasobora kusindikiriza abato kuleka kuba besigwa hali Yahwe. Tekerezaaho ekyahikire ha musigazi arukwetwa Graeme, arukwikara omu Australia. Obwesigwa bwe bukalengwa obw’akaba ali ha isomero. Omwegesa akabakaguza omulingo baakwetwaize kakuba munywani wabo abagambira ngu mukuuhya. Omwegesa akabagambira ngu abo boona abarukusagika obukuuhya bagende ha rubaju orumu kandi abaturukubusagika bagende ha rubaju orundi. Graeme n’agamba ati: “Oihireho nyowe n’omwojo ondi ow’akaba ali omu h’Abakaiso ba Yahwe, abandi boona bakagenda ha rubaju orukusagika obukuuhya.” Ekyahondiireho kikalenga obwesigwa bwa Graeme hali Yahwe. “Ekiro eki abaana boona bakatusekereza kandi baatujuma. Omu mulingo ogutekaine nkalengaho kubasoborra habwaki ntarukusagika obukuuhya, baitu batampuliirize.” Kinu kikaleetera Graeme kwehurra ata? N’agamba ati: “Kitansemeze abaana abandi kunsekereza n’okunjuma, baitu kikansemeza habw’okwikara ndi mwesigwa hali Yahwe n’okubazaaho okwikiriza kwange.” d

14. Mulingo ki ogumu ogutusobora kukurakuraniza obwesigwa bwaitu hali Yahwe?

¹⁴ Nka Danieri, nitusobora kukurakuraniza obwesigwa bwaitu hali Yahwe, kakuba tweyongera kumugonza. Tweyongera kugonza Yahwe obutwegaho emiringo ye. Ekyokurorraho nitusobora kwesomesaaho ebintu ebiyahangire. (Bar. 1:20) Obworaaba nogonza kweyongera kugonza Yahwe n’okumuteekamu ekitiinisa, n’osobora kusoma ebicweka rundi orole vidiyo omu kicweka “Kikahangwa?” Ekindi n’osobora kusoma ebiri omu burocuwa Was Life Created? na The Origin of Life​—Five Questions Worth Asking. Wetegereze munyaanya itwe omuto arukwetwa Esther kuruga Denmark ekyarukugamba ha bitabu binu: “Ebitabu binu nibisoborra kurungi. Tibikugambira eky’osemeriire kwikiririzaamu, oihireho bikwoleka amananu nukwo osobole kwecweramu ekyoraikiriza.” Ben, outubalizeehoga n’agamba ati: “Ebinasomere omu bitabu binu bikagumya okwikiriza kwange. Bikankonyera kukigumya ngu ebintu bikahangwa.” Obworasoma obutabu bunu, nitukigumya ngu noija kwikiranganiza na Baibuli obw’egamba eti: “Osemeriire, ai [Yahwe] Ruhanga waitu, okuhabwa ekitinisa nokutinwa nobusobozi: baitu niwe wahangire byona.”​—Kus. 4:11. e

15. Kintu ki ekindi ekitusobora kukora kweyongera kugonza Yahwe?

¹⁵ Ekintu ekindi ekitusobora kukora kweyongera kugonza Yahwe nukwo kwegaho Omwana we, Yesu. Munyaanya itwe omuto arukwetwa Samira, kuruga Germany, eki nikyo yakozere. N’agamba ati: “Nkeyongera kumanya Yahwe kurungi kuraba omu kwesomesaaho  Yesu.” Samira obwakaba akyali muto, kikamugumira kwetegereza omulingo Yahwe asobora kuba munywani we kandi akamugonza. Baitu akaba nayetegereza nk’oku Yesu yayehurraga. N’agamba ati: “Nkagonza Yesu habwokuba yagonzaaga abantu otwaliiremu n’abaana.” Obuyayeyongiire kwega hali Yesu, akeyongera kugonza Yahwe. N’agamba ati: “Mporampora nkakyetegereza ngu Yesu nauwe ayegera hali Ise. Ali nka Ise omu miringo nyingi. Nkakyetegereza ngu enu eri emu ha nsonga habwaki Yahwe yasindikire Yesu omu nsi, nukwo akonyere abantu kumanya kurungi Yahwe.” (Yoh. 14:9) Obworaaba n’ogonza kugumya enkoragana yaawe na Yahwe, habwaki otamara obwire noyega hali Yesu? Obworakikora, noija kweyongera kugonza Yahwe n’okuba mwesigwa haluwe.

16. Tugasirwa tuta obutuba abesigwa? (Yeremiya 31:3)

¹⁶ Abantu abesigwa bakira kutunga abanywani abarungi kandi obunywani bwabo buhangaara. (Rus. 1:14-17) Ekindi, abantu abesigwa hali Yahwe batunga obusinge omu mutima. Habwaki? Habwokuba Yahwe araganiza kuba mwesigwa hali abo abesigwa haluwe. (Soma Yeremiya 31:3.) Kitekerezeeho, Ruhanga Ow’obusobozi bwona n’agonza kuba munywani waitu! Kandi Yahwe obwarukuba ali munywani waitu, busaho kintu kyona ekisobora kutubaganiza haluwe, n’obukyakuba ekirengo, okuhakanizibwa rundi okufa. (Dan. 12:13; Luk. 20:37, 38; Bar. 8:38, 39) Mali kikuru muno twikale tuli besigwa hali Yahwe nka Danieri!

17-18. Bintu ki ebindi ebitusobora kwegera hali Danieri?

¹⁷ Omu kicweka kinu tubalizeeho emiringo ebiri Danieri eiyayolekere. Baitu haroho ebintu ebindi ebitusobora kumwegeraho. Ekyokurorraho, Yahwe akamuleetera okwolekwa n’okuroota ebirooto kandi yamumanyisa n’amakuru ag’obunabbi agali omu bintu ebiyarozere. Bwingi ha bunabbi obu bukahikirra. Baitu obundi nibubazaaho ebintu ebiraabaho omu kasumi ak’omumaiso kandi ebirakwataho abantu boona omu nsi.

¹⁸ Omu kicweka ekirukuhonderaho, nitwija kubazaaho obunabbi bw’emiringo ebiri obwahandiikirwe Danieri. Kubwetegereza, nikisobora kukonyera itwena abato n’abakuru, kukora encwamu ez’amagezi. Kandi nibusobora kutukonyera kweyongera kuba bamanzi n’okuba besigwa nukwo tusobole kwetekaniriza ebirengo eby’omu kasumi k’omumaiso.