1. Kiki omuntu eky’asemeriire kubanza kukora atakatandikire kwombeka?

TEKEREZAAHO omuntu anyakucwiremu kwombeka enju. Amanyire ekika ky’enju arukugonza kwombeka. Notekereza ngu asemeriire kutandikiraho kugura eby’okwombekesa n’okwombeka aho naaho? Nangwa. Atakatandikire kwombeka aine ekintu ekikuru eky’asemeriire kubanza kukora. Asemeriire kukora embalirra nukwo amanye sente ezarukwetaaga. Habwaki eki kikuru? Habwokuba asemeriire kumanya obwaraaba aine sente ezirukumara. Kakuba abanza kukora embalirra nikiija kumukonyera kwombeka enju akagimalirra.

2. Kusigikirra ha Luka 14:27-30, kiki eky’osemeriire kutekerezaaho muno otakabatiziibwe?

² Okugonza okwoiniire Yahwe hamu n’ebintu ebirungi eby’akukoliire, byakakuletiire kugonza kubatizibwa? Obukiraaba nukwo kiri, nosisana n’omusaija arukugonza kwombeka enju. Tekerezaaho ebigambo bya Yesu ebiri omu Luka 14:27-30. (Soma.) Yesu akaba nabazaaho obujunanizibwa obw’okuba omu h’abegeswa be. Kusobora kuba bahondezi be, tusemeriire kubanza kukora ‘embalirra,’ ekirukumanyisa kubanza kumanya ebizibu ebitusobora kutunga hamu n’ebintu ebitwine kwefeereza. (Luk. 9:23-26; 12:51-53) Nahabweki, otakabatiziibwe osemeriire kubanza kutekerezaaho muno obujunanizibwa obw’okufooka omu h’abahondezi ba Kristo. Obworakora eki, noija kuba oyetekaniize kuheereza Yahwe n’obwesigwa hanyuma y’okubatizibwa.

3. Omu kicweka kinu nitwija kubazaaho ki?

³ Tugambe ngu emigisa oratunga hanyuma y’okufooka omu h’abahondezi ba Kristo ow’abatiziibwe n’ekirra hara ebintu eby’orayefeereza n’ebizibu eby’osobora kutunga? Ego! Okubatizibwa nikwija kukukingurraho emigisa nyingi hati n’omu bwire obw’omu maiso. Hati katubazeeho ebikaguzo ebikuru ebirukukwata  ha kubatizibwa. Kinu nikiija kugarukamu ekikaguzo kinu, “Nakahikire Ha Rulengo orw’Okubatizibwa?”

4. (a) Okwehayo nikumanyisa ki? (b) Kusigikirra ha Matayo 16:24, ‘kweyangisa wenka’ nikimanyisa ki?

⁴ Okwehayo nikimanyisa ki? Omuntu atakabatiziibwe asemeriire kubanza kwehayo. Kwehayo hali Yahwe, nikimanyisa kusaba kuruga ha mutima gwawe n’omugambira nk’oku oyetekaniize kumuheereza habw’ebiro n’ebiro. Obw’oyehayo hali Yahwe oba ‘n’oyeyangisa wenka.’ (Soma Matayo 16:24.) Hanyuma y’okwehayo otunga omugisa gw’amaani ogw’okufooka muntu wa Yahwe. (Bar. 14:8) Oba omugambiire ngu kuruga hati n’ebiro byona noija kuteeka omutima gwawe ha kukora eby’agonza hatali kwebembeza eby’ogonza. Obw’oyehayo hali Ruhanga oba n’omuraganiza kuruga ha mutima gwawe ngu noija kukoraga eby’agonza. Yahwe tatuhambiriza kukora okweraga oku. Baitu obutumara kweraga, Yahwe atunihirramu kuhikiriza ekitweragire.​—Zab. 116:12, 14.

5. Okwehayo kwine kakwate ki n’okubatizibwa?

⁵ Okwehayo kwine kakwate ki n’okubatizibwa? Kwehayo ncwamu yaawe nk’omuntu kandi kuba hagati yaawe na Yahwe. Baitu okubatizibwa kukorwa omu rwijwire rw’abantu, kandi kukira kubaho ha nsorrokano enkooto. Obw’obatizibwa oba noyoleka ngu okamara kwehayo hali Yahwe. * Nahabweki okubatizibwa kwawe kuba nikwoleka abantu abandi ngu nogonza Yahwe Ruhanga n’omutima gwawe gwona, n’obwomeezi bwawe bwona, n’amagezi gaawe goona, kandi n’amaani gaawe goona.​—Mar. 12:30.

6-7. Kusigikirra ha 1 Petero 3:18-22, nsonga ki ibiri habwaki tusemeriire kubatizibwa?

⁶ Mali nikyetaagisa omuntu kubatizibwa? Tekerezaaho ebigambo ebiri omu 1 Petero 3:18-22. (Soma.) Nk’oku eryato lya Nuha likooleka abantu boona ngu Nuha akaba aine okwikiriza omuli Ruhanga, omu mulingo nugwo gumu okubatizibwa kwawe nikwija kwoleka abantu boona ngu oyehaireyo hali Yahwe. Baitu mali okubatizibwa nikwetaagisa? Ego. Omukwenda Petero akabazaaho ensonga habwaki okubatizibwa nikwetagisibwa. Eky’okubanza akagamba ngu okubatizibwa nukwo “kurukubajuna.” Okubatizibwa nikusobora kutujuna kakuba twoleka omu bikorwa byaitu ngu nitwikiririza omu Yesu, ngu akatufeera, yahumbuuka yagenda omu iguru, kandi ngu aikaliire “ha mukono ogwobulyo gwa Ruhanga.”

⁷ Ekyakabiri, okubatizibwa kutukonyera kuba n’omuntu ow’omunda omurungi. Obutwehayo hali Ruhanga kandi tukabatizibwa, tutunga enkoragana ey’embaganiza nauwe. Habw’okwegarukamu kuruga ha mutima n’okwikiririza omu kicunguro, Ruhanga atuganyira ebibi byaitu. Kandi eki kitukonyera kuba n’omuntu ow’omunda omurungi.

8. Nsonga ki enkuru ey’esemeriire kukuletera kucwamu kubatizibwa?

⁸ Kiki ekisemeriire kukuletera kugonza kubatizibwa? Kwega Baibuli, kikukonyire kumanya bingi ebirukukwata hali Yahwe hamu n’emiringo ye. Ebintu eby’oyegere hali Yahwe bikusemiize muno kandi byakuletera kwongera kumugonza. Okugonza okwoiniire Yahwe niyo nsonga enkuru habwaki osemeriire kucwamu kubatizibwa.

9. Kusigikirra ha Matayo 28:19, 20, nikimanyisa ki kubatizibwa omu ibara lya Isiitwe, ery’Omwana, hamu n’ery’omwoyo ogurukwera?

⁹ Ensonga endi, ey’erakukonyera kucwamu kubatizibwa nugo amananu ag’oyegere kuruga omu Baibuli kandi wagaikiriza. Tekerezaaho Yesu ekiyagambire obuyaragiire abegeswa be kugenda kufoora abantu abegeswa. (Soma Matayo 28:19, 20.) Kusigikirra ha  bigambo bya Yesu, abo ababatizibwa basemeriire kukikora ‘omu ibara lya Isiitwe n’Omwana n’omwoyo ogurukwera.’ Kinu nikimanyisa ki? Osemeriire kwikiriza n’omutima gwawe goona amananu kuruga omu Baibuli agarukukwata hali Yahwe, Omwana we Yesu, hamu n’omwoyo ogurukwera. Amananu ganu gaine amaani kandi nigasobora kuhindura obwomeezi bwawe. (Baheb. 4:12) Leka turabemu gamu h’amananu agatwayegere.

10-11. Mananu ki ag’oyegere kuruga omu Baibuli agarukukwata hali Isiitwe kandi ag’orukwikiriza?

¹⁰ Ijuka omulingo wayehuliiremu obuwayegere ngu ibara lya Ruhanga nuwe “Yahwe,” ‘ali haiguru muno, nalema ensi zoona,’ kandi nk’oku nuwe “Ruhanga owamazima.” (Zab. 83:18; Yer. 10:10) Nuwe Omuhangi waitu, kandi “Okusingura kuli kwa [Yahwe].” (Zab. 3:8; 36:9) Ataireho entekaniza ey’okutujuna kuruga omu kibi n’okufa kandi araganiize kutuha obwomeezi obutahwaho omu kasumi ak’omu maiso. (Yoh. 17:3) Okwehayo kwawe n’okubatizibwa nibiija kwoleka ngu ofookere omu h’Abakaiso ba Yahwe. (Is. 43:10-12) Noija kutaaha omu ka ey’ensi yoona ey’abaheereza ba Ruhanga, abaine omugisa ogw’okwetwa ibara lye kandi abalimanyisa abantu abandi.​—Zab. 86:12.

¹¹ Kamugisa gw’amaani kumanya ebintu Baibuli eby’eyegesa ebirukukwata hali Isiitwe! Obwoikiririza omu mananu ganu ag’omuhendo, kikuletera kugonza kwehayo hali Yahwe n’okubatizibwa.

12-13. Mananu ki ag’oyegere agarukukwata ha Mwana wa Ruhanga kandi ag’oikirize?

¹² Okehurra ota obuyagere amananu ganu agarukukwata ha Mwana wa Ruhanga? Yesu nuwe wakabiri omu bukuru omu buhangwa bwona. Akahayo obwomeezi bwe atahambiriziibwe nk’ekicunguro habwaitu. Obutwoleka omu bikorwa byaitu ngu nitwikiririza omu kicunguro, tuganyirwa ebibi byaitu, tutunga enkoragana enungi na Ruhanga, kandi n’okunihira okw’obwomeezi obutahwaho omu busumi obw’omu maiso. (Yoh. 3:16) Yesu nuwe Nyakatagara Omukuru. Nagonza tugasirwe omu kicunguro kandi tutunge enkoragana enungi na Ruhanga. (Baheb. 4:15; 7:24, 25) Nk’oku nuwe Mukama ow’Obukama bwa Ruhanga, Yahwe nuwe arukugenda kukozesa kweza ibara lye, kumaraho obubi bwona kandi n’okufoora ensi yoona orugonjo orurungi nambere haliba emigisa etalihwaho. (Mat. 6:9, 10; Kus. 11:15) Yesu akatuteraho ekyokurorraho ekitusemeriire kuhondera. (1 Pet. 2:21) Akatuteraho ekyokurorraho obuyakozeseze obwomeezi bwona kukora Ruhanga eby’agonza.​—Yoh. 4:34.

¹³ Obwoikiriza Baibuli eby’eyegesa hali Yesu kikuletera kugonza Omwana wa Ruhanga ow’omuhendo. Okugonza oku kukuletera kwekamba kukozesa obwomeezi bwawe kukora Ruhanga eby’agonza nka Yesu. Kandi kinu kikuletera kugonza kwehayo hali Yahwe n’okubatizibwa.

14-15. Mananu ki agarukukwata ha mwoyo ogurukwera ag’oyegere kandi waikiriza?

¹⁴ Okehurra ota obuwayegere amananu ganu agarukukwata ha omwoyo ogurukwera? Omwoyo ogurukwera tali ruhanga baitu maani ga Ruhanga. Yahwe akakozesa omwoyo ogurukwera kuterekereza abantu abahandiikire Baibuli kandi omwoyo gunu gutukonyera kwetegereza ebiturukuba tusomeremu n’okubiteeka omu nkora. (Yoh. 14:26; 2 Pet. 1:21) Yahwe akozesa omwoyo gwe kutuha “amani agali amaingi muno.” (2 Kol. 4:7) Omwoyo ogurukwera gutuha amaani ag’okutebeza amakuru amarungi, kurwanisa okwohebwa, kugarukwamu amaani, n’okugumira ebizibu. Kandi gutukonyera kwoleka emiringo enungi ‘ey’ekyana eky’omwoyo.’ (Bag. 5:22) Ruhanga aha omwoyo ogurukwera abo boona abamwesiga kandi abagumusaba kuruga ha mutima.​—Luk. 11:13.

¹⁵ Kanikitugarramu amaani kukimanya ngu  omwoyo ogurukwera nigusobora kukonyera abaheereza ba Ruhanga kumuheereza! Kakuba oikiriza amananu ag’oyegere agarukukwata ha mwoyo ogurukwera nikiija kukuletera kugonza kwehayo hali Ruhanga n’okubatizibwa.

16. Kusigikirra nambere twahika, bintu ki ebitwegere?

¹⁶ Obw’ocwamu kwehayo hali Ruhanga kandi okabatizibwa oba okozere encwamu ey’amaani muno. Nk’oku twegere, osemeriire kubanza kukora ‘embalirra’ ekirukumanyisa kubanza kumanya ebizibu eby’osobora kutunga hamu n’ebintu eby’oine kwefeereza. Baitu emigisa ey’oratunga niija kukirra hara ebintu byona ebyoraba oyeferiize. Kubatizibwa nikusobora kukujuna, kandi kukukonyere kutunga omuntu ow’omunda omurungi omu maiso ga Ruhanga. Ensonga enkuru ey’esemeriire kukuletera kubatizibwa nukwo okugonza okwoinire Yahwe Ruhanga. Kandi osemeriire kuba n’oikiriza n’omutima gwawe gwona amananu ag’oyegere agarukukwata hali Isiitwe, Omwana, hamu n’omwoyo ogurukwera. Hanyuma y’okutekerezaaho ebintu ebitubalizeeho, n’ogarukamu ota ekikaguzo kinu, “Nakahikire Ha Rulengo orw’Okubatizibwa?”

17. Bintu ki omuntu asemeriire kukora nukwo asobole kubatizibwa?

¹⁷ Obworaaba noyehurra ngu ohikire kubatizibwa, busaho kugurukyagurukya haroho bintu bingi eby’okozere kugumya enkoragana yaawe na Yahwe. * Kwega Baibuli kikukonyire kwega bingi ebirukukwata hali Yahwe, Yesu, n’okutunga okwikiriza. (Baheb. 11:6) Noyesigira kimu ebintu byona ebirungi Yahwe eby’aturaganiize omu Baibuli, kandi n’okigumya ngu ekicunguro kya Yesu nikisobora kukujuna kuruga omu kibi n’okufa. Oyegarukiremu ebibi byawe ekirukumanyisa ngu noyehurra kubi habw’ebintu ebibi ebiwakozere, kandi okasaba Yahwe akuganyire. Ohindwire obwomeezi bwawe; waleka engeso embi ezokaba oine kandi watandika kwetwaza omu mulingo Ruhanga arukusiima. (Eng. 3:19) Oine ekihika eky’okugambira abantu ebirukukwata ha kwikiriza kwawe. Okakurakurana wahika ha rulengo orw’okufooka omutebezi atakabatizibwe kandi watandika kutebeza hamu n’ekitebe. (Mat. 24:14) Yahwe nakugonza muno habwokuba okakora ebintu ebi. Osemiize muno omutima gwe.​—Nfu. 27:11.

18. Bintu ki ebindi eby’osemeriire kukora otakabatiziibwe?

¹⁸ Haroho ebintu bindi eby’osemeriire kukora otakabatizibwe. Nk’oku tusangirwe twegere, osemeriire kwehayo hali Ruhanga. Ekirukumanyisa kusaba Yahwe oli wenka kandi kuruga ha mutima, okamuraganiza kukozesa obwomeezi bwawe kukoraga eby’agonza. (1 Pet. 4:2) Hanyuma omanyise omuteraniza ow’akatebe ka bagurusi nk’oku nogonza kubatizibwa. Naija kugambira abamu h’abagurusi kutangatangana naiwe. Nyaburaiwe otahurra oyeralikiriire kutangatangana nabo. Oikale okimanyire ngu ab’oruganda banu abaine embabazi bakumanyire  kandi nibakugonza. Nibaija kurabamu naiwe enyegesa za Baibuli ezirukubandirizibwaho eziwayegere. Ekigendererwa kyabo kiri ky’okumanya obworaaba noyetegereza enyegesa ezo kandi n’obukuru obw’okwehayo hamu n’okubatizibwa. Obubarakigumya ngu ohikire kubatizibwa, nibaija kukumanyisa nk’oku nogenda kubatizibwa ha rusorrokano orukooto orurayongeraho.

19-20. Kiki eky’osemeriire kukora hanyuma y’okubatizibwa kandi nosobora ota kukikora?

¹⁹ Bintu ki eby’osemeriire kukora hanyuma y’okubatizibwa? * Ijuka ngu obw’oyehayo hali Yahwe, oba n’omuraganiza ngu noija kukora eby’agonza nahabweki abanakunihirramu kuhikiriza eky’oyeragire. Nahabweki hanyuma y’okubatizibwa, osemeriire kuhikiriza okweraga kwawe. Eki n’osobora kukikora ota?

²⁰ Ikara haihi n’ekitebe. Nk’Omukristaayo ow’abatiziibwe hati ofookere kicweka ky’oruganda orw’omu nsi yoona. (1 Pet. 2:17) Ab’oruganda n’abanyaanya itwe omu kitebe niyo ka yaawe ey’omwoyo. Kwikara nogenda omu nsorrokano butoosa, noija kweyongera kugumya enkoragana yaawe nabo. Soma Baibuli buli kiro kandi ogyecumitirizeeho. (Zab. 1:1, 2) Obw’oramaraga kugisoma, tunga obwire oburukumara kutekerezaaho eby’osomere. Nubwo ebigambo eby’osomere birahika ha mutima gwawe. Saba butoosa. (Mat. 26:41) Kusaba kuruga ha mutima nikiija kukukonyera kwirra haihi na Yahwe. Ikara ‘n’obanza kuserra Obukama bwe.’ (Mat. 6:33) Kinu nosobora kukikora kuraba omu kwebembeza omulimo ogw’okutebeza omu bwomeezi bwawe. Kutebeza butoosa, nikiija kukukonyera kwikara oine kwikiriza okugumire, kandi nosobora n’okukonyera abandi kutunga okunihira okw’obwomeezi obutahwaho.​—1 Tim. 4:16.

21. Migisa ki ey’oratunga obw’orabatizibwa?

²¹ Okwehayo n’okubatizibwa niyo ncwamu erukukirrayo kimu obukuru ey’osobora kukora omu bwomeezi bwawe. Ky’amananu ngu kugikora nikyetagisa kwefereza. Baitu obw’oragikora nikiija kukugasira! Okutalibana kwona okworarabamu hati “kwa kasumi kake kandi tikurukulemera.” (2 Kol. 4:17, NW) Baitu okubatizibwa kwawe nikwija kukukonyera kutunga obwomeezi obw’ekigendererwa hati n’okunihira okw’obwomeezi mali omu kasumi ak’omu maiso. (1 Tim. 6:19) Nahabweki, kitekerezeeho muno kandi osabe otakagarukiremu ekikaguzo kinu, “Nakahikire ha rulengo orw’okubatizibwa?”