EKICWEKA KY’OKWEGA 21
EKIZINA 107 Ekyokurorraho kya Ruhanga eky’Okugonza
Omulingo Osobora Kutunga ow’Orataaha Nauwe Obuswere
“Omukazi omwerinzi noha asobora okumuzora? Omuhendogwe nigukirra kimu obubale oburukutukura.”—NFU. 31:10.
EBITURAYEGA
Omu kicweka kinu nitwija kubazaaho emisingi ya Baibuli ey’esobora kukonyera Omukristaayo kutunga omuntu omurungi ow’arataaha nauwe obuswere n’omulingo abandi omu kitebe basobora kukonyera abo abarukugonza kutaaha obuswere.
1-2. (a) Bintu ki abatakataahire obuswere ebibasemeriire kutekerezaaho batakatandikire kujumbira? (b) “Kujumbira” nikimanyisa ki? (Rora “Kusoborra Ebigambo Ebimu.”)
WAKUGONDEZE kutaaha obuswere? N’obukiraaba ngu kutunga okusemererwa tikisigikirra ha kuba omu buswere, Abakristaayo baingi abataburumu baba n’ekihika ekyokutunga oubarataaha nauwe obuswere. Ky’amananu ngu otakatandikire kujumbira, osemeriire kuba n’enkoragana enungi na Yahwe, n’oyemanya kurungi, kandi obe oyetekaniize kurolerra eka yaawe omu byetaago ebirukwetagisa sente. a (1 Kol. 7:36) Obworaaba nosobora kuhikiriza ebintu binu, nikiija kukukonyera kuba n’obuswere oburumu okusemererwa.
2 Baitu tikyanguhire kutunga omuntu omurungi ow’okutaaha nauwe obuswere. (Nfu 31:10) Kandi n’obwokurora omuntu ouwakugondeze kujumbira, nabwo nikisobora kutakwanguhira kutandika kumujumbira. b Omu kicweka kinu nitwija kubazaaho ebintu ebisobora kukonyera Abakristaayo abatali omu buswere kutunga omuntu omurungi oubasobora kutaaha nauwe obuswere. Ekindi, nitwija kurora omulingo abandi omu kitebe basobora kusagika abo abarukugonza kutaaha obuswere.
KUTUNGA OMUNTU OMURUNGI OW’OKUTAAHA NAUWE OBUSWERE
3. Bintu ki Omukristaayo ebyasemeriire kutekerezaaho obwarukuba naserra ow’arataaha nauwe obuswere?
3 Obworaaba nogonza kutaaha obuswere, kirungi kumanya emiringo ey’orukugonza omu muntu ow’orataaha nauwe obuswere mutakatandikire kujumbirangana. Kitali eki nosobora kugurukya amaiso omuntu ayakubaire murungi kutaaha nauwe obuswere rundi nosobora kutandika kujumbira omuntu ow’atali murungi haliiwe. Ky’amananu ngu omuntu ow’osemeriire kutekerezaaho kujumbira asemeriire kuba Mukristaayo ow’abatiziibwe. (1 Kol. 7:39) Baitu tikiri ngu buli muntu wena ow’abatiziibwe naija kuba murungi w’okutaaha nauwe obuswere. Nahabweki wekaguze: Nyine bigendererwa ki omu bwomeezi? Miringo ki emikuru eyinakugondeze omuntu oundataaha nauwe obuswere kuba nayo? Ebindukumunihirramu bihinguraine?’
4. Bintu ki ebimu abamu ebibataire omu saara zaabo?
4 Obworaaba noserra ow’okutaaha nauwe omu buswere hataroho kugurukyagurukya osabire Yahwe kukukonyera. (Baf. 4:6) Ky’amananu ngu Yahwe taraganiza kuha omuntu wena ow’arataaha nauwe omu buswere. Baitu afaaho ebyetaago byawe n’enyehurra zaawe, kandi nasobora kukukonyera kutunga ow’orataaha nauwe omu buswere. Nahabweki gumizaamu nomugambira ebyetaago byawe n’omulingo orukwehurramu. (Zab. 62:8) Musabe akuhe amagezi n’okugumisiriza. (Yak. 1:5) Ow’oruganda omu arukwetwa John, c kuruga omu United States, kandi ow’atakataahire obuswere nagamba ati: “Ngambira Yahwe emiringo eindukugonza omu muntu oundataaha nauwe obuswere. Nsaba Yahwe kunkonyera kutangatangana omuntu ounsobora kutaaha nauwe obuswere. Ekindi, nsaba Yahwe kunkonyera kukurakuraniza emiringo eyerandetera kuba nyineka omurungi.” Munyaanya itwe Tanya, kuruga omu ihanga lya Sri Lanka, nagamba ati: “Obundiyo ninserra ow’okutaaha nauwe obuswere, nsaba Yahwe kunkonyera kwikara nyine entekereza enungi, kwikara ndi mwesigwa kandi nyine okusemererwa.” N’obworaaba otatungire omuntu ow’okutaaha nauwe obuswere ahonaaho, Yahwe naraganiza kwikara nakurolerra omu by’omubiri n’omu nyehurra.—Zab. 55:22.
5. Nidi Abakristaayo abatakataahire obuswere basobora kutangatangana abandi abatakataahire obuswere abarukugonza Yahwe? (1 Abakolinso 15:58) (Rora n’ekisisani.)
5 Baibuli netutererra ‘kwekambaga butoosa omu mirimo ya Mukama.’ (Soma 1 Abakolinso 15:58.) Obworaikara oine bingi eby’okukora omu kuheereza Yahwe kandi okamara obwire n’ab’oruganda na banyaanya itwe abarukwahukana, torukwija kwegondeza omu kuba n’abanywani abarungi kyonka baitu noija n’okutunga emigisa ey’okutangatangana abandi abatakatahire obuswere nkaiwe kandi abataire omutima ha kuheereza Yahwe. Kandi obworakora kyona ekirukusoboka kusemeza Yahwe, noja kutunga okusemererwa kwonyini.
Kakuba oikara oine bingi eby’okukora omu kuheereza Yahwe kandi okamara obwire n’Abakristaayo abarukwahukana, n’osobora kutangatangana Abakristaayo abarukugonza kutaaha obuswere (Rora akacweka 5)
6. Kiki Abakristaayo abarukuserra ow’okutaaha nauwe obuswere ekibasemeriire kwijuka?
6 Baitu wetantale kwebembeza muno kuserra ow’orataaha nauwe obuswere. (Baf. 1:10) Kuba n’okusemererwa kwonyini tikisigikirra ha kuba omu buswere rundi okutabubamu, baitu kisigikirra ha kuba n’enkoragana enungi na Yahwe. (Mat. 5:3) Kandi obw’oba otakataahire obuswere, oba n’omugisa ogw’okwongera ha buheereza bwawe. (1 Kol. 7:32, 33) Kozesa kurungi obwire obworamara otakataahire obuswere. Munyaanya itwe Jessica, kuruga omu United States ayataahire obuswere obwakaba ali haihi kuhikya emyaka 40 nagamba ati, “Naikaraga nyine bingi eby’okukora omu buheereza, kandi eki kikankonyera kuba n’okumarwa n’obukiraaba ngu nkaba ningonza kutaaha obuswere.”
LENGAHO KUMANYA OMUNTU OGU
7. Habwaki ky’amagezi kwetegereza omuntu ow’orukurora ngu ahikire kutaaha nauwe obuswere otakamugambiire omulingo orukwehurra? (Enfumo 13:16)
7 Kiki eky’osemeriire kukora kakuba oba norora ngu omuntu nasobora kuba murungi kutaaha nauwe obuswere? Osemeriire kumugambira ahonaaho omulingo orukwehurra? Baibuli egamba ngu omuntu owamagezi abanza kwetegereza atakagizire ekiyakora. (Soma Enfumo 13:16.) Nahabweki ky’amagezi kubanza kwetegereza omuntu ow’orukugonza kujumbira otakamugambiire omulingo orukwehurra. Aschwin kuruga omu ihanga lya Netherlands nagamba ati, “Ahonaaho nosobora kutunga enyehurra baitu kandi nizongera nizihwaho bwangu bwangu. Nahabweki kakuba otwara obwire kwetegereza omuntu, torukwija kwanguhiriza kumujumbira nosigikirra ha mulingo orukwehurra kasumi ako.” Ekindi, kakuba omara obwire nomwetegereza, nosobora kukirora ngu tali murungi w’okutaaha nauwe omu buswere.
8. Omukristaayo atali omu buswere n’asobora ata kwetegereza omuntu ow’arukurora ngu ahikire kutaaha nauwe obuswere? (Rora n’ekisisani.)
8 Nosobora kwetegereza ota omuntu omu mulingo ogw’amagezi? Obumurukuba muli omu nsorrokano rundi mugenzere kwesemezaamu n’ab’oruganda, nosobora kwetegereza enyetwaza n’engeso z’omuntu ogu kandi oyetegereze obwaraaba ali w’ebyomwoyo. Banywani be nubo baha kandi bintu ki ebyakira kubazaaho? (Luk. 6:45) Mwine ebigendererwa ebirukusisana? Nosobora n’okubazaaho n’abagurusi ab’omu kitebe kye rundi Abakristaayo abakuzire omu by’omwoyo abarukumumanya kurungi. (Nfu. 20:18) Nosobora kubakaguza ha nyetwaze ye n’emiringo ye. (Rus. 2:11) Obworaaba nolengaho kumwetegereza, wetantale kumuleetera kwehurra atatekaine. Eki nosobora kukikora kuraba omu kuteekamu ekitiinisa enyehurra ze n’okutataahirra obugabe bwe.
Otakoolekere omuntu ngu n’omugonza, banza omwetegereze kumara akasumi (Rora akacweka 7-8)
9. Otakagambiire omuntu omulingo orukwehurra, kiki eky’osemeriire kubanza kugumya?
9 Osemeriire kumara kasumi ki noyetegereza omuntu otakamugambiire omulingo orukwehurra? Kakuba oyanguhiriza kumugambira omulingo orukwehurra nasobora kutekereza ngu oyanguhiriza kukora encwamu. (Nfu. 29:20) Harubaju orundi, kakuba akyetegereza ngu n’omugonza baitu otwaire obwire bwingi kumugambira n’asobora kuteekereza ngu oikaraho kukora encwamu. (Mug. 11:4) Ijuka ngu otakahikiriire omuntu, tikirukukwetaagisa kukigumya ngu nuwe orukwija kutaaha nauwe omu buswere. Baitu osemeriire kukigumya ngu ohikire kutaaha obuswere kandi ngu omuntu ogu nasobora kuba nuwe ahikire ow’okutaaha nauwe omu buswere.
10. Kiki eky’osemeriire kukora kakuba okyetegereza ngu omuntu nakugonza baitu iwe otarukumugonza?
10 Kiki eky’osemeriire kukora kakuba okyetegereza ngu omuntu nakugonza? Obworaaba otarukugonza kumujumbira, lengaho kukimwoleka kuraba omu bikorwa. Tikiri ky’embabazi kuleetera omuntu ogu kutekereza ngu n’omugonza kandi kunu tinukwo kiri.—1 Kol. 10:24; Bef. 4:25.
11. Omu bicweka nambere abantu baserurra abatali omu buswere ab’okubutaahamu nabo, bintu ki ebibasemeriire kutekerezaaho?
11 Omu bicweka ebimu, abazaire rundi abantu abakuzire nubo baserurra abanyabuzaale baabo abatali omu buswere omuntu oubarataaha nauwe obuswere. Baitu omu bicweka ebindi, abanywani rundi abanyabuzaale baserurra abo abatakatahire obuswere kandi bakorra abantu abo entekaniza ez’okutangatangana kurora obubaraaba basemeriirengana. Kakuba osabwa kukonyera abantu kujumbirangana rundi kutaaha obuswere, tekerezaaho ebyetaago bya buli muntu. Obworaaba norora ngu nasobora kuba ahikire kutaaha nauwe obuswere lengaho kumanya omuntu ogu kurungi nk’emiringo ye, kandi ekirukukirayo obukuru obwaraaba aine enkoragana enungi na Yahwe. Kuba n’enkoragana enungi na Yahwe nikyo kirukukirayo obukuru kukira kuba na sente, obwegese, rundi ebitiinisa. Baitu kiijuke ngu ow’oruganda rundi munyaanya itwe asemeriire kwecweramu obwaraba nagonza kutaaha obuswere.—Bag. 6:5.
OMULINGO OSOBORA KUTANDIKA KUJUMBIRA
12. Obworaaba n’ogonza kutandika kujumbira omuntu, nosobora ota kumugambira?
12 Obworaaba nogonza kutandika kujumbira omuntu, nosobora ota kumugambira omulingo orukwehurra? d Nosobora kukora entekaniza ey’okubaza n’omuntu ogu muli omu bantu baingi rundi ha simu. Mugambire omulingo gwonyini ogw’orukwehurra kandi ngu wakugondeze kweyongera kumumanya. (1 Kol. 14:9) Obukiraaba nikyetaagisa, muhe obwire obwokutekerezaaho ekyarakugarukamu. (Nfu. 15:28) Kandi omuntu obwaraaba atarukugonza kutandikaho enkoragana eyembaganiza naiwe, teekamu ekitiinisa enyehurra ze.
13. Kiki eky’osobora kukora kakuba omuntu akugambira ngu nakugonza? (Abakolosai 4:6)
13 Kiki eky’osemeriire kukora, kakuba omuntu akugambira omulingo arukwehurramu? Nikisobora kuba kitanguhiire omuntu ogu kukugambira omulingo arukwehurra, nahabweki mutekemu ekitiinisa kandi omutwaze omu mulingo ogw’embabazi. (Soma Abakolosai 4:6.) Obworaaba noyetaaga obwire kukitekerezaaho, mugambire. Baitu, otatwara obwire bwingi kumugarukamu. (Nfu. 13:12) Obworaaba otarukumugonza, kibaze omu mulingo ogw’embabazi kandi ogurukwetegerezebwa kurungi. Wetegereze ow’oruganda arukwetwa Hans kuruga omu Austria ekiyagambiire munyaanya itwe obuyamugambiire omulingo arukwehurra, nagamba ati, “Nkamugambira encwamu yange omu mulingo ogw’amagezi kandi ogurukwetegerezebwa kurungi. Nkakikora ahonaaho habwokuba nkaba ntarukugonza aikale natekereza ngu nitusobora kujumbirangana. Baitu nabwo naikaraga ninyegendereza omulingo nabazaamuga nauwe hanyuma y’okumugambira enyehurra yange, nukwo atatekereza ngu ninsobora kuhindura entekereza yange.” Harubaju orundi, obworaaba nogonza mutandike kujumbirangana n’omuntu ogu, mubazeeho ebintu ebimurukunihira kukora obumuraaba nimujumbirangana. Ebimurukunihirramungana nibisobora kwahukana kusigikirra ha kiikaro nambere buli omu yakuliire rundi habw’ensonga ezindi.
ABANDI NIBASOBORA BATA KUSAGIKA ABATAKATAAHIRE OBUSWERE?
14. Nitusobora tuta kukozesa ebigambo byaitu kusagika Abakristaayo abatali omu buswere?
14 Itwena nitusobora tuta kusagika Abakristaayo abatali omu buswere abarukugonza kubutaaha? Omulingo gumu ogutusobora kukikoramu nukwo kwegendereza ebiturukubaza. (Bef. 4:29) Nitusobora kwekaguza: ‘Mbaza ebigambo ebirukusaaliza rundi ebirukusindikiriza abatali omu buswere kubutaaha? Obundora ow’oruganda na munyaanya itwe abatali omu buswere nibabaza, nkira kutekereza ngu nibagonzangana omu mulingo ogw’embaganiza?’ (1 Tim. 5:13) Ekindi, titusemeriire kuleetera Abakristaayo abatali omu buswere kwehurra oti rundi baine ekibarukuburwaho habw’okutaba omu buswere. Hans, outusangirwe tubalizeeho nagamba ati: “Ab’oruganda na banyaanya itwe abamu bakira kungambira bati, ‘Habwaki otaswera? Emyaka kayakusiga.’ Ebigambo nk’ebi bireetera abatali omu buswere kwehurra ngu tibarukusiimwa kandi nikisobora kwongera ha kusindikirizibwa okubaine okw’okutaaha obuswere.” Mali kirungi kuserra emigisa ey’okusiima Abakristaayo abatali omu buswere!—1 Bas. 5:11.
15. (a) Kusigikirra ha Abarumi 15:2, kiki ekitusemeriire kutekerezaaho tutakakonyiire omuntu kutunga ow’arataaha nauwe obuswere? (Rora n’ekisisani.) (b) Masomo ki amakuru agoyegere kuruga omu vidiyo?
15 Kiki ekitusemeriire kukora kakuba turora ngu ow’oruganda na munyaanya itwe basemeriirengana? Baibuli etutererra kutekerezaaho enyehurra z’abandi. (Soma Abarumi 15:2.) Baingi abatali omu buswere tibagonza omuntu ondi kubaserurra oubarataaha nauwe obuswere kandi tusemeriire kutekamu ekitiinisa encwamu zaabo (2 Bas. 3:11) Baitu abandi nibasobora kugonza tubakonyere, baitu titusemeriire kukikora batatusabire obukonyezi. e (Nfu. 3:27) Kandi abandi tibagonza kubagambira ekyokukora. Munyaanya itwe owatali omu buswere arukwetwa Lydia, kuruga Germany, nagamba ati: “Nosobora kuraaliza ow’oruganda na munyaanya itwe kweteranizaaho guruupu y’abantu abandi ab’oraaliize. Bahe omugisa ogw’okumara hamu obwire kandi ebindi obibalekere.”
Guruupu y’abantu abaingi eha omugisa Abakristaayo abatakataahire obuswere kutangatangana (Rora akacweka 15)
16. Kiki Abakristaayo abatakataahire obuswere ekibasemeriire kwijuka?
16 Itwena katube tuli omu buswere rundi tutaburumu, nitusobora kuba n’obwomeezi oburumu okusemererwa! (Zab. 128:1) Nahabweki obworaaba n’ogonza kutaaha obuswere baitu otakatungire omuntu ow’okubutaaha nauwe, gumizaamu n’oteeka omutima ha kuheereza Yahwe. Munyaanya itwe ow’arukwetwa Sin Yi kuruga Macao nagamba ati: “Kakuba olengesaniza akasumi ak’osobora kumara n’omugonzebwa waawe omu Rugonjo Orurungi, akasumi ak’omara otakataahire obuswere kagufu muno. Wegondeze omu kasumi ako kandi okakozese kurungi.” Baitu kakuba oba otungire omuntu ow’orukugonza kutaaha nauwe obuswere kandi mutandikire kujumbirangana? Omu kicweka ekirukuhonderaho nitwija kubazaaho omulingo musobora kuba n’okujumbirangana okuraabakonyera kukora encwamu enungi.
EKIZINA 137 Abakazi Abesigwa
a Kukukonyera kumanya obworaaba oyetekaniize, rora ekicweka ekiri ha jw.org ekiine omutwe “Dating—Part 1: Am I Ready to Date?”
b KUSOBORRA EBIGAMBO EBIMU: Omu kicweka kinu n’ekirukuhonderaho, “kujumbira” nikimanyisa akasumi nambere omusaija n’omukazi bamanyangana kurungi nukwo barole obubaraaba nibasobora kutaaha hamu omu buswere. Omu mahanga agamu nikisobora kumanyisa kumanya omuntu rundi kumugonza omu mulingo ogw’embaganiza. Kujumbirangana kutandika omusaija n’omukazi obubagambirangana ngu nibagonzangana omu mulingo ogw’embaganiza kandi kugumizaamu kuhikya obubacwamu kutaaha obuswere rundi kuleka kujumbirangana.
c Amabara agamu gahindwirwe.
d Omu biikaro ebimu, ow’oruganda nuwe akira kuhikirra munyaanya kutandika kujumbirangana. Baitu nabwo munyaanya itwe nauwe n’asobora kuhikirra ow’oruganda. (Rusi 3:1-13) Kumanya ebirukukiraho, rora ekicweka “Young People Ask . . . How Can I Tell Him How I Feel?” ekiri omu Awake! eya Okitobba 22, 2004.
e Rora vidiyo ha jw.org enyakwine omutwe Abasoboire Kuba Basinguzi omu Kurwanirra Okwikiriza—Abakristaayo Abatali omu Buswere
