Ŵakaboni ŵa Yehova ŵang’anamura mabuku ghakulongosora Baibolo na vinyake mu viyowoyero vyakujumpha 900. Ntchipusu yayi kuchita mulimo wa kung’anamura. Kweni kung’anamura mu chiyowoyero cha mawoko ndiko nkhwakusuzga chomene. Ŵanthu ŵanandi ŵakumangwa ŵakugwiliskira ntchito maso, mawoko na chisko pakuyowoyeskana. Ntheura awo ŵakung’anamura mu chiyowoyero cha mawoko ŵakung’anamura mazgu ghakulembeka kuti ghaŵe vidiyo. Munthowa iyi, Ŵakaboni ŵang’anamura vinthu vyakulongosora Baibolo mu viyowoyero vya mawoko vyakujumpha 90.

Nga umo viliri na Ŵakaboni ŵa Yehova wose awo ŵakuchita mulimo wakung’anamura, awo ŵakung’anamura mu chiyowoyero cha mawoko nawo ŵakuchimanya makora chiyowoyero ichi. Ŵanandi mbakumangwa ndipo ŵakamba kuyowoyera mawoko kufuma pa wanichi, ndipo ŵanyake ŵakakhalanga na ŵabali ŵawo awo mbakumangwa. Awo ŵakung’anamura ŵakutemwaso chomene kusambira Baibolo.

Awo mbasono ŵakusambizgika dankha umo ŵangang’anamulira. Mwachiyelezgero, Andrew uyo wakuchitako mulimo wakung’anamura wakuti: “Nangauli nkhasambira sukulu ya ŵakumangwa apo nkhaŵa mwana ndipo nkhamanyanga kale chiyowoyero cha mawoko, kweni ivyo ŵakanisambizga vyanovwira chomene kumanya malango gha chiyowoyero ichi. Awo nkhugwira nawo ntchito ya kung’anamura ŵakanisambizga umo ningendeskera makora mawoko, chisko, na thupi lane kuti fundo zipulikikwe makora.”

Awo ŵakung’anamura ŵakugwilira pamoza ntchito. Waliyose pa timu wakuchitako chigaŵa chake; wangang’anamura, kuwona usange ivyo vyalembeka ndivyo vikuyowoyeka nadi ku Chingelezi, panji kuwona usange ivyo vyalembeka vikupulikikwa makora. Kufuma apo, usange ntchamachitiko, ŵakuchema ŵanthu ŵakumangwa kufuma mu malo ghakupambana kuti ŵendemo ivyo vyang’anamulika. Ivyo ŵanthu aŵa ŵayowoyapo vikovwira kuti ŵanozge apo mphakukhumbikwa. Ivi vikovwira kuti kendeskero ka mawoko na mawonekero gha chisko viŵe vyakawiro kweniso kuti uthenga wa mu vidiyo uŵe waunenesko na wakupulikikwa makora.

Kanandi awo ŵakung’anamura mu chiyowoyero cha mawoko, ŵakuwungana na mipingo ya viyowoyero vya mawoko. Chinyake ntchakuti ŵakusambira Baibolo na ŵanthu ŵakumangwa awo Mbakaboni yayi. Ivi vikuŵawovwira kuti nyengo zose ŵamanyenge umo ŵanthu ŵakuyowoyera.

Baibolo likuti ŵanthu ŵa “mitundu yose na mafuko na ŵanthu na viyowoyero” ŵazamupokelera uthenga wake wakupembuzga na wakupa chigomezgo. (Chivumbuzi 7:9, mazgu ghamusi) Ŵanyake mwa ŵanthu aŵa ni awo ŵakuyowoya chiyowoyero cha mawoko.

Awo ŵakung’anamura mbakukondwa kuti ŵakugwiliskira ntchito nyengo na maluso ghawo pa ntchito yakuzirwa iyi. Tony uyo wakuchitako mulimo uwu wakuti: “Pakuti ndine wakumangwa, nkhumanya masuzgo agho ŵakumangwa ŵanyane ŵakusangana nagho. Nakuti khumbo lane ndakuti nichite chilichose icho ningafiska kuti novwire ŵakumangwa ŵanandi kumanya unenesko wa mu Baibolo.”

Amanda, uyo nayo wakuchitako mulimo wakung’anamura mu chiyowoyero cha mawoko, wakuti: “Sono nkhuwona kuti nkhuchita ntchito yakuzirwa chomene kuluska ntchito iyo nkhagwiranga kumasinda chifukwa nkhung’anamura uthenga wa mu Baibolo mu chiyowoyero cha ŵanthu ŵakumangwa.”

Kachigaŵa kakuti “Find Sign-Language Content” kamovwiraninge kuti musange mavidiyo mu chiyowoyero cha mawoko pa webusayiti ya jw.org.