Mu vigaŵa ivyo ŵanthu ŵakuyowoya Chifurenchi kumafumiro gha dazi kwa Canada, ŵanthu ŵanandi ŵakumangwa ŵakugwiliskira ntchito Chiyowoyero cha Mawoko cha ku Quebec (LSQ). * Pakuti mu vigaŵa ivi ŵanthu ŵakumangwa ŵalimo 6,000 pera, pali mabuku ghachoko waka gha mu LSQ. Ndipouli, pakukhumba kovwira ŵanthu kuti ŵapulikiske Baibolo, Ŵakaboni ŵa Yehova ŵaŵikapo mtima kupanga mabuku ghawemi chomene gha mu LSQ agho ŵakupeleka kwa ulere.

Nkhani ya Marcel yikutovwira kumanya kuti ntchito yakung’anamura mabuku mu chiyowoyero ichi njakuzirwa chomene. Wakababika mu 1941 ku Quebec, Canada. Wati wafika vyaka viŵiri wakasangika na nthenda ya meningitis ndipo makutu ghake ghaleka kupulika. Marcel wakuti: “Apo nkhaŵa na vyaka 9, nkhamba kuluta ku sukulu ya ŵakumangwa, ndipo ndiko nkhasambira LSQ. Nangauli pakaŵa mabuku ghanyake ghakusambizgira chiyowoyero cha mawoko, kweni pakaŵavya mabuku gha mu chiyowoyero ichi.”

Chifukwa wuli ntchakukhumbikwa kupanga mabuku mu LSQ? Marcel wakuti: “Ŵanthu ŵakumangwa ŵakukhumba kupulika uthenga mu chiyowoyero icho ŵakuchipulikiska makora ndipo ŵakutemwa yayi kuti ŵasuzgikenge na chiyowoyero chinyake. Pakuti tikaŵavya mabuku gha LSQ, tikagomezganga viyowoyero vinyake—ndipo vinandi vikatijumphanga!”

Pakukhumba kovwira ŵanthu nga ni Marcel, Ŵakaboni ŵa Yehova ŵakafumiska buku lawo lakwamba mu LSQ mu 2005. Mwasonosono apa, ŵali kusanuzga ofesi yawo yakung’anamulirako mabuku ya ku Montreal, Quebec. Pa ofesi iyi sono pali ŵanthu 7 awo ŵakugwira mazuŵa ghanandi kweniso ŵanyake ŵakujumpha 12 awo ŵakugwira mazuŵa ghachoko waka. Ŵanthu awo ŵakugwira ntchito yakung’anamura aŵa ŵali kugaŵika magulu ghatatu ndipo ŵali na situdiyo yiwemi iyo ŵakujambuliramo mavidiyo gha mu LSQ.

Ŵanthu awo ŵakuyowoya LSQ ŵakuwonga chomene Ŵakaboni ŵa Yehova chifukwa cha mabuku ghawemi agho ŵakupanga. Stéphan Jacques, wachiŵiri kwa mulara wa wupu wa Association des Sourds de l’Estrie, * wakuti: “Nkhuwona kuti mabuku na mavidiyo ghawo ghakupangika makora chomene. Ŵakugwiliskira ntchito vimanyikwiro vyambura kusuzga kupulikiska kweniso umo ŵakuchitira na visko vyawo vikovwira kuti munthu wamanye luŵiro ivyo vikuyowoyeka. Chinyake ntchakuti, awo ŵakuwoneka mu mavidiyo agha ŵakuvwara makora chomene.”

Magazini ya Gongwe la Mulinda, iyo Ŵakaboni ŵa Yehova pa charu chose ŵakugwiliskira ntchito pa maungano ghawo, sono yikusangika mu LSQ ndipo yikovwira Ŵakaboni ŵa Yehova 220 na ŵanyake awo ŵakuwungana na mipingo 7 ya LSQ kweniso magulu gha chiyowoyero ichi mu Quebec. * Chinyake ntchakuti, Ŵakaboni ŵakulutilira kupanga mavidiyo ghanyake ghanandi mu LSQ agho ghakusangika pa intaneti, kweniso sumu izo zili na uthenga wa mu Baibolo.

Marcel, uyo tamuzunura kukwambilira, ngwakukondwa kuti sono pali mabuku ghanandi mu LSQ. Wakuwonga chomene mabuku agho ghakupangika na Ŵakaboni ŵa Yehova. Iyo wakuti: “Ntchakukondweska chomene kuwona unandi wa mavidiyo gha LSQ agho ghali pa jw.org. Para nkhuwona vinthu vyose ivyo vikusangika mu chiyowoyero chane, nkhukondwa chomene!”