Pa charu chose pali ŵanthu pafupifupi 1.5 miliyoni awo ŵakugwira ntchito mu sitima zapamaji. Pakuti ŵantchito aŵa ŵakukhala pa malo ghamoza yayi, kasi Ŵakaboni ŵa Yehova ŵangaŵaphalira wuli makani ghawemi gha mu Baibolo? Para sitima yafika pa jiti, Ŵakaboni ŵa Yehova awo ŵali kusambizgika makora, ŵakusambizga Baibolo kwaulere ŵalaraŵalara kweniso ŵantchito ŵanyake ŵa mu sitima mu chiyowoyero icho ŵakhumba.

Kasi ivi vyawovwira wuli? Kaboni wa Yehova munyake uyo wakajipeleka kukapharazga pa jiti la Vancouver, ku Canada, zina lake Stefano, wakati: “Ŵanthu ŵanyake ŵakughanaghana kuti awo ŵakugwira ntchito mu sitima mbakusuzga chomene. Kweni ni wose yayi, ŵanandi mbakujiyuyura kweniso mbakukhumbisiska kusambira. Nakuti ŵanandi ŵakugomezga kuti Chiuta waliko ndipo ŵakukhumba kuti waŵatumbike, so ŵakutipokelera makora chomene.” Pakati pa September 2015 na August 2016 ku Vancouver pera, Ŵakaboni ŵa Yehova ŵakazomerezgeka kupharazga mu sitima maulendo ghakujumpha 1,600. Ŵantchito aŵa ŵakapoka mabuku ghanandi chomene mu viyowoyero vyakupambanapambana, ndipo ŵakujumpha 1,100 ŵakamba kusambira Baibolo.

Ŵakaboni ŵa Yehova ŵakusangika mu majiti ghanandi pa charu chose. Ntheura ntchipusu kuti awo ŵakugwira ntchito mu sitima ŵalutilire kusambira Baibolo na Ŵakaboni ŵa Yehova para ŵafika pa jiti yinyake. Mwachiyelezgero, mu May 2016, Ŵakaboni ŵa Yehova ku Vancouver ŵakapharazgira Warlito, uyo ni mulara wa ŵakuphika mu sitima yinyake yakunyamura katundu. Ŵakamulongora vidiyo ya Chifukwa Wuli Mukwenera Kusambira Baibolo? ndipo ŵakamba kusambira nayo Baibolo mu kabuku ka Chiuta Wakutiphalira Uthenga Uwemi! Warlito wakakondwa chomene na ivyo wakasambira, ndipo wakakhumbanga kulutilira kusambira Baibolo. Ndipouli, sitima yawo yikaŵa kuti yamuyimaso pa jiti la Paranaguá, ku Brazil, kutali chomene na jiti la Vancouver.

Warlito wakafika pa jiti la Paranaguá pati pajumpha mwezi. Kweni wakazizwa chomene kuti Ŵakaboni ŵa Yehova ŵaŵiri ŵa ku Brazil ŵakiza kuzakamupenja mu sitima uku ŵakuzunura zina lake! Iwo ŵakati Ŵakaboni ŵa Yehova ŵanyawo ku Vancouver ndiwo ŵakaŵamanyiska kuti wakukhumba kulutizga kusambira Baibolo. Warlito wakakondwa kusangana na Ŵakaboni ŵa Yehova aŵa, ndipo wakawonga chomene ndondomeko iyo yikaŵapo kuti walutilire kusambira. Iyo wakazomera kuti wamulutizga kusambira Baibolo para wafika pa jiti lakulondezgapo.