Nkhababikira mu banja la Chikatolika ku Rochester, New York. Ŵapapi ŵane ŵakalekana apo ine nkhaŵa na vyaka 8. Ntheura mukati mwa sabata nkhakhalanga na amama ku chigaŵa chinyake cha ŵanthu ŵakavu ndipo pa Chisulo na Sabata nkhakhalanga na adada ku chigaŵa chinyake cha ŵanthu ŵasambazi. Nkhati nawona umo amama ŵakasuzgikiranga kuti ŵatilere taŵana 6, nkhakhumbanga chomene kuti niŵe musambazi mwakuti nizakawovwire banja lakwithu.

 Adada ŵane ŵakakhumbanga kuti niŵe na umoyo uwemi, ntheura ŵakawona kuti nilute ku sukulu yapachanya yakusambizga vyakuwonelera mahotelo. Nkhakondwa chomene mwakuti nkhayambapo sukulu iyi, ndipo nkhaghanaghananga kuti Chiuta wakuzgora lurombo lwane lwakuti nisambazge na kuŵa wakukondwa. Nkhasambira ntchito yakuwonelera mahotelo, malango ghakukhwaskana na bizinesi, kweniso nkhalaŵiliranga chuma cha makampani kwa vyaka 5 uku nkhugwira ntchito pa hotelo yinyake iyo yikaŵa na malo ghakuchitirako njuga ku Las Vegas, Nevada.

 Apo nkhaŵa na vyaka 22, nkhaŵa wachiŵiri kwa bwana wa pa hotelo yinyake. Ŵanthu ŵakawonanga kuti ndine musambazi kweniso wakukondwa. Kanandi nkharyanga chakurya chiwemi chomene kweniso nkhamwanga moŵa na vinyo wakudura chomene. Ŵanyane awo nkhagwiranga nawo ntchito ŵakatemwanga kuniphalira kuti, “Mtima wako wose uŵenge pa ndalama chifukwa ntchinthu chakuzirwa chomene pa charu chose chapasi.” Iwo ŵakawonanga kuti ndalama ndizo zikovwira munthu kuŵa wakukondwa.

 Ntchito yane yikasazgangapo kupelekera vyakurya ku ŵanthu ŵasambazi chomene awo ŵakizanga kuzakatchova njuga ku Las Vegas. Nangauli wuli ŵanthu aŵa ŵakaŵa ŵasambazi chomene kweni ŵakawonekanga ŵambura kukondwa. Naneso nkhamba kuŵa wambura kukondwa. Ntheura apo nkhamba kusanga ndalama zinandi chomene, ndipo nkhamba kwenjerwaso chomene na kuleka kugona tulo makora. Nkhamba kughanaghana vya kujikoma waka. Ntheura vinthu vikati vyafika paheni nkhalomba Chiuta na kumufumba kuti, “Kasi ni nkhu uko ningasanga chimwemwe chanadi?”

 Panyengo iyi, ŵadumbu ŵane ŵaŵiri awo ŵakaŵa Ŵakaboni ŵa Yehova ŵakasamukira ku Las Vegas. Nangauli nkhakananga kupokera mabuku ghawo, kweni nkhazomeranga kuti tiŵerengerenge lumoza Baibolo lane. Mu Baibolo lane, mazgu ghose agho Yesu wakayowoya ghakaŵa mu malemba ghaswesi. Pakuti nkhazomerezganga chilichose icho Yesu wakayowoya, ŵadumbu ŵane ŵakayowoyanga nane vinthu vyekha ivyo Yesu wakayowoya. Para nili nekha nkhaŵerengangaso Baibolo.

 Vinthu vinandi ivyo nkhaŵerenga vikanizizika chomene. Mwachiyelezgero, Yesu wakati: “Para mukuromba, mungawerezgangawerezganga mazgu nga ndi umo ŵakuchitira ŵamitundu. Chifukwa ŵakughanaghana kuti ŵati ŵapulikikwe chifukwa cha mazgu ghawo ghanandi.” (Mateyu 6:7, Mazgu gha Chiuta mu Kang’anamuliro Kaphya) Kweni wasembe munyake, wakanipa chithuzi cha Yesu na kuniphalira kuti para ningalomba ku chithuzi ichi na kuwerezgawerezga malurombo gha Fumu kwa maulendo 10 kweniso kuyowoya malurombo ghakuchindika Mariya maulendo 10, mbwenu Chiuta wanipenge ndalama zilizose izo ningakhumba. Kweni nkhawona kuti para niyowoyenge kanandinandi malurombo agha, asi mbwenu ndikuti nkhuwerezgawerezga waka mazgu? Kweniso nkhaŵerenga mazgu gha Yesu ghakuti: “Mureke kumuchema munthu waliyose pano pasi kuti ‘Ŵadada,’ chifukwa muli na Wiskemwe yumoza pera uyo wali kuchanya.” (Mateyu 23:9, Mazgu gha Chiuta mu Kang’anamuliro Kaphya) Ntheura nkhajifumba kuti, ‘Chifukwa wuli ine na Ŵakatolika ŵanyane tikuchema ŵasembe ŵithu kuti “Dada”?’

 Maghanoghano ghane ghakukhwaskana na ivyo vingawovwira munthu kuŵa wakukondwa ghakasintha nati naŵerenga Buku la Yakobe. Mu chaputara 4, Yakobe wakalemba kuti: “Kasi mukumanya chara kuti kukorana ubwezi na charu mburwani na Chiuta? Ntheura, munthu uyo wakukorana ubwezi na charu, wakujizgora murwani wa Chiuta.” (Yakobe 4:4, Mazgu gha Chiuta mu Kang’anamuliro Kaphya) Fundo iyo yikanikhwaska chomene ni iyo yili mu vesi 17: “Usange munthu wakumanya icho nchiweme kuchita, kweni wakureka kuchichita, wakwananga.” Ntheura nkhaŵachema ŵadumbu ŵane na kuŵaphalira kuti nkhukhumba kuleka ntchito ku hotelo iyo nkhugwira chifukwa ku malo agha kukuchitika vinthu viheni nga njuga kweniso uryezi.

 Nkhakhumbanga kuti niŵe paubwezi uwemi na Chiuta, ŵapapi ŵane, kweniso ŵabali ŵane. Ntheura nkhawona kuti nisinthe mwakuti nikhalenge umoyo wambura kukhumba vinandi. Kweni kuti nisinthe chikaŵa chipusu yayi. Mwachiyelezgero, ku hotelo uko nkhagwiranga ŵakaniphalira kuti ŵanikwezgenge udindo ndipo ndalama izo nipokerenge ziŵenge zinandi chomene maulendo ghaŵiri panji ghatatu kujumpha pa ndalama izo nkhapokeranga kale. Kweni nati nayilombera nkhani iyi, nkhawona kuti nkhwenera kukana udindo uwu. Nkhaleka ntchito na kwamba kukakhala mu galaja ya amama, ndipo nkhamba kabizinesi kachoko waka kakunozga mamenyu gha mu maresitiranti.

 Nangauli Baibolo likanovwira kuti nimanye vinthu vyakuzirwa chomene pa umoyo kweni nkhaŵa kuti nindambe kuluta ku maungano gha Ŵakaboni ŵa Yehova. Ŵadumbu ŵane ŵakanifumba usange pali chifukwa icho nkhaŵatinkhiranga Ŵakaboni. Nkhazgora kuti: “Ntchifukwa chakuti Chiuta winu, Yehova, wakupangiska kuti mabanja ghaŵe ghakugaŵikana. Nyengo yekha iyo ningachezga makora na ŵabali ŵane mpha Khisimasi na pa nyengo iyo tikukondwelera mazuŵa ghakubabikira, kweni imwe mukukondwelerako yayi.” Yumoza mwa ŵadumbu ŵane wakamba kulira na kunifumba kuti: “Kasi mazuŵa ghose gha pa chaka mukuŵa nkhu? Ise ndise ŵakunozgeka kuchezga namwe nyengo yiliyose. Kweni imwe mukuchichizgika waka kuti mwizenge pa mazuŵa gha maholide ghekha.” Mazgu agho wakayowoya, ghakanikhwaska chomene mwakuti nane nkhamba kulira.

 Nkhawamo kuti nkhaŵamanyanga makora yayi Ŵakaboni ŵa Yehova, iwo ŵakutemwa chomene mbumba zawo. Ntheura nkhaghanaghana kuti nilute ku maungano ghawo ku Nyumba ya Ufumu. Nati nafika, nkhakumana na Kevin uyo wakamanyanga makora kusambizga munthu Baibolo ndipo nkhamba kusambira nayo.

 Kevin na muwoli wake ŵakakhalanga umoyo wambura kukhumba vinandi na chilato chakuti ŵaŵe na nyengo yinandi yakusambizgira ŵanthu Baibolo. Ŵakasunganga ndalama pachokopachoko izo zikaŵawovwira kuti ŵendere pakuluta ku Africa na Central America, uko ŵakakawovwiranga pakuzenga maofesi gha munthavi gha Ŵakaboni ŵa Yehova. Iwo ŵakawonekanga ŵakukondwa, ndipo ŵakatemwananga chomene. Nati nawona ivi nkhaghanaghana kuti, ‘Uwu ndiwo umoyo nkhuwupenja.’

 Kevin wakanilongora vidiyo yinyake iyo yikalongoranga umo Ŵakaboni ŵanyake awo ŵakaŵa ŵamishonale ŵakakondweranga, ntheura nane nkhamba kukhumba kuti nizakaŵe mishonale. Mu 1995, nati nasambira Baibolo kwa myezi 6, nkhabatizika na kuŵa yumoza wa Ŵakaboni ŵa Yehova. M’malo mwakupempha Chiuta kuti wanipe usambazi, nkhamba kulomba kuti: “Munganipanga ukavu chara nesi usambazi.”—Zintharika 30:8.

 Pasono nasanga usambazi wanadi, wakuthupi yayi kweni wauzimu. Nkhakumana na muwoli wane wakutemweka, Nuria, ku Honduras, ndipo tachitira lumoza umishonale ku Panama na Mexico. Mazgu gha mu Baibolo agha ngaunenesko, agho ghakuti: “Thumbiko la Yehova ndilo likusambazga munthu, ndipo wakusazgako vyakuŵinya yayi.”—Zintharika 10:22.