Ŵanthu ŵanandi ŵakwiza ku Philipines kuzakawona vipopoma vyakumanyikwa chomene kufupi na tawuni ya Pagsanjan. Uku ndiko adada a Nardo Leron, ŵakakulira, ndipo ŵakaŵa ŵakavu chomene. Adada ŵakaŵa ŵakusuzga chomene na ŵakali chifukwa cha vimbundi ivyo vikachitikanga mu boma, ku polisi, kweniso uko ŵakagwiranga ntchito.

 Mu banja lithu tikaŵamo ŵana 8 ndipo ŵapapi ŵithu ŵakalimbikiranga chomene ntchito kuti ŵatilere makora. Ŵakalimanga ku mapiri ghakutali chomene ndipo kanandi ŵakatandaliranga kwenekuko. Kanandi ine na mukuru wane Rodelio, tikakhalanga tekha ndipo tikafwanga waka na njara. Tikaŵavyanga nyengo yakuseŵelera. Apo nkhaŵa na vyaka 7, tose tikamba kugwira ntchito ku minda, tikanyamuranga vidunga vya kokonati ivyo vikaŵanga vizito ndipo tikendanga mu mapiri ghakusendemuka. Para katundu ni muzito tikaguguzanga waka.

 Adada ŵakatitimbanga umo ŵakhumbira, kweni vikatiŵinyanga chomene para ŵakutimba amama. Tikayezganga kuŵakora, kweni vikaphuranga kanthu yayi. Ine na Rodelio tikapangana kuti para takura tizakaŵakome adada. Nkhadokeranga chomene kuŵa na dada uyo wanganitemwa.

 Apo nkhaŵa na vyaka 14, nkhafumapo panyumba chifukwa cha kukwiya na nkhaza izo adada ŵakatichitiranga. Nkhendendekanga waka mu misewu, ndipo paumaliro nkhamba kukhweŵa vyamba. Pamasinda nkhasanga ntchito yakwendeska boti, nkhayeghanga ŵanthu awo ŵiza kuzakawona vipopoma.

 Pati pajumpha vyaka vichoko waka, nkhamba kusambira pa yunivesite ya Manila. Nkhaŵa na nyengo yichoko yakuŵerengera chifukwa kuumaliro wa sabata nkhalutanga kukagwira ntchito ku Pagsanjan. Nkhawonanga kuti umoyo wane ulije ntchito, ndipo chamba nacho chikanovwira yayi kuchepeskako masuzgo. Nkhambaso kugwiliskira ntchito cocaine, na heroin. Ivi vikapangiska kuti nambe kuchita uzaghali. Nkhawona kuti ukavu, vimbundi, na kusuzgika vili palipose. Nkhatinkhanga chomene boma, ndipo nkhatenge ndilo likupangiska vinthu vyose ivi. Nkhafumba Chiuta kuti, “Chifukwa wuli tikusangana na masuzgo ghose agha?” Nkhenda mu matchalitchi ghanandi, kweni nkhalisanga yayi zgoro la fumbo lane. Nkhalutilira kumwa minkhwala yakuloŵezga kuti niluweko masuzgo.

 Mu 1972, ŵana ŵa sukulu ku Philippines ŵakapanga viwoneskero chifukwa chakuti boma likendeskanga makora yayi vinthu. Nane nkhachitako nawo, ndipo paumaliro vikazgoka viwawa. Ŵanthu ŵanandi ŵakakakika, ndipo pakati pajumpha myezi yichoko waka, boma likakhwimiska chomene malango mu charu chose.

 Nkhambiraso kwendendeka mu misewu, kweni panyengo iyi nkhawopanga chomene chifukwa nane nkhachitako viwawa ivi. Nkhamba kwiba kuti nisange ndalama zakugulira minkhwala yakuloŵezga. Nkhambaso kuchita uzaghali na ŵasambazi kweniso ŵalendo. Nkhapwelerangako yayi vyakuti ningafwa.

 Panyengo iyo, amama na munung’una wane ŵakamba kusambira Baibolo na Ŵakaboni ŵa Yehova. Adada ŵakakwiya chomene ndipo ŵakawotcha mabuku agho ŵakasambiliranga. Kweni ŵakaleka yayi kusambira ndipo paumaliro ŵakabatizika na kuŵa Ŵakaboni ŵa Yehova.

 Zuŵa linyake Kaboni wa Yehova wakaphalira adada kuti Baibolo likuti kunthazi vimbundi vizamumara ndipo pa charu chose pazamuŵa urunji. (Salimo 72:12-14) Adada ŵakazizwa na nkhani iyi, mwakuti ŵakafufuza ŵekha mu Baibolo. Ŵakasanga kuti Baibolo likuyowoya nadi kuti Chiuta walayizga boma liwemi, kweniso kuti muli ivyo Chiuta wakukhumba kuti ŵafumu ŵachitenge. (Ŵaefeso 5:28; 6:4) Pakajumpha nyengo yichoko waka, adada na ŵana ŵakwithu wose ŵakaŵa Ŵakaboni ŵa Yehova. Pakuti nkhaŵa kutali, nkhamanyangako yayi ivyo banja lakwithu likasankha.

 Mu 1978, nkhaluta ku Australia. Charu cha Australia chikaŵa chamtende na chisambazi, kweni ine nkhaŵavya mtende wa mumtima. Nkhalutilira kumwa moŵa na minkhwala yakuloŵezga. Kuumaliro wa 1978, Ŵakaboni ŵa Yehova ŵakiza kunyumba. Nkhakondwa na ivyo ŵakanilongora mu Baibolo kuti charu chizamuŵa cha mtende, kweni nkhakhumbanga yayi kuŵa Kaboni wa Yehova.

 Pati pajumpha nyengo yichoko waka, nkhaluta ku Philippines. Ŵana ŵakwithu ŵakaniphalira kuti adada ŵali kusintha, sono mbadada ŵawemi chomene. Kweni ine nkhaŵa kuti nichali kuŵasungira vyakusingo, mwakuti nkhakhumbanga yayi kuyowoyeskana nawo.

 Mudumbu wane wakanilongosolera kufuma mu Baibolo chifukwa icho ŵanthu ŵakusuzgikira kweniso chifukwa icho vimbundi viliri palipose. Nkhazizwa chomene kuti kamwana kachoko kakamanyanga vinandi na kuzgora mafumbo ghane ghose. Pambere nindanyamuke, adada ŵakanipa buku la Mungathe Kukhala ndi Moyo Kosatha M’paradaiso pa Dziko Lapansi. a Ŵakaniphalira kuti: “Buku ili ndilo lekha lingakovwira kuti usange vyose ivyo ukupenja.” Ŵakaniphalira kuti para nafika ku Australia, nkhakumane na Ŵakaboni ŵa Yehova.

 Nkhapulikira ivyo adada ŵakaniphalira ndipo nkhaluta ku Nyumba ya Ufumu ya Ŵakaboni ŵa Yehova pafupi na apo nkhakhalanga ku Brisbane. Nkhazomera kwamba kusambira Baibolo nyengo zose. Nkhakondwa chomene nati naŵerenga mauchimi gha mu Baibolo, nga agho ghali pa Daniyeli chaputara 7 na Yesaya chaputara 9, agho ghakuti boma la Chiuta ilo lilije vimbundi ndilo lizamuwusa charu chose chapasi. Nkhamanya kuti tizamukhala mwakukondwa mu Paradiso pa charu. Nkhakhumbanga kukondweska Chiuta, kweni nkhamanya kuti nkhwenera kujikora, kuleka kumwa moŵa na minkhwala yakuloŵezga kweniso uzaghali. Nkhamuleka msungwana uyo nkhakhalanga nayo, ndipo nkhaleka kuchitako viheni. Nkhamba kumutemwa chomene Yehova, ndipo nkhamulombanga kuti wanovwire kusintha vinthu vinyake.

 Pachoko na pachoko, nkhamba kuwona kuti ivyo nkhasambiranga vinganisintha nadi. Baibolo likuti para tingafwilirapo tingavwara “wunthu uphya.” (Ŵakolose 3:9, 10) Apo nkhalimbikiranga kuti nisinthe, nkhamanya kuti adada nawo ŵakwenera kuti ŵali kusintha nadi. Nkhaleka kuŵakwiyira na kuŵasungira vyakusingo, ndipo tikaŵa pa mtende. Paumaliro nkhaŵagowokera, nkhaleka kuŵasungira vyakusingo ivyo nkhaŵa navyo kufuma waka pa wanichi.

 Apo nkhaŵa munyamata, kanandi nkhatoleranga waka nkharo ziheni za ŵanyane. Nkhajiwonera nekha kuti Baibolo likuneneska para likuti mendezgano ghaheni ghakunanga makhaliro ghawemi. (1 Ŵakorinte 15:33) Sono nili na ŵabwezi ŵawemi mu gulu la Yehova, awo ŵali kunovwira kuti niŵe munthu muwemi. Nili kusangaso mwanakazi muwemi chomene, Loretta. Ine na muwoli wane tikusambizga ŵanthu umo Baibolo lingaŵawovwilira.

 Nkhukondwa chomene kuti Baibolo likawovwira adada kuti ŵasinthe na kwamba kutemwa amama, kuŵa ŵakujiyuyura, kweniso munthu wamtende, chinthu icho nkhakhazganga yayi kuti adada ŵangachita. Mu 1989 nkhabatizika na kuŵa Kaboni wa Yehova. Adada ŵakanihaga tati takumana waka. Kakaŵa kakwamba kuti adada ŵanihage!

 Vyaka vyakujumpha 35, adada na amama ŵakaphaliranga ŵanthu ivyo Baibolo likulayizga. Adada ŵakaŵa munthu wakulimbikira ntchito na wakovwira ŵanthu. Panyengo iyo, nkhamba kuŵachindika na kuŵatemwa. Nkhanothanga kuti ndine mwana wawo! Adada ŵakafwa mu 2016, kweni nichali kuŵakumbuka. Nkhukondwa kuti tose tikasintha nkharo zithu ziheni na kwamba kulondezga ivyo tikasambiranga mu Baibolo. Sono nili kuleka kutinkha ŵanthu. Nkhukondwa chomene kuti nili kumanya Dada wane wakuchanya, Yehova Chiuta, uyo wali kulayizga kuti wazamumazga masuzgo agho mabanja ghanandi ghakukumana nagho.