“Apo nkhakuranga suzgo lane likaŵa lakuti nkhadokeranga chomene ŵanalume ŵanyane. Pakwamba nkhawonanga kuti ni nkhani yichoko, kweni paumaliro vikanisuzganga chomene.”​—David, 23.

 David ni Mkhristu, ndipo wakukhumba chomene kukondweska Chiuta. Kweni kasi vingachitika kukondweska Chiuta uku wali na maghanoghano ghakugonana na ŵanalume ŵanyake? Kasi Chiuta wakuyiwona wuli nkhani yakuti ŵanalume panji ŵanakazi ŵekhaŵekha ŵagonanenge?

•  Ivyo Baibolo likuyowoya

•  Kasi fundo iyi yikulongora kuti . . . ?

•  Kweni wuli usange . . . ?

 Ŵanthu ŵakuyiwona mwakupambanapambana nkhani ya kugonana kwa ŵanalume panji ŵanakazi pera kuyana na mitheto, uko ŵakukhala kweniso nyengo iyo ŵalimo. Kweni Baibolo likuti Ŵakhristu ŵakwenera yayi kwendera maghanoghano gha ŵanthu panji ‘kuyegheka waka uku na uku na mphepo yiliyose ya chisambizgo chautesi.’ (Ŵaefeso 4:14) M’malo mwake, pa nkhani ya kugonana kwa ŵanalume panji ŵanakazi pera (kweniso nkharo zinyake) ŵakwendera fundo za mu Baibolo.

 Baibolo likupereka fundo zakupulikikwa makora chomene pa nkhani ya kugonana kwa ŵanalume panji ŵanakazi pera. Mazgu gha Chiuta ghakuti:

•  “Ungagonananga na mwanalume munyako nga umo ukugonera na mwanakazi chara.”​—Levitiko 18:22.

•  “Mwakuyana na makhumbiro gha mitima yawo, . . . Chiuta wakaŵaleka kuti ŵaŵe na makhumbiro ghakugonana kwambura kujikora, pakuti ŵanakazi ŵakaleka kugonana na ŵanalume, ŵakamba kugonana na ŵanakazi ŵanyawo.”​—Ŵaroma 1:24, 26.

•  “Mungapuluskikanga yayi. Kwali mbazaghali, ŵakusopa vikozgo, ŵaleŵi, ŵanalume awo ŵakuzomera kugoneka na ŵanalume ŵanyawo, ŵanalume awo ŵakugonana na ŵanalume ŵanyawo, ŵankhungu, ŵaryezi, ŵaloŵevu, ŵakutuka, na ŵakuphanga ŵazamuhara yayi Ufumu wa Chiuta.”​—1 Ŵakorinte 6:9, 10.

 Unenesko ngwakuti, fundo za Chiuta zikovwira ŵanthu wose kwali ni awo ŵali na makhumbiro ghakugonana na ŵanalume panji ŵanakazi ŵanyako panji yayi. Waliyose wakwenera kujikora para wakukhumba kuchita ivyo Chiuta wakukana.​—Ŵakolose 3:5.

 Kasi fundo iyi yikulongora kuti Baibolo likukhuŵirizga kuti titinkhenge awo ŵakugonana na ŵanalume panji ŵanakazi ŵanyawo?

 Yayi. Nakuti Baibolo likuti tikwenera yayi kutinkha munthu waliyose kusazgapo na awo ŵakugonana na ŵanalume panji ŵanakazi ŵanyawo. M’malo mwake likuti ‘tiŵe pamtende na ŵanthu wose,’ kwambura kutolera ivyo ŵakuchita. (Ŵahebere 12:14) Ntheura tikwenera yayi kunena panji kuŵachitira vinthu viheni awo ŵakugonana na ŵanalume panji ŵanakazi ŵanyawo.

 Kasi fundo iyi yikung’anamura kuti Ŵakhristu ŵakwenera kususka malango agho ghakuzomerezga kugonana kwa ŵanalume panji ŵanakazi ŵekhaŵekha?

 Dango la Chiuta pa nkhani ya nthengwa ndakuti mwanalume na mwanakazi pera ndiwo ŵakwenera kutorana. (Mateyu 19:4-6) Kweni malango agho ŵandyali ŵakupanga ndigho ghakuzomerezga kuti ŵanalume panji ŵanakazi ŵekhaŵekha ŵatoranenge. Baibolo likuti Ŵakhristu ŵakwenera yayi kunjilirapo pa vya ndyali. (Yohane 18:36) Ntheura ŵakuzomerezga panji kususka malango gha ŵandyali yayi pa nkhani ya kutora panji kugonana kwa ŵanalume panji ŵanakazi ŵekhaŵekha.

 Kweni wuli usange munyake ŵakugonana na mwanalume panji mwanakazi munyake? Kasi munthu ŵanthena wangasintha?

 Enya. Mu nyengo yakale ŵakaŵapo ŵanyake awo ŵakachita mukhaliro uwu! Pamanyuma pa kuyowoya kuti wose awo ŵakugonana na ŵanalume panji ŵanakazi ŵanyawo ŵazamunjira yayi mu Ufumu wa Chiuta, Baibolo likuti: “Mwaŵanyake ndimo mukaŵira.”​—1 Ŵakorinte 6:11.

 Kasi ivi vikung’anamura kuti awo ŵali kuleka kuchita vinthu ivi ŵakuluwirathu ivyo ŵakachitanga? Yayi. Baibolo likuti: “Vwarani wunthu uphya uwo Chiuta wakupeleka, kung’anamura kuti para mwamanya makora vinthu, wunthu winu ukulutilira kuŵa uphya.” (Ŵakolose 3:10) Munthu wakusintha nyengo yimoza yayi.

 Kweni wuli usange munthu munyake wakukhumba kulondezga fundo za Chiuta kweni vikumusuzga kuleka nkharo ya kugonana na mwanalume panji mwanakazi munyake?

 Nga umo vikuŵira na vizgoŵi vinyake wangasankha waka kuvisulako. Kasi wangachita wuli nthena? Baibolo likuti: “Lutilirani kwenda mwa mzimu, ndipo muchitenge yayi makhumbiro gha thupi.”—Ŵagalatiya 5:16.

 Mwawona, lemba ili lindayowoyepo kuti mulekenge kuŵa na makhumbiro gha thupi. Kweni, likuchiska kuti mukwenera kuchita vinthu vyauzimu nga kuŵerenga Baibolo na kulomba. Ivi viwovwirenge kuti mukane makhumbiro ghaheni.

 David, uyo tamuzunura kukwambilira wakawona kuti uwu mbunenesko, wakaphalira ŵapapi ŵake nkhani iyi ndipo ŵakamovwira. Iyo wakati: “Ichi chikaŵa chiyezgo chikuru chomene kwa ine, ndipo viŵenge kuti nkhaŵaphalira luŵiro ŵapapi ŵane kuti ŵanovwire mphanyi nkhakondwa chomene na unyamata wane.”

 Tikukondwa chomene para tikulondezga fundo za Yehova. Tikukhorwa kuti malanguro gha Chiuta “ngaurunji, ghakukondweska mtima,” kweniso para tikughasunga ‘tizamusanga njombe yikuru.’​—Salimo 19:8, 11.