Kasi Baibolo Likuti Wuli pa Nkhani ya Kuziŵizga Kurya?
Ivyo Baibolo likuyowoya
Kale, Chiuta wakazomerezganga ŵateŵeti ŵake kuziŵizga kurya usange ŵali na chilato chiwemi. Kweni usange ŵakaŵa na vilato viheni, Chiuta wakakondwanga nawo yayi. Ndipouli, mazuŵa ghano Baibolo likuzomerezga panji kukanizga yayi usange munthu wakukhumba kuziŵizga kurya.
Chifukwa wuli ŵanyake kale ŵakaziŵizganga kurya?
Kuti ŵapemphe Chiuta kuti waŵawovwire na kuŵalongozga. Ŵanthu awo ŵakalutanga ku Yerusalemu ŵakaziŵizganga kurya kulongora kujiyuyura kuti Chiuta waŵawovwire. (Ezira 8:21-23) Nyengo zinyake Paulosi na Baranaba para ŵakimikanga ŵalara mu mipingo ŵakaziŵizganga kurya.—Milimo 14:23.
Kuti ŵaŵike maghanoghano ghawo ghose pakuchita khumbo la Chiuta. Yesu wakati wabatizika, wakaziŵizga kurya mazuŵa 40 apo wakanozgekeranga kwamba kuteŵetera Chiuta.—Luka 4:1, 2.
Kuti ŵalongore kulapa chifukwa cha zakwananga zakumanyuma. Kwizira mwa ntchimi Joyeli, Chiuta wakaphalira Ŵaisrayeli kuti: “Welerani kwa ine na mtima winu wose, Uku mukuziŵizga kurya, mukulira na kutengera.”—Joyeli 2:12-15.
Kuti ŵakumbukire Zuŵa la Mphepiska. Dango ilo Chiuta wakapeleka ku Ŵaisrayeli likayowoyangaso kuti ŵakwenera kuziŵizga kurya chaka chilichose pa Zuŵa la Mphepiska. a (Levitiko 16:29-31) Ŵaisrayeli ŵakeneranga kuziŵizga kurya pa zuŵa ili chifukwa vikaŵakumbuskanga kuti mbakwananga ndipo Chiuta wakwenera kuŵagowokera.
Vifukwa viheni vyakuziŵizgira kurya
Kujilongora ku ŵanthu. Yesu wakasambizga kuti usange munthu wakuziŵizga kurya apo wakusopa, wakwenera kuchita kujilongora kuti ŵanthu ŵamuwone yayi, kweni yikwenera kuŵa nkhani ya pakati pa iyo na Chiuta.—Mateyu 6:16-18.
Kujiwoneska kuŵa murunji. Kuziŵizga kurya ndiko kungapangiska munthu kuŵa na nkharo yiwemi panji kuŵa wauzimu kuluska wose yayi.—Luka 18:9-14.
Kuphepiskira zakwananga izo munthu wakuchitira dala. (Yesaya 58:3, 4) Chiuta wakakondwanga na ŵanthu awo ŵakaziŵizganga kurya para ŵapulikira malango ghake na kulapa na mtima wose.
Kusopa mwadango waka. (Yesaya 58:5-7) Pa nkhani iyi, Chiuta wali nga ni dada uyo wakukondwa yayi usange ŵana ŵake ŵakumutemwa mwadango waka.
Kasi Ŵakhristu ŵakwenera kuziŵizga kurya?
Yayi. Chiuta wakaphalira Ŵaisrayeli kuti ŵaziŵizgenge kurya pa Zuŵa la Mphepiska. Kweni vyose ivi vikamara Yesu wati wapeleka ndopa zake kuphepiskira zakwananga za ŵanthu wose awo ŵalapa zanadi. (Ŵahebere 9:24-26; 1 Petrosi 3:18) Ŵakhristu ŵali pasi pa Dango la Mozesi yayi ilo likatenge Ŵaisrayeli ŵakumbukirenge Zuŵa la Mphepiska. (Ŵaroma 10:4; Ŵakolose 2:13, 14) Ntheura Mkhristu waliyose wakwenera kusankha yekha usange wakukhumba kuziŵizga kurya panji yayi.—Ŵaroma 14:1-4.
Ŵakhristu ŵakumanya kuti pa nkhani ya kusopa, kuziŵizga kurya nkhwakuzirwa viŵi yayi. Nakuti Baibolo lindayowoyepo kuti munthu wangaŵa wakukondwa para wakuziŵizga kurya. Ŵakhristu ŵaunenesko mbakukondwa chifukwa Yehova Chiuta wawo nayo, ni “Chiuta wakukondwa.”—1 Timote 1:11; Mupharazgi 3:12, 13; Ŵagalatiya 5:22.
Mautesi pa nkhani ya kuziŵizga kurya
Utesi: Mpositole Paulosi wakati Ŵakhristu ŵakutolana ŵakwenera kuziŵizga kurya.—1 Ŵakorinte 7:5, King James Version.
Unenesko: Mipukutu yakale chomene ya Baibolo yikuyowoyapo yayi vya kuziŵizga kurya pa lemba la 1 Ŵakorinte 7:5. b Vikuwoneka kuti ŵanthu ŵanyake awo ŵakakoperanga Baibolo ndiwo ŵakasazgirapo fundo yakuziŵizga kurya pa lemba ili, kweniso pa Mateyu 17:21; Mariko 9:29; na Milimo 10:30. Mu Mabaibolo ghanandi gha mazuŵa ghano ŵali kuwuskamo mazgu gha kuziŵizga kurya pa mavesi agha.
Utesi: Ŵakhristu ŵakwenera kuziŵizga kurya kuti ŵakumbukirenge mazuŵa 40 agho Yesu wakakhalira mu mapopa kwambura kurya kalikose wati wabatizika waka.
Unenesko: Yesu wandayowoyepo kuti ŵanthu ŵaziŵizgenge kurya chifukwa chakuti iyo wakakhala mazuŵa 40 kwambura kurya. Kweniso palije lemba mu Baibolo ilo likulongora kuti Ŵakhristu ŵakwambilira ŵakakumbukiranga mazuŵa agha. c
Utesi: Ŵakhristu ŵakwenera kuziŵizga kurya pakukumbukira nyifwa ya Yesu.
Unenesko: Yesu wandaphalirepo ŵasambiri ŵake kuti ŵaziŵizgenge kurya pakukumbukira nyifwa yake. (Luka 22:14-18) Nangauli nyengo yinyake Yesu wakati ŵasambiri ŵake ŵazamuziŵizga kurya para wafwa, likaŵa dango yayi lakuti ŵasambiri ŵake ŵalilondezgenge nyengo zose. (Mateyu 9:15) Baibolo likayowoyerathu kuti Ŵakhristu wose awo ŵali na njala ntchiwemi kulyerathu ku nyumba zawo pambere ŵandambe kukumbukira nyifwa ya Yesu.—1 Ŵakorinte 11:33, 34.
a Chiuta wakaphalira Ŵaisrayeli kuti pa Zuŵa la Mphepiska ŵakeneranga ‘kujisuzga.’ (Levitiko 16:29, 31) Mazgu ghakuti ‘kujisuzga’ ghakwenera kuti ghakang’anamuranga kuziŵizga kurya. (Yesaya 58:3) Lekani Baibolo la Contemporary English Version likuti: ‘Mukwenera kuziŵizga kurya kulongora kuti muli na chitima chifukwa cha zakwananga zinu.’
b Wonani buku lakuti A Textual Commentary on the Greek New Testament, lakulembeka na Bruce M. Metzger, Third Edition, peji 554.
c Pakuyowoya za mudauko wakukumbukira mazuŵa 40 ghakuziŵizga kurya, buku la New Catholic Encyclopedia likuti: “Mu vyaka mahandiredi ghatatu ghakwambilira, kanandi ŵanthu ŵakaziŵizganga kurya kwa mazuŵa ghambura kujumpha pa sabata yimoza. Kanandi ŵakachitanga zuŵa limoza panji ghaŵiri pera. Ŵakachitanga ivi pakunozgekera chiphikiro cha Isitara. . . . Vikulongora kuti wupu wa mabishopu wa Council of Nicaea (325) ndiwo ukambiska vyakuti Ŵakhristu ŵaziŵizgenge kurya pakukumbukira mazuŵa 40 agho Yesu wakakhala kwambura kurya. Ndipouli, nkhwantha zinyake zikukolerana nayo yayi fundo iyi.”—Second Edition, Volume 8, peji 468.
Panji Mungatemwa Kuŵerengaso Nkhani Izi
YESU NI NTHOWA, UNENESKO, NA UMOYO
Chifukwa Wuli Ŵasambiri ŵa Yesu Ŵakaziŵizganga Yayi?
Kuti Yesu waŵazgore makora, wakayowoya ntharika ya thumba liphya la vinyo.
MAFUMBO AGHO BAIBOLO LIKUZGORA
Kasi Chiuta Wanigowokerenge?
Wonani ivyo Baibolo likuyowoya pa nkhani ya ivyo mungachita kuti Chiuta wamugowokerani zakwananga zinu.
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.