Baibolo likulongora kuti Yesu wakatora yayi, nangauli likuyowoya mwakudunjika yayi. a Tiyeni tiwone fundo izi.

1.   Kanandi waka Baibolo likuzunura za ŵabali ŵa Yesu, ŵanakazi awo wakachitiranga nawo lumoza uteŵeti, kweniso awo ŵakaŵapo apo Yesu wakapayikika pa khuni. Kweni likuyowoyapo yayi kuti wakaŵa na mwanakazi. (Mateyu 12:46, 47; Mariko 3:31, 32; 15:40; Luka 8:2, 3, 19, 20; Yohane 19:25) Baibolo likuyowoyapo vinandi yayi pa nkhani iyi, chifukwa Yesu wakatora yayi.

2.   Pakuyowoya vya awo ŵandatore chifukwa chakuti ŵakukhumba kuti ŵachite vinandi pakuteŵetera Chiuta, Yesu wakaphalira ŵasambiri ŵake kuti: “Uyo wangakwaniska kuchipokelera ichi [kuleka kutora panji kutengwa], wachipokelere.” (Mateyu 19:10-14) Yesu ntchiyelezgero chiwemi kwa awo ŵasankha kuleka kutora panji kutengwa kuti ŵateŵetere Chiuta mwakukwana.—Yohane 13:15; 1 Ŵakorinte 7:32-38.

3.   Pambere Yesu wandafwe, wakaphalira msambiri wake uyo wakamutemwanga kuti wapwelelere anyina a Mariya. (Yohane 19:25-27) Yesu waŵenge kuti wakatora panji kuŵa na ŵana nga wakayowoya kuti nawo ŵakwenera kuŵapwelelera.

4.   Baibolo likuti Yesu ntchiyelezgero chiwemi ku ŵafumu, kweni likuyowoya yayi za umo wakachitiranga na muwoli wake, chifukwa wakatorapo yayi. Kweni likuti: “Ŵafumu, lutilirani kutemwa ŵawoli ŵinu, umo Khristu nayo wakatemwera mpingo na kujipeleka yekha chifukwa cha iwo.” (Ŵaefeso 5:25) Yesu waŵenge kuti wakatora apo wakaŵa pano pasi, mphanyi mu vesi ili ŵanguyowoya umo wakatemweranga muwoli wake.

 Enya, wakaŵa na ŵabali ŵake 6. Wakaŵa na ŵanung’una ŵake ŵanayi, Yakobe, Yosefe, Simoni na Yudasi kweniso ŵadumbu ŵake ŵaŵiri. (Mateyu 13:54-56; Mariko 6:3) Aŵa ŵakaŵa ŵana awo Yosefe na Mariya ŵakababa. (Mateyu 1:25) Baibolo likuti Yesu ni mwana “wakwamba” wa Mariya, ivyo vikulongora kuti Mariya wakaŵaso na ŵana ŵanyake padera pa Yesu.—Luka 2:7.

 Kuti ŵazomerezge fundo yakuti Mariya wakagonanapo na mwanalume yayi pambere wandatengwe, ŵanthu ŵanyake ŵakughanaghana kuti mazgu ghakuti “ŵanung’una” ghakung’anamura vinandi. Mwachiyelezgero, ŵanyake ŵakuti ŵanung’una ŵa Yesu ŵakaŵa ŵana ŵa Yosefe awo wakababa kwa muwoli wake wakwamba. Ndipouli Baibolo likulongora kuti Yesu ndiyo wali kuhara ufumu uwo ukalayizgika kwa Davide. (2 Samuyeli 7:12, 13; Luka 1:32) Yosefe waŵenge kuti wakaŵa na ŵana ŵanalume pambere Yesu wandababike, ipo mulara pa ŵana awo nga ndiyo wakahalira ufumu wa Yosefe.

 Kasi mazgu agha ghakuyowoya za ŵasambiri ŵa Yesu panji ŵabali ŵake ŵauzimu? Fundo iyi yikupambana na ivyo Malemba ghakuyowoya, chifukwa Baibolo likuti “ŵanung’una ŵake ŵakapulikananga mwa iyo chara.” (Yohane 2:12) Baibolo likupambaniska pakati pa ŵanung’una ŵa Yesu na ŵasambiri ŵake.—Yohane 2:12.

 Ŵanthu ŵanyake ŵakughanaghana kuti ŵanung’una ŵa Yesu ŵakaŵa ŵavyara ŵake. Malemba Ghachigiriki ghakupambaniska mazgu ghakuti “mukuru panji munung’una,” “mubwezi” kweniso “muvyara”. (Luka 21:16; Ŵakolose 4:10) Ŵakusanda vya Baibolo ŵanandi ŵakuti ŵanung’una na ŵadumbu ŵa Yesu ŵakaŵa ŵabali ŵake ŵeneko. Mwachiyelezgero, buku la The Expositor’s Bible Commentary likuti: “Mazgu ghakuti ‘ŵanung’una’ . . . ghakuyowoya za ŵana ŵanalume ŵa Mariya na Yosefe, ndipo tingati mbanung’una ŵa Yesu chifukwa mama wawo njumoza, Mariya.” b