Baibolo likuyowoya kuti munthu wangajitemwa, kweni munthowa yakwenelera. Munthu wangalongora kuti wakujitemwa mwakwenelera usange wakujipwelelera, wakujichindika kweniso wakujiwona mwakwenelera. (Mateyu 10:31) Baibolo likukana yayi kujitemwa mwakwenelera, m’malo mwake likukana kujitemwa mwakujumphizga.

Kasi chakwamba tikwenera kutemwa chomene njani?

1.   Chakwamba, tikwenera kutemwa chomene Chiuta. Baibolo likutisambizga kuti dango likuru chomene ndakuti: “Utemwenge Yehova Chiuta wako na mtima wako wose.”—Mariko 12:28-30; Dotoronome 6:5.

2.   Dango lachiŵiri ndakuti: “Utemwenge mzengezgani wako umo ukujitemwera wamwene.”—Mariko 12:31; Levitiko 19:18.

3.   Nangauli mu Baibolo mulije dango lakuti ujitemwenge wekha, kweni dango lakuti “utemwenge mzengezgani wako umo ukujitemwera wamwene,” likulongora kuti ntchakawiro kujitemwa wamwene, ndipo kuchita nthena kuli na uwemi wake.

Kasi ni njani uyo Yesu wakamutemwanga chomene?

 Yesu wakalongora umo wakatemweranga Chiuta, ŵazengezgani, kweniso umo iyo wakajitemweranga, ndipo wakaphalira ŵasambiri ŵake kuti nawo ndimo ŵachitirenge.—Yohane 13:34, 35

1.   Yesu wakatemwanga chomene Yehova ndipo wakajipereka kuti wafiske mulimo wa Chiuta. Iyo wakati: “Kweni mwakuti charu chimanye kuti ine nkhutemwa Adada, ntheura nkhuchita nga umo Adada ŵaniphalilira.”—Yohane 14:31.

2.   Yesu wakatemwangaso ŵazengezgani ŵake. Iyo wakaŵaghanaghaniranga chomene mwakuti wakapeleka umoyo wake chifukwa cha iwo.—Mateyu 20:28.

3.   Wakalongoraso kuti wakajitemwanga mwakwenelera chifukwa wakaŵanga na nyengo yakupumura, kurya, na kusangwa pamoza na ŵasambiri ŵake.—Mariko 6:31, 32; Luka 5:29; Yohane 2:1, 2; 12:2.

Kasi kutemwa ŵanyithu kungapangiska kuti tileke kukondwa kweniso kujichindika?

 Yayi, chifukwa tili kulengeka mu chikozgo cha Chiuta, uyo ngwachitemwa. (Genizesi 1:27; 1 Yohane 4:8) Ichi chikung’anamura kuti nase tikwenera kutemwa ŵanji. Mbunenesko kuti tikwenera kujitemwa mwakwenelera, kweni tingaŵa ŵakukondwa chomene usange tikutemwa Yehova na kuchitira ŵanji viwemi. Lekani Baibolo likuti: “‘Uyo wakupeleka wakukondwa chomene kuluska uyo wakupokera.”—Milimo 20:35.

 Mazuŵa ghano ŵanthu ŵanandi ŵakuyowoya kuti munthu wakuŵa wakukondwa usange wakujighanaghanira waka yekha. Kweni Baibolo likuti, “Utemwenge mzengezgani wako umo ukujitemwera wamwene.” Ntheura iwo ŵakugadabura dango ili ndipo ŵakuti “ujitemwenge wamwene kuluska umo ukutemwera mzengezgani.” Ndipouli maukaboni ghakulongora kuti ŵanthu awo mbakukondwa kweniso awo ŵali na umoyo uwemi ni awo ŵakulondezga ulongozgi wavinjeru wa mu Baibolo, wakuti: “Waliyose waleke kupenja icho ntchachandulo kwa iyo, kweni icho ntchachandulo kwa munthu munyake.”—1 Ŵakorinte 10:24.