Mungachita Wuli Kuti Muzakakhale Kwamuyirayira?

JULANI

Ivyo Baibolo likuyowoya

Baibolo likulayizga kuti: “Uyo wakuchita khumbo la Chiuta wakukhalilira muyirayira.” (1 Yohane 2:17) Kasi Chiuta wakukhumba kuti imwe muchitenge vichi?

Musambirenge vya Chiuta na Mwana wake, Yesu. Pakuyowoya na Chiuta mu lurombo, Yesu wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.” (Yohane 17:3) Kasi chikukhumbikwa ntchivichi kuti ‘timanye’ Chiuta na Yesu? Tingaŵamanya para tikusambira Baibolo na kulondezga uthenga wake mu umoyo withu. a Baibolo likuvumbura maghanoghano gha Mlengi withu, Yehova Chiuta, uyo wakupeleka umoyo. (Milimo 17:24, 25) Baibolo likutiphaliraso vya Mwana wake, Yesu, uyo wakasambizga “mazgu gha umoyo wamuyirayira.”—Yohane 6:67-69.
Muŵe na chipulikano mu sembe ya Yesu. Yesu wakiza pa charu ‘kuzakateŵetera na kupeleka umoyo wake kuŵa chiwombolero.’ (Mateyu 20:28) Sembe ya Yesu yikajura nthowa yakuti ŵanthu ŵazakakhale kwamuyirayira mu Paradiso pa charu chapasi. b (Salimo 37:29) Yesu wakati: “Chiuta wakachitemwa chomene charu, lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yohane 3:16) Wonani kuti pakukhumbikwa vinandi padera pakugomezga waka mwa Yesu. Tikwenera ‘kuŵa na chipulikano mwa iyo,’ tichitenge vinthu kuyana na visambizgo kweniso khumbo la Adada ŵake.—Mateyu 7:21; Yakobe 2:17.
Muŵe paubwezi wakukhora na Chiuta. Chiuta wakukhumba kuti tisendelere kwa iyo na kuŵa ŵabwezi ŵake. (Yakobe 2:23; 4:8) Chiuta ngwamuyirayira. Wazamufwapo yayi, ndipo wakukhumba kuti ŵabwezi ŵake nawo ŵazakakhale kwamuyirayira. Chiuta wakutiphalira kwizira mu Mazgu ghake ivyo wakukhumba kuchitira wose awo ŵakumupenja: “Mukondwe na umoyo muyirayira.”—Salimo 22:26.

Mautesi pa Nkhani ya Kukhala Kwamuyirayira

Utesi: Ivyo ŵanthu ŵakuchita vizamovwira kuti tizakaŵe na umoyo wamuyirayira.

Unenesko: Nangauli vinyake ivyo ŵachipatala ŵachita vikulongora nga ŵangasazgirako umoyo wa munthu, kweni vinthu ivi vingapeleka yayi umoyo wamuyirayira. Chiuta pera ndiyo wangatipa umoyo wamuyirayira, pakuti ndiyo yekha “chisimi cha umoyo.” (Salimo 36:9) Iyo wakulayizga kuti “wazamumilimitizga nyifwa muyirayira” na kupeleka umoyo wamuyirayira ku ŵanthu ŵakugomezgeka.—Yesaya 25:8; 1 Yohane 2:25.

Utesi: Ŵanthu ŵa mitundu yinyake pera ndiwo ŵazamukhala kwamuyirayira.

Unenesko: Chiuta wakutemwera yayi. M’malo mwake, “wakupokelera munthu wa mtundu uliwose uyo wakumopa na kuchita urunji.” (Milimo 10:34, 35) Ŵanthu ŵa mafuko ghose na mitundu awo ŵakupulikira Chiuta ŵazamukhala kwamuyirayira.

Utesi: Umoyo wamuyirayira uzamuŵa wakuvuska.

Unenesko: Chiuta ndiyo wakukhumba ŵanthu ŵazakaŵe na umoyo wamuyirayira, ndipo iyo wakutitemwa kweniso wakukhumba tikondwenge. (Yakobe 1:17; 1 Yohane 4:8) Wakumanya kuti tikukhumbikwira ntchito yiwemi yakugwira kuti tiŵe ŵakukondwa. (Mupharazgi 3:12) Chiuta wakulayizga kuti awo ŵazamukhala kwamuyirayira pa charu chapasi ŵazamuŵa na ntchito yiwemi na yakukhorweska, iyo yizamuŵawovwira ŵekha na ŵakutemweka ŵawo.—Yesaya 65:22, 23.

Chinyake ntchakuti, awo ŵazamukhala kwamuyirayira ŵazamulutilira kusambira vinthu viphya vyakukhwaskana na Mlengi wawo kweniso milimo yake yinandi yakulenga. Ŵanthu wali kuŵalenga na khumbiro la kukhala kwamuyirayira kweniso kusambira vya iyo, nangauli iwo “ŵangamanya yayi mulimo uwo Chiuta waunenesko wachita kufuma pakwamba m’paka paumaliro.” (Mupharazgi 3:10, 11) Ntheura, awo ŵazamukhala kwamuyirayira nyengo zose ŵazamuŵa na vinthu vyakuti ŵasambire na kuchita.

a Ŵakaboni ŵa Yehova ŵakusambizga ŵanthu Baibolo kwaulere. Kuti mumanye vinandi, wonelerani vidiyo yakuti, Kasi Ŵakaboni ŵa Yehova Ŵakuchita Wuli Pakusambizga Munthu Baibolo?

b Wonani nkhani yakuti “Kasi Yesu Wakuponoska Wuli Ŵanthu?”