“Ntheura, tileke kuvuka pakuchita icho ntchiwemi, chifukwa mu nyengo yake tizamuvuna usange tikuvuka yayi.”—Ŵagalatiya 6:9, Mang’anamuliro gha Charu Chiphya.

 “Ntheura tireke kuvuka pakuchita uweme, chifukwa usange tikureka kugongowa, tamkuvuna pa nyengo yakhe.”​—Ŵagalatiya 6:9, Phangano Liphya.

 Mpositole Paulosi wakachiska Ŵakhristu kuti ŵalutilire kuchita uwemi mwakuyana na fundo za Chiuta. Usange ŵachitenge nthena, ŵangaŵa na chigomezgo chose kuti Chiuta waŵatumbikenge.

 “Tileke kuvuka.” Mazgu agha ghangang’anamurikaso kuti “kuleka kugongowa.” Ndipo mazgu ghakwambilira gha Chigiriki agho ghang’anamulika kuti tileke kuvuka, ghangang’anamuraso kuleka kugongowa panji kuleka kuwa nkhumbi. Paulosi pakulemba mazgu agha, vikulongora kuti nayo nyengo zinyake wakalimbananga na suzgo la kugongowa.—Ŵaroma 7:21-24.

 “Icho ntchiwemi,” panji kuti chakwenelera, ni vinthu vyose ivyo Mkhristu wakwenera kuchita pakuteŵetera Chiuta. Ichi chikusazgapo viwemi ivyo munthu wangachitira Ŵakhristu ŵanyake kweniso ŵanthu waka.—Ŵagalatiya 6:10.

 “Mu nyengo yake tizamuvuna usange tikuvuka yayi.” Paulosi wakakumbuskanga awo wakaŵalembera kuti nyengo zinyake pangatora nyengo pambere ŵandawone vyandulo pa uwemi uwo ŵachita nga umo vikuŵira kuti mulimi wakwenera kulindilira para wapanda mbuto. Pakuyowoya za mazgu ghakuti kuvuna, Paulosi wakayaniskanga na fundo yambura kususkika iyo yili mu vesi 7 iyo yikuti: “Icho munthu wakuseŵa, ndicho wazamuvuna.” Mu mazgu ghanyake tingayowoya kuti para Mkhristu wakuchita viwemi kwa Chiuta ndikuti wazamuvuna vinandi chomene kusazgapo umoyo wamuyirayira.—Ŵaroma 2:6, 7; Ŵagalatiya 6:8.

 Paulosi wakalembera Ŵakhristu ŵa ku Galatiya kalata iyi cha m’ma 50-52 C.E. Iyo wakalemba kalata iyi kuti wavikilire Ŵakhristu ku ŵanthu awo ŵakatenge Mbakhristu kweni ŵakabedezganga unenesko wakuyowoya za Yesu. (Ŵagalatiya 1:6, 7) Ŵasambizgi ŵatesi aŵa ŵakayowoyanga kuti Ŵakhristu ŵakwenera kulondezga Dango ilo Chiuta wakapeleka ku mtundu wa Israyeli kwizira mwa Mozesi. (Ŵagalatiya 2:15, 16) Paulosi wakati Dango likaŵa kuti lagwira kale ntchito yake ndipo pa nyengo iyi Ŵakhristu ŵakaŵaso pasi pa Dango ili yayi.—Ŵaroma 10:4; Ŵagalatiya 3:23-25.

 Apo Paulosi wakachiskanga Ŵakhristu ŵanyake kuti ŵalutilire ‘kuchita icho ntchiwemi,’ wakang’anamuranga kuti ŵalondezgenge Dango la Mozesi yayi. M’malo mwake iyo wakaŵachiskanga kuti ‘ŵafiskenge dango la Khristu,’ ilo likusazgapo chilichose icho Yesu wakasambizganga pa nkhani yakuchitira ŵanji viwemi.—Ŵagalatiya 6:2; Mateyu 7:12; Yohane 13:34.

 Wonelerani vidiyo yifupi waka iyi, iyo yikulongosora mwakudumura ivyo vili mu buku la Ŵagalatiya.