“Zani kwa ine, imwe mose mukuphyoka na kunyekezgeka, ndipo nimupumuzganinge. Yeghani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamupumuzgika. Chifukwa joko lane ndipusu na katundu wane ngwakupepuka.”—Mateyu 11:28-30, Mang’anamuliro gha Charu Chiphya.

“Zani kwa Ine mose imwe mukulemerwa na kuzotofyeka, ndipo Ine nditi ndimupumuzganinge. Jitorerani goriwori lane, ndipo musambire kwa Ine; cifukwa ndine wakuzika na wakujipepura mu mtima: ndipo muti musangenge kuvukuka ku mizimu yinu. Cifukwa goriwori lane ndipusu, na katundu wane ndi muyuyu.”—Mateyu 11:28-30, Tumbuka Bible.

Mwalusungu, Yesu wakachema ŵanthu awo ŵakamutegherezganga kuti ŵize kwa iyo. Iyo wakaŵasimikizgira kuti para ŵasambira kwa iyo, ŵapumuzgikenge.

“Zani kwa ine, imwe mose mukuphyoka na kunyekezgeka.” Awo Yesu wakaŵachemanga pa nyengo iyi, ŵakaŵa “ŵakunyekezgeka” na malango kweniso tumaluso twa ŵanthu uto ŵalongozgi ŵa visopa ŵakaŵapanga. (Mateyu 23:4; Mariko 7:7) Ŵanthu bweka nawoso ŵakaphyokanga na vyenjezgo ndipo ŵakeneranga kugwira ntchito yakuvuska chomene kuti ŵasangire vyakukhumbikwa mbumba zawo.

“Nimupumuzganinge.” Yesu wakalayizga kuti waŵawomborenge, panji kuti kuŵapumuzga, wose awo ŵazomera ntchemo yake. Wakachita nthena mwa kuŵawovwira kupulikiska ivyo Chiuta wakukhumba kuti ŵachitenge nadi. (Mateyu 7:24, 25) Kumanya ivi kukaŵawovwira kuti ŵafwatuke ku wuzga wa visambizgo vyautesi na tumaluso twakutalulira twa visopa. (Yohane 8:31, 32) Nangauli chikaŵa chipusu yayi kusambira na kulondezga ivyo Yesu wakasambizganga, kweni kuchita nthena kukaŵa kwakupumuzga.

“Yeghani joko lane ndipo sambirani kwa ine.” Mu nyengo yakale, ŵanthu ŵakatemwanga kugwiliskira ntchito joko—chikhuni icho ŵakaŵikanga pa viŵegha—kuti ŵayeghe vinthu vizito. Ntheura lizgu lakuti “joko” likimiranga waka fundo ya kulondezga mazaza na ulongozgi wa munthu munyake. (Levitiko 26:13; Yesaya 14:25; Yeremiya 28:4) Mazgu ghakuti “sambirani kwa ine” ghangalembekaso kuti “muŵe ŵasambiri ŵane.” Ntheura Yesu wakachiskanga ŵategherezgi ŵake kuti ŵaŵe ŵasambiri ŵake ndipo ŵangachita nthena para ŵakumulondezga na kuyezga iyo.—Yohane 13:13-15; 1 Petrosi 2:21.

“Muzamupumuzgika.” Yesu wakalayizga kuti masuzgo ghose ghamalenge nyengo yeneyiyo yayi. Kweni wakaŵawovwira ŵategherezgi ŵake kuti ŵapembuzgike na kuŵa na chigomezgo. (Mateyu 6:25-32; 10:29-31) Awo ŵakaŵa ŵasambiri ŵake ndipo ŵakazomera visambizgo vyake, ŵakawona kuti kuteŵetera Chiuta yikaŵa mphingo yayi, kweni kukaŵawovwiranga kuti ŵaŵe na umoyo wakukhorweska chomene.—1 Yohane 5:3.

“Chifukwa joko lane ndipusu na katundu wane ngwakupepuka.” Mwakupambana na ŵalongozgi ŵa visopa awo ŵakaŵako, Yesu wakaŵa wakujiyuyura na wakuzika. (Yohane 7:47-49) Iyo wakaŵa wankhaza yayi, ndipo wakachichizganga munthu kuti wamulondezge yayi. M’malo mwake, wakaŵa walusungu kweniso wambura kusuzga kuyowoya nayo. Nakuti iyo wakakhazganga vinandi yayi kufuma ku ŵalondezgi ŵake. (Mateyu 7:12; Mariko 6:34; Luka 9:11) Yesu wakaŵalongoraso umo ŵangasangira chandulo na lusungu lwa Chiuta na kukondwa chifukwa cha kuŵa na njuŵi yiwemi pamaso pake. (Mateyu 5:23, 24; 6:14) Makhaliro ghawemi gha Yesu ghakapangiskanga kuti ŵanthu ŵanandi ŵize kwa iyo kweniso kuti ŵazomere kuyegha joko lake lipusu na kuŵa ŵasambiri ŵake.

Yesu wakayowoya mazgu gha pa Mateyu 11:28-30 apo wakapharazganga ku Galileya mu 31 C.E. Pa awo ŵakalemba mabuku gha Makani Ghawemi, mpositole Mateyu ndiyo yekha wakalemba mazgu agha. Pakuti pakwamba wakaŵa wakukhomeska misonkho, kweniso wakaŵa Muyuda, Mateyu wakajiwoneranga yekha nkhaza izo ŵanthu bweka ŵakasangananga nazo, mwachiyelezgero misonkho iyo ŵakapelekanga ku Ŵaroma kweniso ŵalongozgi ŵa chisopa cha Chiyuda awo ŵakaŵa ŵavimbundi. Lekani tikukayika yayi kuti wakakhozgeka chomene kuwona Yesu wakugwiliskira ntchito mazaza agho wakapika na Adada ŵake a Yehova, a kuti wacheme ŵanthu ŵakujiyuyura na awo ŵakaphyoka kuti ŵize kwa iyo.—Mateyu 11:25-27.

Buku la Makani Ghawemi ilo wakalemba Mateyu likulongosora makhaliro ghapadera chomene agho Yesu wakalongora pakuŵa Mesiya wakulayizgika kweniso themba la Ufumu wa Chiuta.—Mateyu 1:20-23; Yesaya 11:1-5.

Wonelerani vidiyo yifupi waka iyi yakulongosora mwakudumura ivyo vili mu buku la Mateyu.