“Iwe wamunthu, wakakuphalira icho ntchiwemi. Kasi Yehova wakukhumbachi kwa iwe? Wakukhumba kuchita urunji pera na kuŵa wakugomezgeka, na kwenda mwakujiyuyura na Chiuta wako!”—Mika 6:8, Mang’anamuliro gha Charu Chiphya.

 ‘Wakarongora iwe munthu icho ntchiweme; na icho Yehova wakukhumba, kuchita urunji, na kutemwa lusungu, na kwenda wakujiyuyura na Chiuta wako.’—Mika 6:8, Tumbuka Bible.

 Ntchimi Mika yikulongosora kuti ntchakusuzga chomene yayi kuti ŵanthu ŵakondweske Yehova a Chiuta. (1 Yohane 5:3) Ivyo Chiuta wakukhumba kwa ise vyalongosoreka makora mu fundo zitatu pa vesi ili. Fundo zakwambilira ziŵiri zikulongosora chomene umo munthu wakwenera kuchitira na ŵanji, apo yachitatu yikulongosora vya ubwezi wa munthu na Chiuta.

 “Kuchita urunji.” Chiuta wakukhumba kuti awo ŵakumusopa ŵachitenge vinthu mwaurunji. Ivi vikusazgapo kuti ivyo tikughanaghana na kuchita vikoleranenge na fundo za Chiuta pa nkhani ya icho ntchiwemi na chiheni. (Dotoronome 32:4) Mwachiyelezgero, awo ŵakulondezga fundo za Chiuta ŵakuchita chilichose icho ŵangafiska kuti ŵachitenge vinthu mwaunenesko kweniso kwambura kutemwera, vilije kanthu kuti kwali uyo ŵakuchita nayo vinthu wakufuma nkhu, ngwamtundu wuli, panji wakusanga wuli.—Levitiko 19:15; Yesaya 1:17; Ŵahebere 13:18.

 “Kuŵa wakugomezgeka.” Mazgu agha ghangalembekaso kuti “kuŵa wakugomezgeka mu kutemwa kwako.” (Mika 6:8, mazgu ghamusi) Mu Chihebere chakwambilira, lizgu ilo lili kung’anamulika kuti “kugomezgeka” likung’anamura waka kuŵa wakugomezgeka kwa munyithu yayi, kweni likusazgaposo kulongora lusungu na chiwuravi kwa munyithu, kujumphizga pa ivyo dango likuti tichitenge. Chiuta wakukhumba kuti awo ŵakukhumba kumukondweska ŵalongorenge lusungu na chiwuravi kweniso kuzirwiska panji kuti kughatemwa makhaliro agha. Ichi chikung’anamura kuti awo ŵakumusopa ŵakwenera kukondwa kovwira ŵanji chomene awo ŵakukhumbikwira wovwiri. Nakuti tikuŵa ŵakukondwa para ndise ŵakupa.—Milimo 20:35.

 “Kwenda mwakujiyuyura na Chiuta wako.” Mu Baibolo, lizgu lakuti “kwenda” lingang’anamura “kulondezga umo chinthu chinyake chikwenera kuchitikira.” Munthu wakwenda na Chiuta para wakulondezga nthowa iyo yikumukondweska Chiuta. Nowa ntchiyelezgero chiwemi chomene pa nkhani iyi. Iyo “wakendanga na Chiuta waunenesko” chifukwa wakaŵa murunji mu maso gha Chiuta ndipo wakalongora kuti “wakaŵa wambura kafukwa mu muwiro wake.” (Genizesi 6:9) Mazuŵa ghano, nase ‘tikwenda na Chiuta’ mwa kulondezga ivyo tikusambira mu mazgu ghake Baibolo pa umoyo withu. Kuti tifiske kuchita nthena, tikwenera kuŵa ŵakujiyuyura na kumanya ivyo tikutondeka kuchita makora kweniso tikwenera kuthemba Chiuta pa vyose.—Yohane 17:3; Milimo 17:28; Chivumbuzi 4:11.

 Mika wakaŵa ntchimi mu nyengo ya Ŵaisrayeli kwamba mu 777-717 B.C.E. Pa nyengo iyi, ŵanthu ŵanandi ŵakasopanga vikozgo, kuchita vimbundi, na kukandilizgira pasi ŵanyawo. (Mika 1:7; 3:1-3, 9-11; 6:10-12) Ŵaisrayeli ŵanandi ŵakasulangako fundo za Chiuta izo zikaŵa mu Dango ilo likapika kwa Mozesi, ndipo zikachemekanga kuti Dango la Mozesi. Pa nyengo yimozamoza, ŵanthu ŵanandi ŵakagomezganga maghanoghano ghakubudika ghakuti ŵangamukondweska Chiuta mwa kuchitako waka maluso ghanyake gha chisopa na kupeleka sembe.—Zintharika 21:3; Hoseya 6:6; Mika 6:6, 7.

 Pati pajumpha vyaka vinandi kufuma apo kukaŵira ntchimi Mika, Yesu nayo wakayowoyaso kuti Adada ŵake ŵakutemwa ŵanthu awo ŵakutemwa ŵanyawo, ŵakuchita vinthu mwaurunji, kweniso ŵalusungu, ndipo ŵakutinkha awo ŵakuwoneka waka nga kuti mbakujipeleka kwa Chiuta apo ndimo ŵaliri nadi yayi. (Mateyu 9:13; 22:37-39; 23:23) Mazgu gha Yesu ghakutovwira kumanya ivyo Chiuta wakukhumba kuti awo ŵakumusopa ŵachitenge.

 Wonelerani vidiyo yifupi iyi kuti mumanye ivyo vili mu buku la Mika.