Zintharika 14:1-35
14 Mwanakazi uyo ngwavinjeru nadi wakuzenga nyumba yake,+Kweni chindere chikuyipankhura na mawoko ghake.
2 Uyo wakwenda mu kunyoloka wakopa Yehova,Kweni uyo mendero ghake ngaheni* wakumupepura.
3 Ndodo ya kujikuzga yili mu mulomo wa chindere,Kweni milomo ya ŵavinjeru yiŵavikilirenge.
4 Usange ng’ombe palije, mu chakulyeramo mukuŵa mwakutowa,Kweni nkhongono za ng’ombe zikupambika vuna yinandi.
5 Kaboni wakugomezgeka wakuteta yayi,Kweni kaboni mutesi mvuchi wake mbutesi pera.+
6 Munthu wakugoska wakupenja vinjeru, ndipo wakuvisanga yayi,Kweni munthu wakupulikiska wakumanya luŵiro vinthu.+
7 Khala kutali na chindere,Pakuti pa milomo yake palije icho ungamanyapo.+
8 Na vinjeru, munthu wakuchenjera wakumanya makora nthowa iyo wakwendamo,Kweni ŵazeleza ŵakupusikika* na uchindere wawo.+
9 Vindere vikujisekera para vyabuda,+Kweni ŵakunyoloka ŵakukhumbisiska kuti ŵaphemane na ŵanyawo.*
10 Mtima ukumanya kuŵinya kwake,*Ndipo munthu munyake wangasangwako yayi na chimwemwe chake.
11 Nyumba ya muheni yiparanyikenge,+Kweni hema la wakunyoloka likhalilirenge.
12 Pali nthowa iyo yikuwoneka yakwenelera kwa munthu,+Kweni umaliro wake ni nyifwa.+
13 Mtima ungapulika vyakuŵinya nanga munthu wakuseka,Ndipo kusekelera kungababa chitima.
14 Uyo ngwakupuluka mu mtima wavunenge vipasi vya mendero ghake,+Kweni munthu muwemi wakuvuna njombe ya milimo yake.+
15 Munthu muzeleza wakugomezga mazgu ghalighose,Kweni wakuchenjera wakulanguruka pa mendero ghake ghose.+
16 Wavinjeru wakuchita vinthu mwamahara na kupatukako ku uheni,Kweni chindere chikupwelerako yayi* ndipo chikujithemba.
17 Uyo wakukwiya luŵiro wakuchita uchindere,+Kweni munthu uyo wakughanaghanira dankha* wakutinkhika.
18 Ŵazeleza ŵaharenge uchindere,Kweni ŵakuchenjera ŵakuvwalikika mphumphu yaumanyi.+
19 Ŵanthu ŵaheni ŵasindamenge panthazi pa ŵawemi,Ndipo ŵakwananga ŵajikamenge pa vipata vya ŵarunji.
20 Mukavu wakutinkhika na ŵazengezgani ŵake wuwo,+Kweni musambazi wakuŵa na ŵabwezi ŵanandi.+
21 Uyo wakupepura mzengezgani wake wakwananga,Kweni uyo wakuchitira chiwuravi wakuyuyuka ngwakukondwa.+
22 Asi awo ŵakupangana kuchita chiheni ŵapulukenge?
Kweni awo ŵakukhumbisiska kuchita uwemi ŵasangenge lusungu* na kugomezgeka.+
23 Ntchito yiliyose iyo munthu wakulimbikira kuyichita yili na chandulo,Kweni munthu wakutemwa waka kuyowoya wakavukenge.+
24 Mphumphu ya ŵavinjeru mbusambazi wawo.Kweni uchindere wa ŵazeleza mbuchindere pera.+
25 Kaboni waunenesko wakuponoska umoyo,Kweni muryarya mvuchi wake wose mbutesi pera.
26 Yose uyo wakopa Yehova wali na chigomezgo chakukhora,+Ndipo chiŵenge chiphokwero ku ŵana ŵake.+
27 Kopa Yehova ntchisimi cha umoyo,Kuti munthu wawukeko ku vipingo vya nyifwa.
28 Wumba wa ŵanthu ndiwo mbukuru wa themba,+Kweni muwusi wambura ŵanthu, wakuparanyika.
29 Uyo wakuleka kukalipa luŵiro wali na umanyi ukuru,+Kweni wakaŵefu wakulongora uchindere wake.+
30 Mtima wakuzikira mbumoyo wa thupi,Kweni sanji nkhuvunda kwa viwangwa.+
31 Uyo wakulyera ŵakuyuzgika wakupepura Mlengi wake,+Kweni yose uyo wakuchitira chiwuravi ŵakavu wakumuchindika.+
32 Muheni wawenge chifukwa cha uheni wake,Kweni murunji wasangenge chiphokwero mu kunyoloka kwake.+
33 Vinjeru vikukhala waka chete mu mtima wa munthu wakupulikiska,+Kweni vikujiphara pakati pa vindere.
34 Urunji ukukwezga mtundu,+Kweni kwananga ni soni ku ŵanthu.
35 Themba likukondwa na muteŵeti uyo wakuchita vinthu mwamahara,+Kweni kutukutwa kwake kuli pa uyo wakuchita vyakulengeska.+
Mazgu Ghamusi
^ Panji kuti, “ngaukhuluku.”
^ Pangayowoyekaso kuti, “ŵazeleza ŵakupusika ŵanyawo.”
^ Panji kuti, “ŵakukhumbirana viwemi.”
^ Panji kuti, “kuŵinya kwa umoyo wake.”
^ Panji kuti, “chikukalipa.”
^ Panji kuti, “munthu wa kaghanaghaniro kawemi.”
^ Panji kuti, “chitemwa chakugomezgeka.”
