Kasi Nkhwenera Kubatizika?
MUTU 37
Kasi Nkhwenera Kubatizika
Chongani usange mazgu ghamusi agha ngaunenesko panji ngautesi:
Ubatizo ngwakuzirwa chomene kwa Mkhristu.
□ Unenesko
□ Utesi
Chilato chikuru cha ubatizo ntchakuti munthu waleke kuchita kwananga.
□ Unenesko
□ Utesi
Ubatizo ungawovwira munthu kuti wazakaponoskeke.
□ Unenesko
□ Utesi
Para munthu wandabatizike, Chiuta walije navyo ntchito ivyo wakuchita.
□ Unenesko
□ Utesi
Para ŵanyako ŵabatizika mbwenu ndikuti nawe ndiwe wakunozgeka kubatizika.
□ Unenesko
□ Utesi
USANGE ukulondezga fundo za Chiuta pa umoyo wako, kuŵikapo mtima kuti uŵe paubwezi na Chiuta, kweniso kuphalirako ŵanyako za chipulikano chako, mbwenu ungamba kughanaghana vyakuti ubatizike. Kweni kasi ungamanya wuli kuti ndiwe wakunozgeka kubatizika? Kuti uzgore fumbo ili, tiye tidumbiskane fundo izo wanguchonga pachanya.
● Ubatizo ngwakuzirwa chomene kwa Mkhristu.
Unenesko. Yesu wakati ŵasambiri ŵake ŵakwenera kubatizika. (Mateyu 28:19, 20) Nakuti Yesu nayo wakabatizika. Kuti ulondezge Yesu ukwenera kubatizika, ndipo ungachita ivi para wakura na kusankha wekha kuti ubatizike.
● Chilato chikuru cha ubatizo ntchakuti munthu waleke kuchita kwananga.
Utesi. Ubatizo ukulongora waka pakweru kuti wajipeleka kwa Yehova. Para wajipeleka kwa Yehova chikung’anamura kuti ungaleka kuchita vinthu vyachisisi ivyo wamweneko ukukhumba yayi. Kweni ukujipeleka kwa Yehova chifukwa ukukhumba kuchita vinthu mwakukolerana na fundo zake.
● Ubatizo ungawovwira munthu kuti wazakaponoskeke.
Unenesko. Baibolo likuti ubatizo ungawovwira munthu kuti wazakaponoskeke. (1 Petrosi 3:21) Kweni ichi chikung’anamura kuti para wabatizika ndikuti waponoskeka kale yayi. Munthu wakubatizika chifukwa chakuti wakutemwa Yehova ndipo wakukhumba kumuteŵetera umoyo wake wose.—Mariko 12:29, 30.
● Para munthu wandabatizike, Chiuta walije navyo ntchito ivyo wakuchita.
Utesi. Lemba la Yakobe 4:17 likuti: “Usange munthu wakumanya umo wangachitira icho ntchakwenelera kweni wakuchichita yayi, wakwananga.” Fundo iyi yikukhwaska wose, kwali mbakubatizika panji yayi. Usange ukumanya icho ntchiwemi ndipo ndiwe mulara kuti ungajisankhira wekha icho ntchakwenelera, mbwenu ungadumbiskana na ŵapapi ŵako nkhani iyi panji Mkhristu wakukhwima mwauzimu. Para wachita nthena, mbwenu umanyenge ivyo ungachita kuti ubatizike.
● Para ŵanyako ŵabatizika mbwenu ndikuti nawe ndiwe wakunozgeka kubatizika.
Utesi. Munthu wakwenera kusankha yekha kufumira pasi pa mtima kuti wabatizike. (Salimo 110:3) Ukwenera kubatizika para wamanya kuti kuŵa Kaboni wa Yehova chikung’anamurachi kweniso para wanozgeka kuchita ivyo Ŵakaboni wa Yehova ŵakuchita.—Mupharazgi 5:4, 5.
Ubatizo Ungasintha Munthu
Ubatizo ukovwira munthu kuti wasinthe umoyo wake ndipo wakutumbikika chomene. Kweni para munthu wabatizika wakuŵa na udindo ukuru wakuchita vinthu ivyo wakalayizga apo wakajipelekanga kwa Yehova.
Kasi uli wakunozgeka kubatizika? Para ungabatizika uŵenge wakukondwa chomene. Para wabatizika uŵenge na mwaŵi wakuteŵetera Yehova kweniso uŵenge na umoyo uwemi na wakukondweska.—Mateyu 22:36, 37.
Wona ivyo ungachita kuti uŵe na vilato viwemi kweniso kuti vinthu vikwendere makora.
LEMBA ILO LINGAKOVWIRA
“Mupeleke mathupi ghinu kuŵa sembe yamoyo, yituŵa, na yakuzomerezgeka kwa Chiuta, uwo mbuteŵeti wakupatulika pamoza na nkhongono yinu ya kughanaghana.”—Ŵaroma 12:1.
FUNDO YAKOVWIRA
Pempha ŵapapi ŵako kuti ŵakovwire kusanga munthu mu mpingo, uyo wangakovwira kuti ulute panthazi mwauzimu.—Milimo 16:1-3.
KASI UKUMANYA . . . ?
Ubatizo ngwakuzirwa chomene ndipo “ntchimanyikwiro” chakuti uzakaponoskeke.—Ezekiyeli 9:4-6.
VYAKUTI NICHITE!
Kuti nibatizike, nilimbikire kuti nivimanye makora visambizgo vyakulondezgapo ivi vya mu Baibolo: ․․․․․
Ivyo ningafumba ŵapapi ŵane vyakukhwaskana na nkhani iyi ni ․․․․․
KASI UKUWONA WULI?
● Chifukwa wuli ukwenera kuyiwona mwakupepuka yayi nkhani ya ubatizo?
● Kasi ni vinthu wuli vingapangiska ŵawukirano kuti ŵachimbilire kubatizika?
● Chifukwa wuli ŵawukirano ŵanyake ŵakutondeka kubatizika?
[Mazgu ghakukhozgera]
“Ubatizo ukunovwira kuti nisankhenge vinthu mwamahara na kuleka kuchita vinthu ivyo vinganinjizga mu masuzgo panji ivyo ningadandawura navyo paumaliro.”—Holly
[Bokosi/Chithuzithuzi]
Mafumbo Agho Ŵanthu Ŵakutemwa Kufumba Ghakukhwaskana na Ubatizo
Kasi ubatizo ukwimira vichi? Para wabizgika mu maji na kuzuwuka, chikulongora kuti waleka kuchita vyakukhumba vyako ndipo sono uchitenge ivyo Yehova wakukhumba.
Kasi kujipeleka kwa Yehova chikung’anamurachi? Chikung’anamura kuti sono Yehova ndiyo wali na mazaza pa umoyo wako, ndipo ukumulayizga kuti uŵikenge vyakukhumba vyake pa malo ghakwamba kuluska vyako. (Mateyu 16:24) Ntchakuzirwa chomene kujipeleka kwa Yehova mu lurombo pambere mundabatizike.
Kasi ukwenera kuchita vichi pambere undabatizike? Ukwenera kuchita ivyo Mazgu gha Chiuta ghakuyowoya na kuphalirako ŵanyako vya chipulikano chako. Ukwenera kulomba na kusambira Mazgu gha Chiuta kuti uŵe nayo paubwezi wakukhora. Ukwenera kusankha wekha kuti uteŵetere Yehova, kuchichizgika waka yayi.
Kasi pali vyaka vyakuŵikika ivyo munthu wakwenera kubatizika? Vyaka vilije ntchito kuti munthu wabatizike. Ndipouli, ukwenera kuŵa wakukhwima mwauzimu na kupulikiska ng’anamuro la kujipeleka kwa Yehova.
Kasi ungachita wuli usange ukukhumba kubatizika kweni ŵapapi ŵako ŵakuti ulindilirepo dankha? Panji ŵakukhumba kuti umanye dankha vinyake vya umo Mkhristu wakwenera kuchitira vinthu. Ungachita makora kuŵapulikira, ndipo pa nyengo iyi ungalutilira kukhozga ubwezi wako na Yehova.—1 Samuyeli 2:26.
[Bokosi pa peji]
Vyakuti Uchite
Kasi Ukukhumba Kubatizika?
Kuti umanye usange ndiwe ŵakunozgeka kubatizika, zgora mafumbo kweniso wona fundo zakulondezgapo izi. Ŵazga dankha malemba pambere undalembe mazgoro.
Kasi ukulongora wuli kuti ukugomezga Yehova?—Salimo 71:5. ․․․․․
Kasi ukulongora wuli kuti uli kusambizga nkhongono yako yakamanyiro kupambaniska pakati pa chiwemi na chiheni?—Ŵahebere 5:14. ․․․․․
Kasi ukulomba kalinga? ․․․․․
Kasi ukutemwa kulomba vichi? Kasi ivyo ukulomba vikulongora kuti ukutemwa Yehova?—Salimo 17:6. ․․․․․
Lemba ivyo ukukhumba kuchita vyakukhwaskana na lurombo. ․․․․․
Kasi ukusambira pawekha mwakukhazikika?—Joshuwa 1:8. ․․․․․
Kasi ukuchitaso vichi para ukusambira pawekha? ․․․․․
Lemba ivyo ukukhumba kuchita para ukusambira pawekha. ․․․․․
Kasi ukukondwa na uteŵeti wako? (Viyelezgero: Kasi ungalongosolerako ŵanyako visambizgo vyakwambilira vya mu Baibolo? Kasi ukuwelerako ku ŵakunweka? Kasi ukuyezeska kuti uŵe na sambiro la Baibolo?)
□ Enya □ Yayi
Kasi ukuluta mu uteŵeti nanga ŵapapi ŵako ŵangakhala?—Milimo 5:42.
□ Enya □ Yayi
Lemba ivyo ukukhumba kuchita vyakukhwaskana na uteŵeti.—2 Timote 2:15. ․․․․․
Kasi ukuluta mwakukhazikika ku maungano panji yayi?—Ŵahebere 10:25. ․․․․․
Kasi ukutorapo chigaŵa pa maungano? ․․․․․
Kasi ukuluta ku maungano nanga ŵapapi ŵako ŵangakhara?
□ Enya □ Yayi
Kasi ukukondwa kuchita khumbo la Chiuta?—Salimo 40:8.
□ Enya □ Yayi
Lemba ivyo ŵanyako ŵakakuchichizganga kuti uchite kweniso umo ukatondera?—Ŵaroma 12:2. ․․․․․
Kasi ukuchita wuli kuti umutemwenge chomene Yehova?—Yuda 20, 21. ․․․․․
Kasi ungalutilira kuteŵetera Yehova nanga ŵapapi kweniso ŵabwezi ŵako ŵangaleka?—Mateyu 10:36, 37.
□ Enya □ Yayi
[Chithuzithuzi]
Munthu wakwenera yayi kusintha para wajipeleka kwa Yehova na kubatizika, nga umo munthu wakangalekera kusintha vilapo vya nthengwa
Panji Mungatemwa Kuŵerengaso Nkhani Izi
ŴACHINYAMATA
Ivyo Ŵachinyamata Ŵakufumba
Ivyo ŵanyamata na ŵasungwana ŵakufumba pa nkhani ya kugonana, ŵabwezi, ŵapapi, sukulu, na nkhani zinyake.
