Apo Yehova wakambiska mbumba, wakapeleka udindo wa kupwelelera ŵana ku ŵapapi. (Ŵakolose 3:20) Ni mulimo wa ŵapapi kusambizga mwana kutemwa Yehova ndiposo kuti wazakajiyimire payekha para wakura. (2 Timote 1:5; 3:15) Mukweneraso kumanya ivyo vili mu mtima wa mwana winu. Kweni ivyo mukucita ndivyo ni vyakuzirwa comene. Kuti musambizge makora mwana winu mazgu gha Yehova, mukwenera dankha kughaŵika mu mtima winu.—Salmo 40:8.

IVYO BAIBOLO LIKUYOWOYA: ‘Mupulikenge luŵiro, muzikirenge pakuyowoya.’ (Yakobe 1:19) Mukukhumba kuti ŵana ŵinu ŵayowoyenge namwe mwakufwatuka. Para ŵana ŵakukhumba kuyowoya namwe, lekani kuŵa nga mwatangwanika. Para mukuyezgayezga kuti panyumba pinu paŵe mtende, ŵana ŵinu ŵaŵenge ŵakufwatuka kuyowoya namwe. (Yakobe 3:18) Para ŵakuwona nga muŵakalipirenge, ŵafwatukenge yayi. Zikirani, na kuŵaphalira kuti mukuŵatemwa.—Mateyu 3:17; 1 Ŵakorinte 8:1.

IVYO MUNGACITA:

• Para ŵana ŵakukhumba kuyowoya namwe, lekani kuŵa nga mwatangwanika

• Nyengo zose mudumbiskanenge na ŵana ŵinu, pa masuzgo pera yayi

IVYO BAIBOLO LIKUYOWOYA: ‘Uyo wakutegherezga makora mazgu wasangenge viwemi.’ (Zintharika 16:20) Nyengo zinyake mukwenera kughanaghanirapo mazgu gha ŵana ŵinu kuti mumanye ivyo ŵakung’anamura. Kanandi ŵana ŵakutalulira panji ŵangayowoya vinyake apo ŵakung’anamura vinyake. ‘Uyo wakuzgora mazgu apo wacali wandapulikiske, mbucindere.’ (Zintharika 18:13) Kukalipa luŵiro yayi.—Zintharika 19:11.

IVYO MUNGACITA:

• Kumudumulizga yayi mwana winu panji kukwiya, nanga ni para ivyo wakuyowoya mukukolerana navyo yayi

• Kumbukani umo imwe mukacitiranga apo mukaŵa msinkhu wa mwana winu. Kasi ni vici ivyo mukawonanga nga ni vyakuzirwa kwa imwe?

IVYO BAIBOLO LIKUYOWOYA: “Mwana wane, pulika cisambizgo ca ŵawuso, ungasidanga [cara] dango la ŵanyoko.” (Zintharika 1:8) Yehova wali kupeleka mazaza ghakulanga ŵana kwa dada na mama. Mukwenera kusambizga ŵana ŵinu kuti ŵamupulikiraninge na kumucindikani. (Ŵaefeso 6:1-3) Ŵana ŵakumanya luŵiro usange ŵapapi ŵandakolerane. (1 Ŵakorinte 1:10) Usange mukukolerana yayi na ivyo munyinu wayowoya, kumususkira pa ŵana yayi cifukwa ŵangaleka kumucindikani.

IVYO MUNGACITA:

• Dumbiskanani cilango ico mungapeleka ku ŵana ŵinu

• Usange mwapambana maghanoghano pa nkhani ya cilango ico mungapeleka ku ŵana ŵinu, mupulikiskani munyinu

IVYO BAIBOLO LIKUYOWOYA: “Lera mwana mu nthowa iyo wakwenera kwendamo.” (Zintharika 22:6) Kuti mulere makora ŵana ŵinu vikucitika vyekha yayi. Mukwenera kunozgekera ivyo mucitenge pakusambizga ŵana. Cimoza cake nkhupeleka cilango. (Salmo 127:4; Zintharika 29:17) Cilango cikung’anamura kupanisa pera yayi. Kweni cikung’anamuraso kovwira ŵana kuti ŵapulikiske vifukwa ivyo mwaŵapira malango. (Zintharika 28:7) Kweniso ŵasambizgani kuti ŵatemwenge na kupulikiska fundo za mu Baibolo. (Salmo 1:2) Ici ciŵawovwirenge kuti ŵaŵe na njuŵi yiwemi.—Ŵahebere 5:14.

IVYO MUNGACITA:

• Ŵana ŵinu ŵakwenera kugomezga kuti Ciuta waliko

• Ŵasambizgani kuti ŵamanye na kugega ŵanthu awo ŵakugona ŵana, na vinthu viheni nga ivyo vikusangika pa intaneti.