IVYO BAIBOLO LIKUYOWOYA PA NKHANI YA | UMOYO
Umoyo
Visopa vikuyowoya vyakupambana pa nkhani ya umoyo (mzimu) na icho chikuchitika para munthu wafwa. Kweni ivyo Baibolo likuyowoya ni vyakupulikikwa makora.
Kasi mzimu ukufwa yayi?
IVYO ŴANTHU ŴAKUYOWOYA
Ŵanandi ŵakugomezga kuti mzimu ukufwa yayi. Ŵanthu ŵanyake ŵakuti para munthu wafwa mzimu wake ukufumamo na kukababikaso nga ni munthu ku malo ghanyake. Kweniso ŵanyake ŵakugomezga kuti para munthu wafwa, wakuluta ku malo ghanyake, kuchanya panji ku Gehena.
IVYO BAIBOLO LIKUYOWOYA
Baibolo likuyowoyapo yayi vyakuti mzimu ukuleka kufwa. Kweni likuti ukufwa. Ntchimi Ezekiyeli iyo Chiuta wakayituma kulembako Baibolo yikati mzimu ukufwa. Nyengo zinyake mazgu agho mu Baibolo ghang’anamulika kuti ‘chitanda,’ mu Chihebere ŵakuti mzimu wakufwa. (Levitiko 21:11) Uwu mbukaboni wakuti Baibolo likusambizgapo yayi kuti mzimu ukuleka kufwa.
Baibolo likuti: ‘Mzimu uwo ukwananga ufwenge.’—Ezekiyeli 18:20, Tumbuka Bible.
Kasi mzimu ukulekana na thupi?
IVYO ŴANTHU ŴAKUYOWOYA
Ŵanyake ŵakuti mzimu ukuŵa pamoza na thupi para munthu ngwamoyo, kweni para wafwa ukufumamo.
IVYO BAIBOLO LIKUYOWOYA
Mu Baibolo pa Genizesi 46:18, pakuyowoya kuti mwanakazi wakababa ŵanthu. Mu Chihebere pa vesi ili pali mazgu ghakuti “maumoyo” panji kuti mizimu. Nakuti lizgu lakuti “umoyo” lingang’anamulikaso kuti “chinthu icho chikuthuta.” Nyengo zinyake lizgu ili likuyowoyaso za vinyama. Nakuti Baibolo likulongosora kuti umoyo ukudoka kurya. (Dotoronome 12:20, Tumbuka Bible) Usange umoyo ukuŵa pamoza na thupi yayi, kasi ungathuta panji kurya? Mu Baibolo lizgu lakuti “umoyo” likung’anamura munthu yose wamsuma.
‘Ŵanthu wose awo wakababa ŵakaŵa 16.’—Genizesi 46:18.
Kasi ntchivichi chikuchitika para munthu wafwa?
IVYO BAIBOLO LIKUYOWOYA
Malemba ghakuti para munthu wafwa, wakumanya kalikose yayi. Pakuyowoya za munthu uyo wafwa, Baibolo likuti: “Ku Dindi uko ukuluta kulije mulimo, maghanoghano, kumanya, panji vinjeru.” (Mupharazgi 9:10) Apa Malemba ghakutiphalira makora chomene kuti para munthu wafwa “wakuwelera ku fuvu. Pa zuŵa leneliro maghanoghano ghake ghakumara.” (Salimo 146:4) Pakuti ŵakumanya kanthu yayi, lekani kanandi Baibolo likuti wakufwa wakuyana waka na munthu uyo ‘wagona’ tulo.—Mateyu 9:24.
CHIFUKWA WULI FUNDO IZI NI ZAKOVWIRA?
Para ŵabali ŵinu ŵali kufwa, mungatemwa kuti mumanye mazgoro gha mafumbo agha: Kasi ŵali nkhu? Kasi vinthu vili wuli kwa iwo? Kasi ŵakusuzgika? Pakuti Baibolo likuti ŵakufwa ŵakumanya kanthu yayi, tikukondwa kumanya kuti ŵakusuzgika yayi. Tikukondwaso chomene kumanya kuti Yehova wali kulayizga kuti wazamuwuska ŵakufwa, ŵazamuŵaso ŵamoyo.—Yesaya 26:19.
“Ŵakufwa ŵakumanya kalikose chara.”—Mupharazgi 9:5.
Panji Mungatemwa Kuŵerengaso Nkhani Izi
GONGWE LA MULINDA
Utesi Uwo Wapangiska Ŵanthu Kuwona Kuti Ciuta Ngwankhaza
Ŵanandi ŵakugomezga kuti Ciuta wakulanga ku moto ŵanthu ŵakwananga. Kasi Ciuta wakucita vinthu viheni? Kasi nchivici cikucitika para munthu wafwa?
MAFUMBO AGHO BAIBOLO LIKUZGORA
Kasi Mzimu Ni Vichi?
Kasi ntchinthu chinyake icho chili mukati mwinu? Kasi chikulutilira kuŵa na umoyo para mwafwa?
