1, 2. Kasi mu Malichi 2018 tichitenge vichi, ndipo chifukwa wuli ntchapadera? (Wonani chithuzi chakwamba.)

PA Malichi 31, 2018, para zuŵa lanjira, ŵanthu ŵa Chiuta pamoza na ŵanthu ŵanyake mamiliyoni ghanandi pa charu chose chapasi ŵazamuluta ku Mugonero wa Fumu, uwo ukuchitika kamoza pa chaka. Ŵanthu ŵanandi ŵazamuwungana pamoza kuti ŵakumbukire nyifwa ya Khristu. Chaka chilichose, Mugonero wa Fumu ukovwira ŵanthu kukolerana chomene kuluska ungano uliwose pa charu chapasi.

² Yehova na Yesu ŵakwenera kuti ŵakukondwa chomene pa zuŵa ili para ŵakuwona kuti pa ora lililose ŵanthu mamiliyoni ghanandi pa charu chose ŵakuwungana kuti ŵachite mwambo uwu. Baibolo likayowoya kale kuti ‘mzinda ukuru, uwo pazamuŵavya munthu uyo wangafiska kuwupenda, wakufuma mu mitundu yose na mafuko na ŵanthu na malulimi’ uzamuchemerezga kuti: “Chiponosko chithu chafuma kwa Chiuta withu, uyo wakukhala pa chitengo, na kwa Mwana wa mberere.” (Chivu. 7:9, 10) Ntchakukondweska chomene kuti chaka chilichose tikuchindika Yehova na Yesu para tikuchita mwambo uwu.

3. Ni mafumbo wuli agho ghazgolekenge mu nkhani iyi?

 ³ Pali mafumbo ghanyake agho ghazgorekenge mu nkhani iyi. (1) Kasi waliyose payekha wanganozgekera wuli kuti wazakaŵepo pa Chikumbusko na kupindura? (2) Kasi Chikumbusko chikovwira wuli ŵanthu ŵa Chiuta kuti ŵaŵe ŵakukolerana? (3) Kasi ise patekha tingachita wuli kuti tilutilire kukolerana na ŵabali ŵithu? (4) Kasi pazamuŵa Chikumbusko chaumaliro? Usange ni nthena, mphawuli?

4. Chifukwa wuli nyengo zose ntchakuzirwa kusangikapo pa Chikumbusko?

⁴ Ghanaghanirani uwemi wa kuluta ku Chikumbusko. Kumbukani kuti maungano ni nthowa yimoza yakusopera Yehova. Yehova na Yesu ŵakuwona awo ŵakuyezgayezga kuti ŵize pa Chikumbusko chifukwa ni ungano wakuzirwa chomene pa chaka. Tikukhumba Yehova na Yesu ŵawonenge kuti tikukhala bweka yayi ku Chikumbusko, pekha para talwara chomene panji vinthu vyasuzga chomene. Para vyakuchita vithu vikulongora kuti tikuwona maungano kuŵa ghakuzirwa, Yehova wakusunga zina lithu mu “buku la chikumbusko,” iloso ni “buku la umoyo.” Mu buku ili muli kulembeka mazina gha awo ŵazamusanga umoyo wamuyirayira.—Mal. 3:16; Chivu. 20:15.

5. Apo Chikumbusko chikusendelera, kasi ‘tingajipima wuli usange tili mu chipulikano’?

⁵ Apo Chikumbusko chikusendelera, tingapatura nyengo ya kulomba na kusanda ubwezi withu na Yehova. (Ŵerengani 2 Ŵakorinte 13:5.) Kasi tingachita wuli nthena? Tikwenera kulutilira ‘kupima usange tili mu chipulikano.’ Kuti tijipime makora, tikwenera kujifumba kuti: ‘Kasi nkhugomezga nadi kuti nili mu gulu ilo Yehova wali kusankha kuti lifiske khumbo lake? Kasi nkhuyezgayezga kupharazga makani ghawemi gha Ufumu na kusambizga ŵanthu? Kasi ivyo nkhuchita vikulongora kuti nkhugomezga kuti tili mu mazuŵa ghaumaliro, ndipo ulamuliro wa Satana umarenge sonosono? Kasi nichali kutemwa Yehova na Yesu nga umo nkhachitiranga apo nkhajipatuliranga kwa Yehova Chiuta?’ (Mat. 24:14; 2 Tim. 3:1; Heb. 3:14) Tingajiyezga umo tiliri usange tingaghanaghanira mazgoro gha mafumbo agha.

6. (a) Kasi tingachita wuli kuti tizakasange umoyo wamuyirayira? (b) Kasi mulara munyake wakunozgekera wuli Chikumbusko chaka chilichose? Kasi namwe munganozgekera wuli?

⁶ Ŵerengani na kughanaghanirapo Malemba agho ghakuyowoya za kuzirwa kwa Chikumbusko. (Ŵerengani Yohane 3:16; 17:3.) Kuti tizakasange umoyo wamuyirayira tikwenera ‘kumanya’ Yehova na ‘kupulikana’ mwa Yesu, uyo ni Mwana wapadera wa Chiuta. Apo mukunozgekera Chikumbusko, sankhani na kuŵerenga nkhani izo zingamovwirani kuti muŵe paubwezi na Yehova ndiposo Yesu. Wonani ivyo mubali munyake uyo wateŵetera nga mulara nyengo yitali wakuchita. Kwa vyaka vinandi, wakuŵika pamoza nkhani zakupambanapambana za mu Gongwe la Mulinda izo zikuyowoya vya Chikumbusko na chitemwa icho Yehova na Yesu ŵali kutilongora. Para Chikumbusko chili pafupi, wakuŵerengaso nkhani izi na kughanaghanira kuzirwa kwa Chikumbusko. Nyengo zinyake wakusangaso nkhani zinyake na kusazgirapo pa izo wali kusunga. Mulara uyu wawona kuti chaka chilichose wakusambira vinthu viphya para wakuŵerengaso nkhani izi kweniso para wakuŵerenga na kughanaghanirapo Malemba gha mu nyengo ya Chikumbusko. Kweni chakuzirwa chomene ntchakuti chaka chilichose ubwezi wake na Yehova kweniso Yesu ukukura chomene. Para nase tingachita nthena, vingatovwira kuti titemwenge chomene Yehova na Yesu ndipo tipindurenge na Chikumbusko.

7. (a) Kasi Yesu wakalomba vichi apo wakachitanga Mugonero wa Fumu wakwamba? (b) Ntchivichi chikulongora kuti Yehova wali kuzgora lurombo lwa Yesu?

⁷ Mu usiku uwo Mugonero wa Fumu wakwamba  ukachitikira, Yesu wakalomba kuti ŵasambiri ŵake ŵaŵe ŵamoza kweniso kuti ŵaŵe ŵakukolerana nga umo iyo na Adada ŵake ŵakuchitira. (Ŵerengani Yohane 17:20, 21.) Yehova wali kuzgora nadi lurombo lwa Mwana wake wakutemweka. Panyengo yasono ŵanthu mamiliyoni ghanandi ŵakugomezga kuti Yehova wakatuma Mwana wake. Chikumbusko chikupambana na maungano ghanyake gha ŵanthu ŵa Chiuta chifukwa chikupeleka ukaboni wambura kususkika wakuti Ŵakaboni ŵa Yehova mbakukolerana nadi. Pa zuŵa la Chikumbusko, ŵanthu ŵakufuma mu mitundu yakupambanapambana pa charu chose ŵakuwungana pa malo ghakusoperapo. Mu vigaŵa vinyake, ŵanthu ŵakuŵikako mahara yayi para ŵanthu ŵa mitundu yakupambanapambana ŵawungana kuti ŵasope Chiuta ndipo ŵanyake vikuŵakwiyiska. Kweni Yehova na Yesu ŵakukondwa chomene kuwona ŵanthu ŵakukolerana.

8. Ni uthenga wuli uwo Yehova wakapeleka kwa Ezekiyeli?

⁸ Taŵateŵeti ŵa Yehova tikuzizwa yayi kuti tikukolerana chomene. Yehova wakayowoyerathu kuti ivi vizamuchitika. Wonani uthenga uwo wakaphalira ntchimi Ezekiyeli wakukhwaskana na tumakuni tuŵiri twakubamphikana, kakhuni ‘ka Yuda’ na kakhuni ‘ka Yosefe.’ (Ŵerengani Ezekiyeli 37:15-17.) Nkhani ya “Mafumbo Ghakufumira ku Ŵaŵazgi” iyo yili mu Gongwe la Mulinda la Julayi 2016 yikuti: ‘Kwizira mwa ntchimi Ezekiyeli, Yehova wakachima kuti Ŵaisrayeli ŵazamuwelera ku Charu cha Layizgano ndipo ŵazamuŵaso mtundu umoza wakukolerana. Kweniso uchimi uwu ukayowoyerathu kuti ŵanthu ŵa Chiuta ŵazamuŵa ŵakukolerana mu mazuŵa ghaumaliro.’

9. Kasi uchimi wa Ezekiyeli ukufiskika wuli chaka chilichose pa Chikumbusko?

⁹ Kwambira mu chaka cha 1919 kuya munthazi, Yehova wakamba kuwunganya Ŵakhristu ŵakuphakazgika, awo ŵakwimira kakhuni ka “Yuda,” na kuŵawovwira kuti ŵaŵeso ŵakukolerana. Pamanyuma, ŵanandi awo ŵakaŵa na chilindizga chakuzakakhala pa charu chapasi, awo ŵakwimira kakhuni ka “Yosefe,” ŵakakolerana na Ŵakhristu ŵakuphakazgika. Ndipo magulu ghaŵiri agha ghakaŵa “mskambo umoza.” (Yoh. 10:16; Zek. 8:23) Yehova wakalayizga kuti wazamubamphika tumakuni tuŵiri utu kuti kaŵe kakhuni kamoza mu woko lake. (Ezek. 37:19) Panyengo yasono magulu ghaŵiri agha ghakuteŵetera lumoza mwakukolerana ndipo Fumu yawo njimoza, Yesu Khristu, uyo uchimi ukati ni ‘muteŵeti wa Chiuta, Davide.’ (Ezek. 37:24, 25) Magulu ghaŵiri agha ghakulongora kuti ngakukolerana nadi nga umo buku la Ezekiyeli likayowoyera. Chaka chilichose ŵakuphakazgika awo ŵachali pa charu chapasi na ŵa “mberere zinyake” ŵakuwungana pamoza na kuchita Chikumbusko cha nyifwa ya Khristu. Kweni kasi waliyose wa ise wangachita wuli kuti tilutilire kukolerana?

10. Kasi ŵanthu ŵa Chiuta ŵangachita wuli kuti ŵalutilire kukolerana?

¹⁰ Chinthu chakwamba icho chingatovwira kuti tilutilire kukolerana, nkhujiyuyura. Apo Yesu wakaŵa pa charu chapasi, wakaphalira ŵasambiri ŵake kuti ŵakwenera kuŵa ŵakujiyuyura. (Mat. 23:12) Para tili ŵakujiyuyura tijitukumurenge yayi nga umo ŵanthu ŵakucharu ŵakuchitira. Usange tili ŵakujiyuyura, tijilambikenge ku awo ŵakutilongozga, ndipo viwovwirenge kuti tilutilire kukolerana mu mpingo. Kweni chakuzirwa chomene ntchakuti Chiuta wakukondwa para tikujiyuyura chifukwa “wakususka ŵakujikuzga, kweni ŵakujiyuyura wakuŵapa lusungu lukuru.”—1 Pet. 5:5.

11. Kasi pali uwemi wuli para tikughanaghanira ng’anamuro la chingwa na vinyo ivyo vikuŵa pa Chikumbusko?

¹¹ Chinthu chachiŵiri icho chingatovwira kuti tilutilire kukolerana nkhughanaghanirapo ng’anamuro la chingwa na vinyo ivyo vikuŵa pa  Chikumbusko. Para Chikumbusko chili pafupi, chomenechomene pa zuŵa la Chikumbusko, tikwenera kughanaghanira ivyo chingwa chambura nthukumusi kweniso vinyo vikwimira. (1 Kor. 11:23-25) Chingwa chikwimira thupi la Yesu lambura zakwananga ilo wakapeleka kuŵa sembe. Vinyo likwimira ndopa zake izo wakathiska chifukwa cha ise. Kweni kumanya waka ng’anamuro la chingwa na vinyo nkhwakukwana yayi. Kumbukani kuti sembe iyo Khristu wakapeleka yikutisambizga vinthu viŵiri vyakuzirwa. Chakwamba, yikutisambizga kuti Yehova wakutitemwa chomene lekani wakatipa Mwana wake. Chachiŵiri, Yesu nayo wakutitemwa chomene lekani wakazomera kuzakapeleka umoyo wake chifukwa cha ise. Para tikughanaghanira chitemwa icho Yehova na Yesu ŵali kutilongora, nase tikwenera kuŵatemwa. Ndipo chifukwa chakuti ise na Ŵakhristu ŵanyithu tikutemwa Yehova, chitemwa ichi chili nga ni mkusa uwo ukutikakilira pamoza ndipo chikutovwira kuti tilutilire kukolerana.

12. Mu ntharika yakuyowoya za themba ilo likakhumbanga kuti muzga wake wawezge ngongoli, kasi Yesu wakutisambizga kuti Yehova wakukhumba vichi?

¹² Chinthu chachitatu icho chingatovwira kuti tilutilire kukolerana nkhugowokera ŵanyithu. Para tikugowokera ŵanyithu awo ŵatibudira, tikulongora kuti tikuwonga sembe ya Khristu chifukwa yawovwira kuti zakwananga zithu zigowokereke. Wonani ntharika ya Yesu iyo yili pa Mateyu 18:23-34. Jifumbani kuti: ‘Kasi nkhulondezga ivyo Yesu wakayowoya? Kasi nkhuzikira nawo ŵabali na ŵadumbu na kuŵapulikiska? Kasi nili wakunozgeka kuŵagowokera awo ŵaninangira?’ Mbunenesko kuti zakwananga zikupambana, pali zinyake izo taŵanthu ŵakwananga vikutisuzga kugowoka. Kweni ntharika iyi yikutisambizga kuti Yehova wakukhazga kuti tigowokerenge ŵanyithu. (Ŵerengani Mateyu 18:35.) Yesu wakayowoya kuti Yehova watigowokerenge yayi usange tikuleka kugowokera ŵabali ŵithu. Fundo iyi njakuzirwa chomene. Para tikupulikira ivyo Yesu wakasambizga na kugowokera ŵanyithu tiŵenge ŵakukolerana mu mpingo.

13. Kasi tingachita wuli kuti tiŵe ŵakukolerana na ŵanyithu?

¹³ Para tikugowokera ŵanyithu, tikulongora kuti tikutemwa mtende. Kumbukani fundo iyo mpositole Paulosi wakayowoya. Wakati  tiyezgeyezge “kusungilira umoza wa mzimu mu chakukakira cha mtende.” (Efe. 4:3) Mu nyengo ya Chikumbusko, chomenechomene pa zuŵa la Chikumbusko, ghanaghaniranipo chomene umo mukuchitira na ŵanyinu. Jifumbani kuti: ‘Kasi nkhumanyikwa kuti nkhusunga vyakusingo? Kasi ŵanthu ŵakunimanya kuti nkhukolerana na ŵanyane ndipo nkhuyezgayezga kuŵa nawo pamtende?’ Agha ni mafumbo ghakuzirwa chomene ghakuti tighanaghanirepo mu nyengo iyi ya Chikumbusko.

14. Kasi tingachita wuli kuti ‘tizizipizgiranenge mu chitemwa’?

¹⁴ Chinthu chachinayi icho tingachita kuti tikoleranenge mu mpingo nkhulondezga Yehova, Chiuta wachitemwa. (1 Yoh. 4:8) Tileke kuyowoya za ŵabali na ŵadumbu ŵithu kuti, “Nkhuŵatemwa waka kweni nkhukhumba yayi kuchezga nawo.” Maghanoghano agha ghakupambana na fundo iyo Paulosi wakayowoya yakuti ‘tizizipizgiranenge mu chitemwa.’ (Efe. 4:2) Paulosi wakayowoya waka kuti ‘tizizipizgiranenge’ yayi. Wakasazgirako mazgu ghakuti tichitenge nthena “mu chitemwa.” Pali mphambano pakati pa kuzizipizga waka na kuzizipizga mu chitemwa. Mu mipingo yithu muli ŵanthu ŵakupambanapambana awo Yehova wali kuŵaguza kuti ŵamusopenge. (Yoh. 6:44) Yehova wakuŵatemwa, lekani wali kuŵaguzira kwa iyo. Usange Yehova wakuŵatemwa, kasi chingaŵa chamahara kuti ise tiŵatinkhenge? Tikwenera kulongora chitemwa icho Yehova wakutiphalira kuti tilongorenge.—1 Yoh. 4:20, 21.

15. Kasi tikumanya wuli kuti tizamuleka kuchita Chikumbusko?

¹⁵ Zuŵa linyake Chikumbusko chizamuchitika kaumaliro. Tikumanya wuli? Mu kalata iyo Paulosi wakalembera Ŵakorinte, wakaphalira Ŵakhristu ŵakuphakazgika kuti para ŵakukumbukira nyifwa ya Yesu, ‘ŵakulutilira kupharazga nyifwa ya Fumu, m’paka yize.’ (1 Kor. 11:26) Mazgu ghakuti “yize” agho Paulosi wakayowoya apa ghakuyana waka na agho Yesu wakayowoya apo wakayowoyanga za ‘kwiza’ kwake mu mazuŵa ghaumaliro. Apo wakayowoyanga kuti kuzamuŵa suzgo yikuru, Yesu wakati: “Chimanyikwiro cha Mwana wa munthu chizamuwonekera kuchanya. Mafuko ghose gha charu chapasi ghazamujipamantha chifukwa cha chitima, ndipo ŵazamuwona Mwana wa munthu wakwiza pa mabingu ghakuchanya pamoza na nkhongono na uchindami ukuru. [Yesu] wazamutuma ŵangelo ŵake pamoza na kulira kwankhongono kwa mbata, ndipo ŵazamuwunganya pamoza ŵakusoleka ŵake kufuma ku mphepo zinayi, kufuma ku chigoti chimoza cha kuchanya m’paka ku chigoti chinyake.” (Mat. 24:29-31) ‘Ŵakusoleka ŵazamuwunganyika’ pamoza panyengo iyo Ŵakhristu wose ŵakuphakazgika awo ŵachali pa charu chapasi ŵazamutolekera kuchanya. Ivi vizamuchitika para chigaŵa chakwamba cha suzgo yikuru chajumpha, kweni pambere Aramagedoni yindambe. Ŵa 144,000 wose ŵamuŵa na Yesu kuchanya pakuthereska mafumu gha pa charu chapasi. (Chivu. 17:12-14) Chikumbusko chizamuchitikaso yayi para ŵakuphakazgika wose awo ŵachali pa charu chapasi ŵaluta kuchanya, chifukwa Yesu wazamuŵa kuti ‘wiza.’

16. Chifukwa wuli mukwenera kuyezgayezga kuti muzakaŵepo pa Chikumbusko?

¹⁶ Tiyeni tiyezgeyezge kuti tizakasangikepo pa Chikumbusko pa Malichi 31, 2018, na kuzakapindura nacho. Tiyeni tilombe Yehova kuti watovwire kuti tikoleranenge na Ŵakhristu ŵanyithu. (Ŵerengani Salimo 133:1.) Kumbukani kuti zuŵa linyake tizamuchita Chikumbusko chaumaliro. Panyengo yasono, tiyeni tiyezgeyezge kuti tizakaŵepo pa Chikumbusko, na kuwona kuti ntchakuzirwa chomene kukolerana panyengo iyi.