Yesu wakasambizganga ŵanthu kuŵa ŵamtende. Kweni zuŵa linyake wakaphalira ŵapositole ŵake kuti: “Mungaghanaghananga kuti nkhizira kuzakaŵika mtende pa charu chapasi, nkhizira kuzakaŵikapo mtende chara, kweni lupanga. Chifukwa nkhizira kuzakapatura mwana mwanalume na awiske, mwana msungwana na anyina, mkamwana na nyinavyara.” (Mat. 10:34, 35) Kasi Yesu wakang’anamurangachi?

Yesu wakakhumbanga kuti ŵanthu ŵamumbumba yimoza ŵapambane yayi, kweni wakamanyanga kuti visambizgo vyake vipangiskenge kuti mbumba zinyake zipatukane. Ntheura, awo ŵakakhumbanga kuŵa ŵasambiri ŵa Khristu na kubatizika ŵakeneranga kumanya masuzgo agho ŵakumanenge nagho chifukwa cha ivyo ŵasankha. Nyengo zinyake muwoli panji mfumu wawo uyo ni Kaboni yayi kweniso na ŵanyake ŵamumbumba yawo ŵaŵasuskenge, na kupangiska kuŵa chakusuzga kulutilira kuŵa ŵakugomezgeka ku visambizgo vya Khristu.

Baibolo likuchiska Ŵakhristu kuti ŵaŵenge “pamtende na ŵanthu wose.” (Rom. 12:18) Kweni visambizgo vya Yesu vingaŵa nga ni “lupanga” mu mabanja ghanyake. Ivi vikuchitika para munyake mu mbumba wazomera visambizgo vya Yesu apo ŵanyake ŵakukana panji kususka. Para vyaŵa nthena, ŵachibali ŵakuzgoka “ŵalwani” ŵa munthu uyo wasambira unenesko.—Mat. 10:36.

Ŵasambiri ŵa Khristu awo ŵakukhala mu mbumba izo ŵakupambana visopa, nyengo zinyake ŵakukumana na masuzgo agho ghakuyezga chitemwa chawo pa Yehova na Yesu. Mwachiyelezgero, ŵabali ŵawo awo Mbakaboni yayi ŵangaŵachichizga kuti ŵakondwelerenge maholide agho ngachisopa. Para vyaŵa nthena ŵakwenera kusankha kuti kasi ŵakwenera kukondweska njani? Yesu wakayowoya kuti: “Uyo wakutemwa chomene awiske panji anyina kuluska ine, ngwakwenelera ine chara.” (Mat. 10:37) Apa kuti Yesu wakang’anamuranga kuti ŵanthu awo ŵakukhumba kuŵa ŵasambiri ŵake ŵakwenera kuleka kutemwa ŵapapi ŵawo yayi. Kweni wakadidimizganga fundo yakuti ŵanthu ŵakwenera kusankha chinthu icho ntchakuzirwa chomene pa umoyo wawo. Usange ŵabali ŵithu awo Mbakaboni yayi ŵakutisuska kuti tileke kusopa Yehova, tikulutilira kuŵatemwa, kweni tikumanyaso kuti tikwenera kudangizga dankha Yehova pakwamba.

Kuyowoya unenesko, ntchakuŵinya chomene kususkika na ŵamumbumba yithu. Kweni nipera ŵasambiri ŵa Yesu ŵakwenera kukumbuka mazgu ghake ghakuti: “Waliyose uyo wakukhumba chara kuyegha khuni lake lakusuzgikirapo na kulutilira kunilondezga, ngwakwenelera ine chara.” (Mat. 10:38) Mukayowoyero kanyake tingati, Ŵakhristu ŵakuwona kuti kususkika na ŵamumbumba yawo ntchimoza cha masuzgo agho ŵasambiri ŵa Khristu ŵakwenera kuzizipizga. Kweniso ŵakugomezga kuti chifukwa cha nkharo yawo yiwemi, ŵamumbumba yawo awo Mbakaboni yayi ŵangasintha na kwamba kusambira Baibolo.—1 Pet. 3:1, 2.