Mpositole Paulosi wakalembera Ŵakhristu ŵa ku Tesalonika kuti: “Usange munyake wakupulikira yayi mazgu ghithu gha mu kalata iyi, mumuŵanike munthu wanthena.” (2 Tes. 3:14) Kumasinda uku, tikatenge ulongozgi uwu ukuluta ku ŵalara. Usange munyake wakulutilira kuswa fundo za mu Baibolo nangauli wapika ulongozgi mwakuwerezgawerezga, ŵalara ŵakadumbanga nkhani ya kuchenjezga mpingo kuti umuŵanike munthu uyo. Kufuma apo, ŵapharazgi ŵakalekanga kuchezga nayo panji kuchitira nayo lumoza vyakusanguluska.

Ndipouli, pali kusintha. Pasono tapulikiska kuti ulongozgi wa Paulosi ukung’anamura ivyo Mkhristu waliyose payekha wakwenera kuchita. Ntheura palije chifukwa chakuti ŵalara ŵayowoyere nkhani ya kuchenjezga mpingo kuti umuŵanike munthu uyo wali na nkharo zambura kwenelera. Chifukwa wuli pali kusintha uku? Wonani nkhani yose iyo yikapangiska Paulosi kupeleka ulongozgi uwu.

Paulosi wakati ŵanyake mu mpingo uwu ‘ŵakendanga mwambura kwenelera.’ Ŵakayuyuranga ulongozgi wa mu Mazgu gha Chiuta. Paulendo wakumanyuma, wakapeleka ulongozgi uwu: “Usange munthu wakukhumba yayi kugwira ntchito, kurya nako waleke.” Ndipouli, ŵanyake ŵakaŵa kuti ŵachali kukana kugwira ntchito kuti ŵasange vyakukhumbikwa pa umoyo wawo, nangauli ŵakaŵa ŵakuti ŵangakwaniska. Kweniso ŵanji ŵakanjilirangapo pa nkhani zaŵene. Kasi Ŵakhristu ŵakeneranga kuchita nawo wuli ŵanthu ŵanthena?—2 Tes. 3:​6, 10-12.

Paulosi wakati: “Mumuŵanike munthu wanthena.” Lizgu la Chigiriki ilo kuli kufuma mazgu agha likung’anamura kumuŵanika mwakupwelelera munthu uyo. Paulosi wakaphaliranga mpingo wose, ŵalara pera yayi. (2 Tes. 1:1; 3:6) Ntheura Mkhristu waliyose payekha uyo wawona Mkhristu munyake wakuleka kupulikira ulongozgi wa mu Mazgu gha Chiuta, wangasankha ‘kuleka kwendezgana nayo’ munthu wanthena.

Kasi chikang’anamuranga kuti munthu uyu ŵakamuwonanga nga uyo wafumiskika mu mpingo? Yayi, chifukwa Paulosi wakatiso: “Lutilirani kumuchenjezga pakuŵa mubali.” Ntheura pa maungano na mu uteŵeti, Ŵakhristu ŵakachitanga nayo lumoza vinthu munthu uyu, kweni pa nkhani ya kuchita vyakusanguluska na ntchezgo ŵakaŵiranga lumoza yayi. Chifukwa wuli? Paulosi wakati: “Mwakuti wakhozgeke soni.” Ntheura para ŵaleka kwendezgana nayo munthowa iyi, mbwenu wakakhozgekanga soni na ivyo wakuchita ndipo pamanyuma wakasinthanga.—2 Tes. 3:​14, 15.

Kasi Ŵakhristu ŵangalondezga wuli ulongozgi uwu mazuŵa ghano? Chakwamba, ŵakwenera kusimikizga dankha usange munthu uyo ‘wakwenda nadi mwambura kwenelera,’ nga umo Paulosi wakalongosolera. Iyo wakayowoyanga vya ŵanthu awo tikupambana vyakutemwa panji awo tikupambana vyakusankha pa nkhani izo tikwendera njuŵi yayi. Kweniso wakang’anamuranga awo ŵatikhuŵazga waka yayi. M’malo mwake, Paulosi wakang’anamuranga awo mwadala ŵakusankha kuleka kupulikira ulongozgi wa Chiuta wakupulikikwa makora.

Mazuŵa ghano, usange tawona Mkhristu munyithu wakulongora mzimu wanthena uwu, a tisankhenge tekha kuleka kwendezgana nayo kwali mpha nkhani ya kuchita vyakusanguluska panji ntchezgo. Pakuti ichi ntchakusankha cha munthu waliyose payekha, ntheura tikwenera yayi kuphalira ŵanthu ŵanyake padera pa ŵamumbumba yithu. Kweni tingalutilira kuchita nayo vinthu para tili ku maungano na mu uteŵeti. Para wasintha nkharo yake, mbwenu tingambiraso kuchita nayo vinthu nga umo vikaŵira pakwamba.