1. Kasi ni fumbo wuli ilo tingajifumba?

KASI namwe nyengo zinyake mukufipa mtima para mukughanaghanira vinthu ivyo vichitikenge sonosono apa, nga nkhuparanyika kwa chisopa chautesi, kuwukilika na Gogi wa Magogi, kweniso nkhondo ya Aramagedoni? Kasi nyengo zinyake mukujifumbapo kuti, ‘Kasi nizamulutilira kugomezgeka apo vinthu vyakofya ivi vizamuchitikanga?’ Para ni nthena, mbwenu mazgu agho Yesu wakayowoya mu lemba ilo pajintha mutu wa nkhani iyi, ghangamovwirani chomene. Yesu wakaphalira ŵasambiri ŵake kuti: “Mitima yinu yingakweŵekanga chara. Muŵe na chipulikano.” (Yoh. 14:1) Ntheura, chipulikano chakukhora ndicho chizamutovwira kuzizipizga viyezgo ivyo vikwiza munthazi.

2. Kasi tingakhozga wuli chipulikano chithu, ndipo tiwonenge vichi mu nkhani iyi?

² Kuti tikhozge chipulikano chithu kuti chizakatovwire kuzizipizga masuzgo agho tingasangana nagho munthazi, tikwenera kughanaghanira umo tikuchitira sono para takumana na vinthu ivyo vikuyezga chipulikano chithu. Para tingachita nthena, tingamanya apo pangakhumbikwira kuti tikhozge chipulikano chithu. Nyengo yiliyose para tikuzizipizga chiyezgo, chipulikano chithu chikukhora. Ndipo ivi vitovwirenge kuti tizakatonde viyezgo ivyo tisanganenge navyo munthazi. Mu nkhani iyi, tiwonenge vinthu vinayi ivyo vikulongora kuti ŵasambiri ŵa Yesu ŵakakhumbikwiranga kuŵa na chipulikano chikuru. Pamanyuma, tiwonenge umo nase tingachitira kuti titonde masuzgo gha nga ni agha mazuŵa ghano, kweniso umo kuchita nthena kungatovwilira kuŵa ŵakunozgeka ku ivyo vichitikenge munthazi.

3. Kasi mazgu gha Yesu gha pa Mateyu 6:30, 33 ghakutovwira kumanya fundo wuli?

³ Ntchakawiro mutu wa mbumba kukhumba kupenjera muwoli wake na ŵana ŵake chakurya chakukwana, vyakuvwara, kweniso  malo ghakukhala. Kweni ntchipusu yayi nyengo zose kuchita nthena mu nyengo zakusuzga izi. Nakuti ŵasopi ŵanyithu ŵanyake ntchito zili kuŵamalira, ndipo nangauli ŵayezgayezga kuti ŵasange ntchito yinyake kweni ŵakuyisanga yayi. Ŵanyake ŵali kuchita kukana ntchito chifukwa chakuti njakwenelera yayi ku Ŵakhristu. Para vyanthena vyatichitikira, tikukhumbikwira kuŵa na chipulikano chakukhora kuti Yehova wawoneseskenge kuti tili na vinthu ivyo mbumba yithu yikukhumbikwira. Yesu wakayowoya mwakupulikikwa makora fundo iyi ku ŵasambiri ŵake pa Upharazgi wake wa pa Phiri. (Ŵazgani Mateyu 6:30, 33.) Para tiŵenge na chigomezgo chose kuti Yehova watilekenge yayi, tilutilirenge kuŵika maghanoghano ghithu pakuteŵetera Yehova. Ndipo para tikuwona umo Yehova wakutovwilira mwakuthupi, waŵenge wanadi kwa ise ndipo chipulikano chithu chikhozgekenge.

4-5. Kasi ntchivichi chikawovwira mbumba yinyake apo yikenjerwanga umo yingasangira vinthu vyakukhumbikwa pa umoyo?

⁴ Wonani umo mbumba yinyake ku Venezuela, yikawonera umo Yehova wakayiwovwilira apo yikenjerwanga na umo yingasangira vinthu vyakukhumbikwa pa umoyo. Pa nyengo yinyake, mbumba ya Castro yikasanganga ndalama zakukwana zakovwilira kusanga vyakukhumbikwa pa umoyo mwa kulima munda uwo ŵakaŵa nawo. Kweni pamanyuma, ŵanalume ŵanyake awo ŵakaŵa na futi ŵakaŵapoka munda wawo na kuŵachimbizga. Miguel, uyo ni mutu wa mbumba iyi, wakuti: “Sono chomene tikugomezga waka kamunda kachoko ako tili kubwereka kwa munthu munyake. Zuŵa lililose nkhwamba na kulomba Yehova kuti watipe ivyo tikukhumbikwira pa zuŵa ilo.” Umoyo ngwakusuzga chomene ku mbumba iyi, kweni chifukwa chakuti yili na chigomezgo chose mwa Dada withu wachitemwa kuti wayiwovwirenge kusanga vyakukhumbikwa vya zuŵa na zuŵa, mbumba ya Castro yikuchita maungano gha mpingo mwakukhazikika kweniso kupharazga. Mbumba iyi yikuŵika vinthu vya Ufumu pakwamba mu umoyo wawo, ndipo Yehova wakuyipa ivyo yikukhumbikwira.

⁵ Mu nyengo yose ya masuzgo iyi, Miguel na muwoli wake, Yurai, ŵakuŵika mtima pa umo Yehova wakuŵawovwilira. Nyengo zinyake, Yehova wakugwiliskira ntchito ŵabali na ŵadumbu kuŵapa vinthu vinyake ivyo ŵakukhumbikwira panji kovwira Miguel kusanga ntchito. Nyengo zinyakeso, Yehova wakugwiliskira ntchito ofesi ya munthavi kuŵapa vinthu vinyake ivyo ŵakukhumbikwira. Yehova wandaŵasidepo yayi. M’malo mwake, ŵawona kuti chipulikano chawo mu banja lawo chikukura. Ŵati ŵazunura chakuchitika chinyake apo Yehova wakaŵawovwira, mwana wawo mulara msungwana, Yoselin, wakati: “Ntchakukhozga chomene kuwona umo Yehova watovwilira. Nkhumuwona kuŵa mubwezi wane uyo nkhumugomezga pa umoyo wane.” Wakasazgiraposo kuti: “Masuzgo agho mbumba yakwithu yajumphamo ghatinozgekereska viyezgo vikuru ivyo tingakumana navyo munthazi.”

6. Kasi mungakhozga wuli chipulikano chinu para mukukumana na masuzgo gha vya chuma?

⁶ Kasi namwe mukukumana na masuzgo gha vya chuma? Para ni nthena, iyi ni nyengo yakusuzga kwa imwe. Nangauli vingaŵa nthena, kweni nipera mungagwiliskira ntchito nyengo iyi kukhozga  chipulikano chinu. Lombani kwa Yehova na kuŵerenga mazgu gha Yesu agho ghali pa Mateyu 6:25-34 na kughanaghanirapo. Ghanaghanirani viyelezgero vya mu nyengo yithu yino, ivyo vikulongora kuti Yehova wakovwira awo ŵakujipeleka kumuteŵetera. (1 Kor. 15:58) Para muchitenge nthena, muŵenge na chipulikano chakukhora kuti Yehova wamovwiraninge nga umo wawovwilira ŵanji awo nawo ŵakaŵa na masuzgo nga ghinu. Wakumanya ivyo mukukhumbikwira, ndiposo wakumanya umo wangamovwilirani. Ndipo para mukuwona umo Yehova wakumovwilirani pa umoyo winu, chipulikano chinu chikhorenge ndipo muzamutonda viyezgo vikuru chomene ivyo vikwiza munthazi.​—Hab. 3:17, 18.

7. Kuyana na lemba la Mateyu 8:23-26, kasi “chimphepo chikuru” chikayezga wuli chipulikano cha ŵapositole?

⁷ Apo Yesu na ŵasambiri ŵake ŵakendanga pa boti, pa nyanja pakawuka chimphepo mwamabuchi. Ndipo Yesu wakagwiliskira ntchito chakuchitika ichi kovwira ŵasambiri ŵake kumanya kuti ŵakakhumbikwiranga kukhozga chipulikano chawo. (Ŵazgani Mateyu 8:23-26.) Chimphepo chikaŵa chikuru chomene mwakuti majigha gha nyanja ghakazuzga boti lawo na maji, kweni Yesu panyengo iyi wakaŵa kuti wali mu tulo. Ŵasambiri ŵake ŵakatenthema, ndipo ŵakati ŵamuwuska na kumupempha kuti waŵathaske, Yesu wakaŵafumba mwachitemwa kuti: “Chifukwa wuli mukopa nthena, imwe ŵachipulikano chichoko?” Ŵasambiri ŵawofi aŵa ŵakeneranga kumanya kuti Yehova wakate wavikilirenge Yesu na wose awo wakaŵa nawo lumoza. Kasi sambiro ndakuti wuli kwa ise? Chipulikano chakukhora chingatovwira kutonda masuzgo ghakuru agho ghangawoneka nga ntchimphepo chikuru.

8-9. Kasi chipulikano cha Anel chikayezgeka wuli, ndipo ntchivichi chikamovwira?

⁸ Ghanaghanirani umo Anel, mudumbu wa ku Puerto Rico, uyo wali pa nthengwa yayi, wakakhozgera chipulikano chake chifukwa cha kuzizipizga masuzgo ghakuru. Masuzgo agha ghakiza chifukwa cha chimphepo chikuru icho chikachitika. Ndipo ghakamba mu 2017 apo chimphepo chikuru chakuchemeka Hurricane Maria chikananga nyumba yake. Kweniso chifukwa cha chimphepo ichi, ntchito yake yikamara. Anel wakuti: “Mu nyengo ya masuzgo iyi, nkhenjerwanga chomene, kweni nkhasambira kugomezga Yehova kwizira mu lurombo kweniso kuleka kuzomerezga kuti kwenjerwa kunitimbanizge maghanoghano.”

⁹ Anel wakuti iyo wakazizipizgaso masuzgo ghake chifukwa cha kupulikira. Iyo wakuti: “Kulondezga ulongozgi wa gulu la Yehova kukanovwira kuti nileke kufipa mtima. Yehova wakanovwira kwizira mu ŵabali na ŵadumbu. Ŵakanikhozga kweniso ŵakanipa vinthu ivyo nkhakhumbikwiranga pa umoyo.” Wakusazgiraposo kuti: “Yehova wakanipa vinandi kuluska ivyo nkhamulomba, ndipo chipulikano chane chikakhora chomene.”

10. Kasi mungachita wuli usange namwe mukusangana na masuzgo ghakuru pa umoyo winu?

¹⁰ Kasi namwe mukusangana na masuzgo ghakuru pa umoyo winu? Nyengo zinyake mukusuzgika chifukwa cha masoka ghachilengiwa. Panyake mukulwara matenda ghakuru agho ghakumupangiskani kugongowa, kweniso kusoŵa chakuchita. Nyengo zinyake mungenjerwa, kweni lekani  kuzomerezga kuti vyenjezgo vimutondeskani kugomezga Yehova. Sendelerani kwa iyo kwizira mu lurombo. Khozgani chipulikano chinu mwa kughanaghanirapo nyengo izo Yehova wakamovwiranipo kumanyuma. (Sal. 77:11, 12) Para muchitenge nthena, muŵenge na chigomezgo chose kuti wamulekaninge yayi napachoko pose.

11. Chifukwa wuli tikwenera kuŵikapo mtima kupulikira awo ŵakulongozga?

¹¹ Kasi ntchivichi chingamovwirani kuti muzizipizge masuzgo? Nga umo Anel wakayowoyera, tikwenera kupulikira. Sambirani kuŵa na chigomezgo mu awo Yehova na Yesu ŵakuŵagomezga. Nyengo zinyake, awo ŵali kwimikika kuti ŵalongozgenge ŵangapeleka ulongozgi uwo ungawoneka nga ngwambura kovwira kwa ise. Ndipouli, Yehova wakutumbika awo ŵakupulikira. Tikumanya kwizira mu Mazgu ghake kweniso kwizira mu ivyo ŵateŵeti ŵakugomezgeka ŵakukumana navyo, kuti kupulikira kukuponoska umoyo. (Eks. 14:1-4; 2 Mid. 20:17) Ghanaghaniranipo pa viyelezgero vya nthena ivi. Kuchita nthena kumovwiraninge kuti mulutilire kupulikira ulongozgi wakufuma ku gulu la Yehova sono, kweniso na munthazi wuwo. (Heb. 13:17) Ntheura muŵavyenge chifukwa cha kopera suzgo yikuru iyo yizenge sonosono.​—Zinth. 3:25.

12. Kasi lemba la Luka 18:1-8 likulongora wuli kukolerana uko kulipo pakati pa chipulikano na kuzizipizga vinthu vyambura urunji?

¹² Yesu wakamanya kuti chipulikano cha ŵasambiri ŵake chizamuyezgeka, chifukwa cha kuŵachitira vinthu mwambura urunji. Kuti waŵawovwire kuzizipizga suzgo ili, wakayowoya ntharika iyo yili mu buku la Luka. Yesu wakayowoya za chokoro icho chikalutilira kuŵeyelera mweruzgi wambura urunji kuti wachichitire urunji. Chikaŵa na chigomezgo chose kuti chovwilikenge usange chingakosera kumupempha. Nakuti pamanyuma, mweruzgi wakazomerezga pempho lake. Kasi apa sambiro ndakuti wuli? Yehova ngwambura urunji yayi. Ntheura Yesu wakati: “Kasi Chiuta wangatondeka kuwoneseska kuti ŵakusoleka ŵake awo ŵakumulilira muhanya na usiku ŵapokera urunji?” (Ŵazgani Luka 18:1-8.) Ndipo Yesu wakasazgiraposo kuti: “Para mwana wa munthu wakwiza, kasi wazamusanga nadi chipulikano ichi pa charu chapasi?” Para ŵanthu ŵatichitira vinthu mwambura urunji, kuti tilongore kuti tili na chipulikano chakukhora nga ntcha chokoro chira, tikwenera kuzizipizga kweniso kuŵa ŵakuzikira. Para tingaŵa na chipulikano chanthena ichi, mbwenu tiŵenge na chigomezgo chose kuti Yehova watovwirenge. Tikweneraso kugomezga kuti lurombo ndwankhongono chomene. Nyengo zinyake, malurombo ghithu ghangazgoleka mu nthowa iyo takhazganga yayi.

13. Kasi Lurombo lukawovwira wuli mbumba yinyake iyo ŵakayichitira vinthu mwambura urunji?

¹³ Wonani ivyo vikachitikira mudumbu munyake zina lake Vero, uyo wakukhala ku Democratic Republic of Congo. Vero, na mfumu wake uyo wakuteŵetera Yehova yayi, pamoza na mwana wawo wa vyaka 15, ŵakachimbira mu muzi wakwawo apo ukawukilika na ŵasilikari. Apo ŵakaŵa mu nthowa, ŵakafika pa malo ghakusechera ndipo ŵakayimiskika na ŵasilikari awo ŵakaŵawofya kuti ŵaŵakomenge. Vero wati wamba kulira, mwana wake  msungwana wakayezga kumuchetamiska mwa kulomba mwakukwezga chomene kweniso kuzunura zina la Yehova mwakuwerezgawerezga mu lurombo lwake. Wati wamalizga, mulara wa ŵasilikari wakafumba kuti, “Wamwana, ni njani wakakusambizga kulomba?” Wakazgora kuti, “Mbamama ŵane, ŵakanisambizga mwakugwiliskira ntchito chiyelezgero icho chikusangika pa Mateyu 6:9-13.” Mulara wa ŵasilikari wakazgora kuti, “Wamwana, luta na ŵapapi ŵako mu mtende, ndipo Yehova Chiuta winu wamuvikilirani!”

14. Kasi ntchivichi chingayezga chipulikano chithu, ndipo ntchivichi chingatovwira kuzizipizga?

¹⁴ Vyakuchitika nga ni ivi, vikutisambizga kuti tikwenera yayi kuluwa kuzirwa kwa lurombo. Kweni wuli para malurombo ghinu ghakuzgoreka luŵiro yayi panji ghakuzgoreka umo imwe mwakhazgiranga yayi? Nga chokoro cha mu ntharika ya Yesu, lutilirani kulomba, muŵe na chigomezgo kuti Chiuta withu wamulekaninge yayi kweniso wazgorenge lurombo lwinu panyengo yake yakwenelera. Lutilirani kulomba Yehova kuti wamupani mzimu utuŵa. (Fil. 4:13) Kumbukani kuti sonosono apa Yehova wamutumbikaninge chomene mwakuti muzamuluwa masuzgo ghose agho mukukumana nagho. Para mukuzizipizga viyezgo na wovwiri wa Yehova, muŵenge ŵakukhora ndipo vizamumovwirani kuti muzizipizge viyezgo vyamunthazi.​—1 Pet. 1:6, 7.

15. Kuyana na lemba la Mateyu 17:19, 20, kasi ŵasambiri ŵa Yesu ŵakakumana na suzgo wuli?

¹⁵ Yesu wakasambizga ŵasambiri ŵake kuti chipulikano chiŵawovwirenge kuleka kuwelera nyuma nangauli ŵangaŵa kuti ŵakukumana na masuzgo. (Ŵazgani Mateyu 17:19, 20.) Pa nyengo yinyake, ŵakatondeka kufumiska chiŵanda, nangauli ŵakaŵa kuti ŵachitapo kale kumanyuma. Chifukwa wuli ŵakatondeka? Yesu wakalongosora kuti ŵakeneranga kuŵa na chipulikano chikuru. Wakaŵaphalira kuti para ŵangaŵa na chipulikano chikuru ŵangakwaniska kutonda masuzgo agho ghangawoneka nga ni phiri. Mazuŵa ghano napo, nase tingakumana na masuzgo agho ghangatigongoweska.

16. Kasi chipulikano chamovwira wuli Geydi kuzizipizga, mfumu wake wati wakomeka?

¹⁶ Ghanaghanirani vya Geydi, mudumbu wa ku Guatemala. Mfumu wake, Edi, wakakomeka apo ŵakaweranga ku nyumba kufuma ku maungano gha mpingo. Kasi Geydi chipulikano chamovwira wuli kuzizipizga nangauli wali na chitima chikuru? Iyo wakuti: “Lurombo lukunovwira kuthwikiska Yehova katundu wane, icho chikunipangiska kuti niŵe na mtende wa mumtima. Nkhuwona kuti Yehova wakunovwira kwizira mu ŵamumbumba yane kweniso ŵanyane mu mpingo. Chifukwa chakuti nkhutangwanika na kuteŵetera Yehova, vikunovwira kuti chitima chichepeko, kweniso kuchita ivyo ningafiska kwambura kwenjerwa chomene na vya machero. Suzgo iyi, yanisambizga kuti kwali ni mtundu wuli wa chiyezgo icho chingiza munthazi, nizamukwaniska kuzizipizga na wovwiri wa Yehova, Yesu, kweniso gulu lake.”

17. Kasi tingachita wuli para tasangana na suzgo likuru ilo likuwoneka nga ni phiri?

¹⁷ Kasi muli na chitima chifukwa cha nyifwa ya wakutemweka winu? Paturani nyengo kukhozga  chipulikano chinu mu chigomezgo cha chiwuka, mwa kuŵerenga nkhani za mu Baibolo za awo ŵakawuskika ku ŵakufwa. Kasi muli na chitima chifukwa chakuti wamumbumba yinu wali kusezgeka? Sambirani Baibolo kuti mukhorwe kuti nyengo zose chilango chakufuma kwa Chiuta ntchakwenelera. Kwali suzgo nja mtundu wuli, sangiranipo mwaŵi kukhozga chipulikano chinu. Muphalirani Yehova umo mukujipulikira. Kujipatura yayi, m’malo mwake lutilirani kuŵa paubwezi na ŵabali na ŵadumbu. (Zinth. 18:1) Muchitenge vinthu ivyo vingamovwirani kuzizipizga, nanga vingaŵa kuti mukuchita kulira para mwakumbuka ivyo vikamuchitikirani. (Sal. 126:5, 6) Lutilirani kuwungana, kupharazga, kweniso kuŵerenga Baibolo. Ndipo lutilirani kughanaghanira vinthu vyakukondweska ivyo Yehova walayizga kuzakamupani munthazi. Para mwawona umo Yehova wakumovwilirani sono, chipulikano chinu mwa iyo chikurenge chomene.

18. Kasi mukwenera kuchita vichi para mwamanya kuti chipulikano chinu ntchakukhora viŵi yayi?

¹⁸ Para masuzgo ghinu, kwali ngakumanyuma, kwali ngasono, ghakulongora kuti chipulikano chinu ntchakukhora viŵi yayi, kugongowa yayi. Muwone kuti ni mwaŵi winu kukhozga chipulikano chinu. Namwe mungalomba nga umo ŵakachitira ŵapositole ŵa Yesu, awo ŵakati: “Mutisagzireko chipulikano.” (Luka 17:5) Kweniso, ghanaghanirani viyelezgero ivyo tadumbiskana mu nkhani iyi. Nga ni Miguel na Yurai, nyengo zose mukumbukenge para Yehova wamovwirani. Nga ni mwana msungwana wa Vero na Anel, koserani kulomba kwa Yehova, chomenechomene para mukukumana na suzgo likuru. Ndipo nga ni Geydi, manyani kuti Yehova wangamovwirani kwizira mu ŵachibali panji ŵabwezi ŵinu. Para mukuzomerezga Yehova kumovwirani kuzizipizga viyezgo ivyo mukukumana navyo pasono, muŵenge na chigomezgo chose kuti wamovwiraninge kuzizipizga viyezgo vilivyose ivyo mungakumana navyo munthazi.

19. Kasi Yesu wakagomezganga vichi, ndipo imwe mungaŵa na chigomezgo wuli?

¹⁹ Yesu wakawovwira ŵasambiri ŵake kumanya vigaŵa ivyo ŵakakhumbikwiranga kuŵa na chipulikano chakukhora, kweni wakakayikanga yayi kuti na wovwiri wa Yehova ŵazizipizgenge viyezgo ivyo ŵasanganenge navyo munthazi. (Yoh. 14:1; 16:33) Wakagomezganga kuti chipulikano chakukhora ndicho chizamovwira ŵa mzinda ukuru kupona suzgo yikuru iyo yikwiza. (Chivu. 7:9, 14) Kasi namwe muzaŵapo pakati pa gulu ili? Na wovwiri wa Yehova namwe mungazakaŵapo, usange mukuchita vyose ivyo mungafiska kuti mukhozge chipulikano chinu sono!​—Heb. 10:39.