Manyani Makora Kugomezgeka na Kugowokera kwa Yehova
“Imwe, A Yehova, ndimwe Muwemi, ndipo mukugowokera, muli wakuzara lusungu kwa wose ŵeneawo ŵakumucemani.”—SAL. 86:5.
1, 2. (a) Cifukwa wuli mukutemwa kuŵa na ŵabwezi awo mbakugomezgeka na ŵakugowokera? (b) Kasi tidumbiskanenge mafumbo wuli?
KASI imwe mukuti mubwezi muwemi wakuŵa wuli? Mudumbu munyake zina lake Ashley wakati: “Kwa ine, mubwezi muwemi ni uyo nyengo zose wakuŵa wakunozgeka kukovwira na kukugowokera para wabudiska.” Tose tikutemwa kuŵa na ŵabwezi ŵakugomezgeka na ŵakugowoka. Ŵakutovwira kuti tijiwonenge ŵakuvikilirika na ŵakutemweka.—Zinth. 17:17.
2 Yehova ndiyo ni Mubwezi wakugomezgeka na wakugowokera comene. Vili nga umo wamasalimo wakuyowoyera, kuti: “Imwe, A Yehova, ndimwe Muwemi, ndipo mukugowokera, muli wakuzara lusungu [panji kuti ‘citemwa canadi’] kwa wose ŵeneawo ŵakumucemani.” (Sal. 86:5) Kasi kuŵa wakugomezgeka na wakugowokera cikung’anamuraci? Kasi Yehova wakulongora wuli kuti ngwakugomezgeka na wakugowokera? Ndipo kasi ise tingamuyezga wuli pa nkhani izi? Mazgoro agho tisangenge ghatovwirenge kuti timutemwenge comene Yehova, uyo ni Mubwezi withu wapamtima. Ghatovwirengeso kuti tikhozge ubwezi withu na ŵanyithu.—1 Yoh. 4:7, 8.
YEHOVA NGWAKUGOMEZGEKA
3. Kasi kugomezgeka cikung’anamuraci?
3 Kugomezgeka ni mukhaliro uwemi comene ndipo munthu wakugomezgeka wakuŵa wakujipeleka, ndiposo wambura kuputwaputwa. Munthu wakugomezgeka wakusinthasintha yayi. M’malo mwake, wakujipeleka kwa munyake, wakuskepelera comene kwa munyake uyo, nanga wangakumana na masuzgo. Baibolo likuti Yehova ‘ngwakugomezgeka’ comene. Palije munthu munyake wakugomezgeka kuluska Yehova.—Uvu. 16:5.
4, 5. (a) Kasi Yehova wakulongora wuli kuti ngwakugomezgeka? (b) Kasi tingakhozgeka wuli usange tikughanaghanirapo pa umo Ciuta wakalongolera kugomezgeka?
4 Kasi Yehova wakulongora wuli kuti ngwakugomezgeka? Wakuŵasidapo yayi ŵateŵeti ŵake ŵakugomezgeka. Themba Davide, yumoza wa ŵateŵeti aŵa, wakacitira ukaboni kuti Yehova ngwakugomezgeka nadi. (2 Sam. 22:26; ŵazgani Salmo 18:25.) Apo Davide wakayezgekanga, mwakugomezgeka Yehova wakamulongozga, kumuvikilira na kumuponoska. (2 Sam. 22:1) Davide wakamanyanga kuti para Yehova wayowoya kuti wagomezgekenge ndikuti wagomezgekenge nadi. Cifukwa wuli Yehova wakacita vinthu mwakugomezgeka kwa Davide? Cifukwa cakuti Davide iyomwene wakaŵa ‘wamagomezgeka.’ Yehova wakuzirwiska comene kugomezgeka kwa ŵateŵeti ŵake ndipo nayo wakuŵa wakugomezgeka kwa iwo.—Zinth. 2:6-8.
5 Tingakhozgeka comene para tikughanaghanirapo pa umo Yehova waliri wakugomezgeka. Mubali munyake wakugomezgeka zina lake Reed wakati: “Nkhovwirika comene para naŵazga umo Yehova wakacitira na Davide mu nyengo za suzgo. Nanga ni apo Davide wakacimbiranga na kubisama mu mphanji, nyengo zose Yehova wakamovwiranga. Nkhuwona kuti ici nchakukhozga comene. Cikunikumbuska kuti nanga masuzgo ghangaŵa ghanandi wuli, panji nanga vinthu vingawoneka kuti ni vyakusuzga comene, Yehova waŵenge nane cikuru ine nalutilira kuŵa wakugomezgeka kwa iyo.” Namwe ndimo mukwenera kuti mukujipulikira.—Rom. 8:38, 39.
6. Kasi Yehova wakulongora wuli kuti ngwakugomezgeka, ndipo ŵateŵeti ŵake ŵakusanga candulo wuli?
6 Kasi ni nthowa wuli zinyake izo Yehova wakulongolera kuti ngwakugomezgeka? Iyo wakulondezga fundo zake zaurunji. Wakutisimikizgira kuti: “Nanga mufike ku ucekuru, ndine.” (Yes. 46:4) Nyengo zose ivyo wakucita vikukolerana na fundo zake zambura kusintha pa nkhani ya ico nchakwenelera na cakubudika. (Mal. 3:6) Kweniso Yehova wakulongora kuti ngwakugomezgeka pakufiska ivyo walayizga. (Yes. 55:11) Ntheura ŵateŵeti ŵake wose ŵakugomezgeka ŵakusanga candulo na kugomezgeka kwa Yehova. Kasi ŵakusanga candulo mu nthowa wuli? Para tikuyezgayezga kulondezga fundo za Yehova, iyo wazamufiska layizgo lake lakuti watitumbikenge.—Yes. 48:17, 18.
YEZGANI YEHOVA PA NKHANI YA KUGOMEZGEKA
7. Kasi nthowa yimoza iyo tingamuyezgera Ciuta pa nkhani ya kugomezgeka njakuti wuli?
7 Kasi tingamuyezga wuli Yehova pa nkhani ya kugomezgeka? Nthowa yimoza nkhucitapo kanthu kuti tovwire awo ŵali mu suzgo. (Zinth. 3:27) Mwaciyelezgero, kasi mukumanyapo Mkhristu munyinu uyo wali na citima, panyake cifukwa ca ulwari, ŵabali ŵake ŵakumususka, panji wali na citima cifukwa ca ivyo wakutondeka kucita makora? Kasi mungaluta yayi kwa munthu uyo, na kumuphalirako “mazgu gha ucizi na ghakusanguluska”? (Zek. 1:13) a Para mungacita nthena, mulongorenge kuti ndimwe mubwezi muwemi na wakugomezgeka, uyo “wakuskepelera kuluska mwana munyako.”—Zinth. 18:24.
8. Kasi tingamuyezga wuli Yehova pa nkhani ya kugomezgeka mu nthengwa?
8 Kweniso tingamuyezga Yehova pa nkhani ya kugomezgeka usange tikulutilira kugomezgeka ku awo tikuŵatemwa. Mwaciyelezgero, usange tili ŵakutora panji ŵakutengwa, tikumanya kuti tikwenera kuŵa ŵakugomezgeka kwa munyithu wa mu nthengwa. (Zinth. 5:15-18) Ntheura tikucita yayi vinthu ivyo vingatilongozgera ku uleŵi. (Mat. 5:28) Kweniso, tikulongora kuti tili ŵakugomezgeka ku Ŵakhristu ŵanyithu para tikugega kusesa panji kuŵatetera mautesi, kweniso para tikukana kuthandazga na kutegherezga mautesi agho.—Zinth. 12:18.
9, 10. (a) Kasi comene tikwenera kulutilira kuŵa ŵakugomezgeka kwa njani? (b) Cifukwa wuli ni nyengo zose yayi apo cikuŵa cipusu kupulikira malango gha Yehova?
9 Cakuluska vyose nchakuti tikwenera kuŵa ŵakugomezgeka kwa Yehova. Kasi tingacita wuli nthena? Tikwenera kuwona vinthu umo iyo wakuviwonera. Tikwenera kutemwa ivyo iyo wakutemwa, na kutinkha ivyo iyo wakutinkha, ndipo tikwenera kucita vinthu mwakuyana na fundo iyi. (Ŵazgani Salmo 97:10.) Para tikuyezgayezga comene kucita vinthu mwakukolerana na maghanoghano gha Yehova, ndipo tikuciskika comene kupulikira malango ghake.—Sal. 119:104.
10 Mbunenesko kuti ni nyengo zose yayi apo cikuŵa cipusu kupulikira malango gha Yehova. Panji tikucita kulimbalimba kuti tiŵe ŵakugomezgeka. Mwaciyelezgero, Ŵakhristu ŵambura kutora panji kutengwa ŵangatemwa kutora panji kutengwa, kweni ŵakwenera kusanga munthu wakwenelera pakati pa ŵateŵeti ŵa Yehova. (1 Kor. 7:39) Mudumbu wangawona kuti awo wakugwira nawo nchito, awo Mbakaboni yayi, nyengo zose ŵakumulongora mwanalume uyo iyo wangatengwako. Mudumbu wangaŵa kuti wakusuzgika na phukwa. Ndipouli, wakufwilirapo kuti walutilire kugomezgeka kwa Yehova. Kasi tikuŵawonga yayi ŵadumbu awo ŵakufwilirapo kugomezgeka? Nadi, Yehova wazamuŵapa njombe wose awo ŵakulutilira kugomezgeka kwa iyo nangauli ŵakukumana na masuzgo.—Heb. 11:6.
YEHOVA NGWAKUGOWOKERA
11. Kasi kugowokera cikung’anamuraci?
11 Cinyake ico tikumutemwera Yehova nchakuti ngwakunozgeka kugowokera. Kasi kuŵa wakugowokera cikung’anamuraci? Comene cikung’anamura kusulako ivyo munthu wakubudira usange pali vifukwa vyanadi vyakucitira nthena. Ici cikung’anamura kulekelera waka ciheni ico cacitika yayi nesi kukana kuti cacitika. Kweni cikung’anamura kuwuskamo ukali wose uwo tanguŵa nawo cifukwa ca vinthu viheni ivyo vyacitika. Malemba ghakusambizga kuti Yehova ngwakunozgeka ‘kugowokera’ awo ŵakulongora kuti ŵapera nadi.—Sal. 86:5.
12. (a) Kasi Yehova wakulongora wuli kuti ngwakugowokera? (b) Kasi ‘kusisita’ zakwananga cikung’anamuraci?
12 Kasi Yehova wakulongora wuli kuti ngwakugowokera? Para Yehova wagowoka, wakugowoka “comene”; wakugowoka zanadi na kuluwako. (Yes. 55:7) Kasi tikumanya wuli kuti Yehova wakugowoka zanadi? Wonani mazgu agho ghali pa Milimo 3:19. (Ŵazgani.) Mpositole Petrosi wakaciska awo wakayowoyanga nawo kuti ‘ŵapere na kuwelera.’ Para wakwananga wapera nadi, wakucita citima na viheni ivyo wakacita. Kweniso wakuŵikapo mtima kuti waleke kuwerezgapo kwananga kwake. (2 Kor. 7:10, 11) Kweniso munthu uyo wapera nadi ‘wakuwelera,’ wakuleka vinthu viheni ivyo wakacita na kucita vinthu ivyo vikukondweska Ciuta. Kasi Petrosi wakati cicitikenge nchivici para ŵanthu awo wakayowoyanga nawo ŵapera zanadi? Wakati zakwananga zawo ‘zisisitikenge.’ Lizgu ili lili kufuma ku lizgu Lacigiriki ilo likung’anamura kuti “kupuputa, panji kufufuta.” Ntheura para Yehova wagowoka, wakufufuta nga mpha sileti lakulembapo. Wakugowokera zanadi.—Heb. 10:22; 1 Yoh. 1:7.
13. Kasi mazgu ghakuti “ndikumbukengeso uheni wawo cara” ghakutisimikizgira vici?
13 Kasi tikumanya wuli kuti Yehova wakuluwako para wagowoka? Wonani ucimi wa Yeremiya wakukhwaskana na phangano liphya. Ciuta wakacita phangano ili na Ŵakhristu ŵakuphakazgika, ndipo likovwira kuti awo ŵali na cipulikano mu sembe yakuwombora ŵagowokereke nadi. (Ŵazgani Yeremiya 31:34.) Yehova wakuti: “Nditigowokere kwananga kwawo, ndipo ndikumbukengeso uheni wawo cara.” Ntheura Yehova wakutisimikizgira kuti para wagowoka, kunthazi wazamutilangaso yayi cifukwa ca zakwananga izo. Wakuzitoraso yayi zakwananga zithu kuti watisuskeso nazo panji kutilangiraposo. Kweni Yehova wakutigowokera zakwananga izi na kuziŵika kumasinda. Enya, wakuluwako.—Rom. 4:7, 8.
14. Kasi tingapembuzgika wuli para tingaghanaghanirapo pa cigowokero ca Yehova? Yowoyani ciyelezgero.
14 Tingasanga candulo para tingaghanaghanirapo pa cigowokero ca Yehova. Wonani ciyelezgero cimoza. Vyaka vinandi ivyo vyajumpha, mudumbu munyake uyo zina lake timucemenge Elaine wakasezgeka. Pakati pajumpha vyaka vinandi wakawezgekeramo. Elaine wakati: “Nangauli mu mtima ndiposo ku ŵanthu nkhayowoyanga kuti Yehova wali kunigowokera, kweni nyengo zose nkhajipulikanga kuti nkhaŵa kutali na iyo panji kuti ŵanthu ŵanji ŵali nayo pafupi comene kuluska ine ndipo ngwanadi comene kwa iwo.” Ndipouli, Elaine wakapembuzgika wakati waŵazga na kughanaghanirapo pa mazgu gha mu Baibolo agho ghakulongosora cigowokero ca Yehova. Elaine wakasazgirapo kuti: “Kuluska kumasinda kose, nkhawona kuti Yehova wakunitemwa comene kweniso kuti wali nane na ciwuravi.” Fundo yakulondezgapo iyi ndiyo yikamukhwaska comene. Iyo wakati: “Para Yehova watigowokera zakwananga zithu, tikwenera yayi kughanaghana kuti tili ŵakubinkha na zakwananga izi umoyo withu wose.” b Elaine wakati: “Nkhamanya kuti nkhagomezganga yayi kuti Yehova wanganigowokera fikepo zakwananga zane, ndipo nkhaghanaghananga kuti niŵenge na zakwananga izi umoyo wane wose. Nkhumanya kuti pajumphenge nyengo kuti maghanoghano agha ghamalirethu, kweni sono nkhuwona kuti ningasendelera nadi kwa Yehova, ndipo nkhujipulika kuti nili kuthura katundu muzito uyo nkhaŵa nayo.” Ciuta uyo tikumuteŵetera ngwacitemwa ndiposo ngwakugowokera nadi.—Sal. 103:9.
YEZGANI YEHOVA PA NKHANI YA KUGOWOKERA
15. Kasi tingamuyezga wuli Yehova pa nkhani ya kugowokera?
15 Tingayezga Yehova pa nkhani ya kugowokera para tikugowokerana yumoza na munyake usange pali cifukwa cakukwana cakugowokelera. (Ŵazgani Luka 17:3, 4.) Kumbukani kuti para Yehova wagowoka, wakuluwa zakwananga zithu mu fundo yakuti wakutilangaso nazo yayi. Para nase tagowokera munthu, tingaluwa zakwananga izi mwa kuziponya ku musana na kuleka kuzikumbuskaso munthazi.
16. (a) Kasi kugowokera cikung’anamura kulekelera viheni panji kuzomerezga kuti ŵanji ŵatilyerenge masuku pa mutu? Longosorani. (b) Kuti Ciuta watigowokere, kasi tikwenera kucita vici?
16 Kuŵa wakugowokera cikung’anamura kulekelera viheni yayi, nesi kuzomerezga kuti ŵanji ŵatilyerenge masuku pa mutu. Kweni cikung’anamura kuleka kusungira munthu cakusingo. Kweniso kuti Ciuta watigowokere, tikwenera kuyezga Yehova pa nkhani ya kugowokera ŵanji. (Mat. 6:14, 15) Nakuti, ciwuravi ndico cikutuma Yehova kuti wakumbukenge kuti “tili fuvu ise.” (Sal. 103:14) Ipo nase ciwuravi ndico cikwenera kutituma kuti tisulengeko tumaubudi tucokotucoko twa ŵanji na kuŵagowokera kufumira pasi pa mtima.—Efe. 4:32; Kol. 3:13.
Para tikulomba cigowokero tilombenge kufuma pasi pa mtima (Wonani ndime 17)
17. Kasi nchivici ico cingatovwira usange Mkhristu munyithu watibudira?
17 Ni nyengo zose yayi apo cikuŵa cipusu kugowoka. Nanga Mbakhristu ŵanyake ŵakuphakazgika mu nyengo yakale vikaŵasuzganga kuti ŵagowokerane. (Fil. 4:2) Kasi nchivici cingatovwira usange Mkhristu munyithu watibudira? Wonani ivyo Yobu wakacita. Ŵabwezi ŵake ŵatesi, Elifazi, Bilidadi, na Zofara, ŵakamuŵinyiska mtima comene cifukwa cakuti ŵakamupusikizgira vinthu vinandi. (Job 10:1; 19:2) Paumaliro, Yehova wakaŵacenya ŵanthu ŵatesi aŵa. Ciuta wakaŵaphalira kuti ŵalute kwa Yobu na kupeleka sembe cifukwa ca zakwananga zawo. (Job 42:7-9) Kweni Yehova wakakhumbangaso kuti Yobu wacite cinthu cinyake. Kasi cikaŵa cinthu wuli? Yehova wakaphalira Yobu kuti walombere ŵanthu awo ŵakamunenanga pakwamba. Yobu wakacita nga umo Yehova wakamuphalilira, ndipo Yehova wakamutumbika cifukwa ca mzimu wake wa kugowokera. (Ŵazgani Job 42:10, 12, 16, 17.) Kasi ise tikusambirapo vici? Para tikulombera awo ŵatibudira kufumira pasi pa mtima tiŵasungirenge vyakusingo yayi.
LUTILIRANI KUYIMANYA MAKORA MIKHALIRO YA YEHOVA
18, 19. Kasi tikwenera kulutilira kucita vici?
18 Takondwa comene kuwona vigaŵa vyakupambanapambana vya wunthu wakukondweska wa Yehova. Tawona kuti iyo ngwakufwatuka na ŵanji ngwambura kutemwera, wali na mtima wa kupeleka, ngwakugomezgeka, ndiposo wakugowokera. Apa tasambira vyose yayi. Tingasambira vinthu vyakukhwaskana na Yehova kwamuyirayira. (Muph. 3:11) Tikukolerana na mazgu gha mpositole Paulosi, uyo wakalemba kuti: “Nako nkhunyang’amira kwa usambazi na vinjeru na kumanya kwa Ciuta!” Pa usambazi, vinjeru, na kumanya kwa Ciuta, pali citemwa na mikhaliro yinyake yinkhondi na umoza iyo tasambira.—Rom. 11:33.
19 Ntheura, tiyeni tilutilire kusambira vinandi vyakukhwaskana na mikhaliro ya Yehova, tighanaghanirengepo, ndiposo tiyezgenge kuŵa na mikhaliro iyi mu umoyo withu. (Efe. 5:1) Para ticitenge nthena, tikoleranenge na wamasalimo uyo wakimba kuti: “Ine nkhuti nkhuwemi kukhala pafupi na Ciuta.”—Sal. 73:28.
a Fundo zinyake izo zingamovwirani pa nkhani iyi mungazisanga mu nkhani yakuti “Kodi Mwalimbikitsapo Aliyense Posachedwapa?” mu Gongwe la Mulinda la Ciceŵa la Janyuwale 15, 1995, na yakuti “Fulumizanani ku Chikondano ndi Ntchito Zabwino—Motani?” mu Gongwe la Mulinda la Ciceŵa la Epulero 1, 1995.
