ENESTI, uyo wali na vyaka vya m’ma 70, wakati: “Mazuŵa ghano nkhukhalira waka kulwara.” * Kasi namwe ndivyo vikumuchitikirani? Para mwamba kuchekura panji kuwona kuti nkhongono zikumara chifukwa cha kulwaralwara, namwe mungazomerezga kuti mazgu gha pa Mupharazgi chaputara 12 ngaunenesko. Pa vesi 1 pakuti mazuŵa ghauchekuru ni “mazuŵa ghaheni” panji kuti gha suzgo. Nangauli mungachekura, namwe mungateŵetera Yehova mwakukondwa.

Mwaŵabali na ŵadumbu ŵithu ŵachekuru, manyani kuti ndimwe pera yayi mukusuzgika. Kumanyuma uku, ŵateŵeti ŵanyake ŵa Yehova nawo ŵakasuzgikanga nga ndimwe. Mwachiyelezgero, Yisake, Yakhobe, na Ahiya, ŵakaleka kuwona. (Gen. 27:1; 48:10; 1 Mathe. 14:4) Sara wakaŵa ‘muchekuru’ ndipo wakajiwonanga kuti wamara ntchito. (Gen. 18:11, 12) Davide wati wachekura wakapulikanga ‘kuthukira’ yayi. (1 Mathe. 1:1) Barazilayi wakaŵa musambazi chomene, kweni wati wachekura, vyakurya vikanowanga yayi kweniso sumu zikamunozgeranga yayi. (2 Sam. 19:32-35) Abrahamu muwoli wake wakafwa, Naomi nayo mfumu wake wakafwa.—Gen. 23:1, 2; Rute 1:3, 12.

Kasi ntchivichi chikawovwira ŵanthu aŵa kuti ŵalutilire kugomezgeka kwa Yehova na kuŵa ŵakukondwa? Nangauli Abrahamu wakachekura, wakalutilira kugomezga malayizgo gha Chiuta ndipo “wakazgoka wankhongono na chipulikano chake.” (Rom. 4:19, 20) Nase tikwenera kuŵa na chipulikano chakukhora. Kuti tiŵe na chipulikano chakukhora vikuthemba pa msinkhu withu, maluso, panji umo vinthu viliri kwa ise yayi. Mwachiyelezgero, Yakhobe nkhongono zikamumalira, wakaleka kuwona, kweniso wakalwara chomene ndipouli wakaleka yayi kugomezga malayizgo gha Chiuta. (Gen. 48:1-4, 10; Heb. 11:21) Mazuŵa ghano napo tili na ŵachekuru awo ŵakugomezga chomene Yehova. Inesi, mudumbu uyo wali na vyaka 93, wakulwara ndipo walije nkhongono. Kweni iyo wakuti: “Zuŵa lililose nkhuwona kuti Yehova wakunitumbika. Zuŵa lililose nkhughanaghanira vya Paradiso. Ichi chikunovwira kuti nileke kutaya mtima.” Mudumbu uyu wakutaya mtima yayi chifukwa wakughanaghanira vinthu viwemi.

Tikuŵa na chipulikano chakukhora para tikulomba, kusambira Baibolo, na kuluta ku maungano. Nangauli Daniyeli wakaŵa muchekuru, kweni nyengo zose wakalombanga katatu pa zuŵa na kulutilira kusambira Mazgu gha Chiuta. (Dan. 6:10; 9:2) Ana wakaŵa chokoro kweniso muchekuru, ndipouli ‘wakapambanga chara pa tempile.’ (Luka 2:36, 37) Nyengo yiliyose para mukuluta ku maungano na kuzgorapo, chipulikano chinu chikukhora, kweniso mukukhozga ŵabali na ŵadumbu. Nakuti Yehova wakukondwa para mukulomba kwa iyo, nanga mungaŵa kuti mukuchita vichoko waka.—Zinth. 15:8.

Mwaŵachekuru ŵanandi mukudokera kuŵerenga pamwekha kweniso kuluta ku maungano. Kasi mungachita wuli para mukutondeka kuchita vinthu ivi? Kutaya mtima yayi, chitani ivyo imwe mungafiska. Ŵanandi awo ŵakutondeka kuluta ku maungano ŵakukondwa para mubali panji mudumbu wiza kuzakaŵaphalirako ivyo ŵasambira ku mpingo. Inge uyo wali na vyaka 79, wakulaŵiska pachoko, kweni wakunozgekera maungano. Mubali munyake mu mpingo wakutora ivyo ŵamusambira na kumukuzgirako malemba pa kompyuta.

Nyengo zinyake muli na nyengo yinandi iyo ŵanyake yikuŵasoŵa. Nyengo iyi mungategherezga Baibolo, mabuku, nkhani, panji madirama agho ŵali kujambura. Mungayimbiraso foni Ŵakhristu ŵanyinu kuti ‘mukhwimiskane.’—Rom. 1:11, 12.

Christa, wali na vyaka vya m’ma 80, ndipo wakuti: “Chikuŵinya chomene para wamunthu waleka kuchita vinandi nga umo ukachitiranga pakwamba.” Kasi  mungachita wuli kuti mulutilire kukondwa? Peter, uyo wali na vyaka 75, wakuti: “Lekani kughanaghanira waka ivyo mukachitanga kale. Mukondwenge na ivyo mukuchita sono.”

Sangani nthowa izo zingamovwirani kuti mupharazgire ŵanthu. Heidi wali na vyaka vya m’ma 80, ndipo wakutondeka kupharazga nyumba na nyumba. Kweni wakulembera waka ŵanthu makalata. Ŵachekuru ŵanyake ŵakupharazga ku malo uko kukusangika ŵanthu ŵanandi uku ŵakhala pa malo ghamoza. Ŵakupharazga pa msika panji pa siteji. Awo ŵakukhala ku malo ghakusungirako ŵachekuru, ŵakupharazgira ŵadokotala ŵawo panji ŵanyawo awo ŵakukhala nawo ku malo agha.

Davide wati wachekura, wakawovwirapo chomene kuti kusopa kutuŵa kulutilire. Wakapeleka ndalama na kuwunjika vinthu vyakuti ŵazakazengere tempile. (1 Mid. 28:11–29:5) Namwe mukumanya umo ntchito ya Ufumu yikwendera pa charu chose na kuyezgayezga kovwirapo. Mungawovwira ŵapayiniya na ŵabali ŵanyake awo ŵakuchita vinandi mu mpingo. Mungaŵakhozga, kuŵapa uto mungakwaniska, panji kuŵachitira tunthu tunyake tupusu. Para mukulomba kwa Chiuta, mungazunura ŵachinyamata, mabanja ghanyake, ŵateŵeti ŵanyengozose, ŵalwari, kweniso awo ŵali na milimo yinandi mu mpingo.

Ntheura mwaŵachekuru ndimwe ŵakuzirwa ndiposo tikuwonga chomene ivyo mukuchita. Yehova wamutayaninge yayi. (Sal. 71:9) Yehova wakumutemwani kweniso wakumuwonani kuti ndimwe ŵakuzirwa chomene. Sonosono apa, tose tizamukhala mu paradiso umo muzamuŵavya vyakuŵinya. Tizamuŵa na nkhongono kweniso tizamulwara yayi. Tizamuteŵetera Yehova muyirayira.