Baibolo Likusintha Umoyo wa Ŵanthu

Nchivici cikapangiska wakuchaya njuga ndiposo munkhungu kuti wasinthe umoyo wake? Ŵazgani ivyo wali kuyowoya.

“Nkhakhumbanga kucita maseŵero ghakuphalizgana pa mahaci.”​—RICHARD STEWART

CILIMIKA ICO WAKABABIKIRA: 1965

UKO WAKABABIKIRA: JAMAICA

IVYO WAKACITANGA: KUCHAYA NJUGA NDIPOSO UCIGEŴENGA

UMO NKHAŴIRA KALE: Nkhakulira mu cigaŵa cikavu ndiposo ca ŵanthu ŵanandi ico cili mu msumba ukuru wa Kingston, ku Jamaica. Ku cigaŵa ici nchito zikaŵa zakusoŵa comene, ndipo ucigeŵenga ukaŵa palipose. Vigeŵenga vikapangiskanga ŵanthu kuti ŵakhalenge mwawofi. Pafupifupi zuŵa lililose nkhapulikanga kulira kwa futi.

Amama ŵakafwilirapo comene kulera ine, munung’una wane, na mudumbu wane. Ŵakawoneseskanga kuti tose tikuluta ku sukulu. Sukulu nkhayikhumbanga viŵi yayi kweni nkhakhumbanga kucita maseŵero ghakuphalizgana pa mahaci. Nkhagwenthanga ku sukulu na kuluta uko ŵakacitiranga maseŵero agha. Nane nkhakwerangako mahaci.

Pamanyuma nkhamba kuchaya comene njuga uko ŵakacitiranga maseŵero agha. Nkhamba kutemwa comene ŵanakazi, ndipo nkhagonanga nawo. Nkhakhweŵanga camba ndipo nkhaphwasuranga nyumba za ŵanthu na kwiba katundu mwakuti nisangenge ndalama zakuti nkhacitirenge nkharo zane ziheni. Nkhaŵa na futi zinandi, kweni sono nkhuwonga kuti nindakomepo munthu pa ucigeŵenga wose uwo nkhacitapo.

Pamanyuma, ŵapolisi ŵakanikora na kunijalira mu jele cifukwa ca ivyo nkhacitanga. Nati nafumiskika, nkhambiraso kucita ivyo nkhacitanga kale. Nakuti nkhaŵa muheni comene kuluska pakwamba. Nangauli pamaso nkhawonekanga muwemi kweni nkhaŵa wakusuzga comene, mukali, ndiposo wankhaza comene. Nkhapwelerangako waliyose yayi.

UMO BAIBOLO LIKASINTHIRA UMOYO WANE: Pa nyengo iyo nkhasuzganga, amama ŵakasambira Baibolo ndipo ŵakaŵa yumoza wa Ŵakaboni ŵa Yehova. Nkhawona kuti ŵasintha comene nkharo yawo ndipo nkhanweka na umo ŵakasinthira umoyo wawo. Nkhamba kupenja ico cikapangiska amama kuti ŵasinthe, ntheura nkhamba kudumbiskana na Ŵakaboni vya mu Baibolo.

Nkhawona kuti ivyo Ŵakaboni ŵa Yehova ŵakusambizga vikupambana comene na ivyo visopa vinyake vikusambizga, ndipo nkhasanga kuti ivyo ŵakusambizga Ŵakaboni ŵa Yehova vikufuma mu Baibolo. Likaŵa gulu lekha ilo nkhamanyangapo kuti likupharazga ku nyumba na nyumba nga umo ŵakacitiranga Ŵakhristu ŵakwambilira. (Mateyu 28:19; Milimo 20:20) Nati nawona kuti ŵakutemwana zanadi nkhakhorwa kuti nasanga cisopa caunenesko.—Yohane 13:35.

Pakuwona ivyo nkhasambira mu Baibolo, nkhawona kuti nkhukhumbikwira kusintha vinthu vinandi pa umoyo wane. Nkhasambira kuti Yehova Ciuta wakutinkha uzaghali ndipo para nkhukhumba kumukondweska, nkhwenera kuleka nkharo izo zikananganga thupi lane. (2 Ŵakorinte 7:1; Ŵahebere 13:4) Vikanikhwaska comene  apo nkhasambira kuti Yehova wakukhwaskika na ivyo ŵanthu ŵakucita ndiposo apo nkhamanya kuti ivyo nkhucita vingamukwiyiska panji kumukondweska. (Zintharika 27:11) Ntheura nkhaleka kukhweŵa camba, nkhataya futi, ndipo nkhayezgayezga kusintha nkharo yane. Vinthu ivyo vikanisuzga comene kusintha vikaŵa uzaghali na kuchaya njuga.

Pakwamba, nkhakhumbanga yayi kuti ŵabwezi ŵane ŵamanyenge kuti nkhusambira Baibolo na Ŵakaboni ŵa Yehova. Kweni vinthu vikasintha nkhati naŵazga Mateyu 10:33, apo pali kulembeka mazgu gha Yesu ghakuti: “Yose uyo wakunikana panthazi pa ŵanthu, nane nizamumukana panthazi pa Ŵadada awo ŵali kucanya.” Mazgu agha ghakanipangiska kuti niphalire ŵabwezi ŵane kuti nkhusambira Baibolo na Ŵakaboni ŵa Yehova. Ŵakazizwa comene. Ŵakagomezga yayi kuti munthu wa nga ine wangakhumba kuŵa Mkhristu. Kweni nkhaŵaphalira kuti nkhukhumbaso yayi kucita cilicose ico nkhacitanga kale.

UMO NASANGIRA CANDULO: Amama ŵakakondwa comene apo ŵakawona kuti namba kulondezga fundo za mu Baibolo. Pasono ŵakufipa nane mtima yayi kuti panyake nicitenge cinthu ciheni. Kanandi tikudumbiskana za ubwezi withu na Yehova. Nyengo zinyake, nkhukumbuka umo nkhaŵira kale ndipo nkhugomezga yayi kuti Ciuta wali kunovwira nadi kusintha vinthu vyose ivi. Sono nkhudokeraso yayi uzaghali uwo nkhacitanga kweniso umoyo wakutemwa usambazi.

Nilekenge kulondezga ivyo Baibolo likusambizga, mphanyi sono nili kufwa panji nili mu jele. Kweni sono nili na mbumba yakukondwa. Nkhukondwa comene kuteŵetera Yehova Ciuta pamoza na muwoli wane ndiposo mwana wane msungwana uyo wali na nkharo yiwemi. Nkhuwonga comene Yehova cifukwa ca kunizomerezga kuŵa pakati pa Ŵakhristu awo ŵakutemwana zanadi. Nkhuwongaso comene kuti pakaŵa munyake uyo wakafwilirapo kunisambizga unenesko wa mu Baibolo. Ndipo nkhuzirwiska comene mwaŵi uwo nili nawo kuti novwire ŵanji kusambira ivyo Baibolo likusambizga. Kweni pa vyose, nkhuwonga comene Yehova Ciuta cifukwa ca ciwuravi cake pakuniguzira kufupi na iyo.

[Mazgu Ghakukhozgera pa peji 11]

“Vikanikhwaska comene apo nkhasambira kuti Yehova wakukhwaskika na ivyo ŵanthu ŵakucita ndiposo apo nkhamanya kuti ivyo nkhucita vingamukwiyiska panji kumukondweska”

[Cithuzithuzi pa peji 11]

Na muwoli wane ndiposo mwana wane

[Cithuzithuzi pa peji 11]

Nkhawona kuti amama ŵasintha comene nkharo yawo