ASI mungajipulika wuli usange ŵangati muli na mulandu uku palije ico mwabuda? Wuli usange ico cacitika capangiska kuti ŵanthu ŵanandi ŵasuzgike, kusazgapo na ŵanthu awo vikuŵakhwaska yayi? Mukwenera kuti mungacitapo kanthu kuti mutozge zina linu. Kasi mukumanya kuti suzgo ili ndilo Yehova wakusangana nalo? Mazuŵa ghano, mwakupuvya ŵanandi ŵakumupa mulandu Ciuta cifukwa ca vinthu vyambura urunji na masuzgo agho ghali mu caru. Kasi Yehova ngwakunweka kuti watozge zina lake? Enya. Wonani ivyo wakayowoya mu buku la Ezekiel.​—Ŵazgani Ezekiel 39:7.

Yehova wakati: “Ndiŵalekelere cara kunangaso zina lane lituŵa.” Para ŵanthu ŵakucombora Yehova cifukwa ca vinthu vyambura urunji, ndikuti ŵakunanga zina lake. Mwawuli? Mu Baibolo kanandi “zina” likwimira lumbiri lwa munthu. Buku linyake likuti zina la Ciuta likwimira “ivyo ŵanthu ŵakumanya vyakukhwaskana na iyo. Likwimiraso lumbiri lwake.” Kasi Yehova wakuviwona wuli vinthu vyambura urunji? Wakuvitinkha. Wakucitiraso lusungu ŵanthu awo ŵakusuzgika cifukwa ca vinthu vyambura urunji. * (Exodus 22:22-24) Para ŵanthu ŵakuyowoya kuti Ciuta ndiyo wakucitiska vinthu viheni ivyo iyo wakuseluka navyo, ndikuti ŵakunanga lumbiri lwake. Ntheura, ‘ŵakutuka zina lake’ panji kuliyuyura.​—Salmo 74:10.

Wonani kuti kaŵiri kose Yehova wakayowoya kuti “zina lane lituŵa.” (Vesi 7) Mu Baibolo zina lakuti Yehova kanandi likwendera lumoza na ‘utuŵa’ panji kuti “kupatulika.” Mazgu ghakuti “lituŵa,” ghakung’anamura kuti ndapadera kweniso ndituŵa. Zina la Ciuta ndituŵa cifukwa iyo ni mutuŵa. Kasi mwawona kuti awo ŵakucombora Ciuta cifukwa ca vinthu vyambura urunji ndikuti ŵakupangiska kuti ‘zina lake lituŵa’ litukike comene?

Khumbo la Ciuta lakuti watuŵiske zina lake kwizira mu Ufumu wake ndiwo ni mutu ukuru mu Baibolo. Fundo iyi yili kulongosoreka makora mu buku la Ezekiel, ilo likuzunura mwakuwerezgawerezga kuti “ŵamitundu tiŵamanye kuti Ine ndine Yehova.” (Ezekiel 36:23; 37:28; 38:23; 39:7) Wonani kuti ŵamitundu ŵazamucita kusankha yayi kuti ŵamanye Yehova. Kweni ‘ŵazamumumanya,’ ŵakhumbe ŵaleke. Apa fundo njakuti Yehova wazamucitapo kanthu kuti ŵamitundu ŵazakamanye kuti iyo ni Muwusi Mukuru uyo zina lake likwimira kupatulika, utuŵa na kutowa.

Layizgo ilo likuyowoyeka mwakuwerezgawerezga lakuti “ŵamitundu tiŵamanye kuti Ine ndine Yehova” ni nkhani yiwemi ku ŵanthu awo ŵakunweka kuti vinthu vyambura urunji na masuzgo vimare. Sonosono apa Yehova wafiskenge layizgo ili na kutozga zina lake. Wazamuwuskapo viheni vyose pamoza na wose awo ŵakucitiska vinthu ivi. Kweni wazamusungilira awo ŵakumanya ico zina lake likwimira kweniso kulicindika. (Zintharika 18:10) Kasi mungatemwa yayi kuti musambire umo mungacitira kuti muŵe paubwezi na Yehova, Ciuta mutuŵa, uyo “wakutemwa urunji”?​—Salmo 37:9-11, 28.