Kasi Vimbundi Ni Vyakuzara Wuli?
Kasi Vimbundi Ni Vyakuzara Wuli?
Kampani yithu yikucitira boma milimo yinyake. Kanandi tikulindilira myezi yiŵiri panji yitatu pambere ŵandatilipire. Kweni mwasonosono apa munthu munyake wa mu boma wakaniyimbira foni. Wakati wangatovwira kuti tipokere luŵiro ndalama zithu usange tingamupako kacokocoko.”—JOHN. a
KASI muli kusuzgikapo cifukwa cakuti yunji wakacita vimbundi? Nangauli panji vingayana yayi na ivyo vyazunulika pacanya apa, kweni fundo njakuti mukwenera kuti mukakwenyelera.
Lipoti la mu 2011 la wupu wa kuwona vya vimbundi pa caru cose likati, ‘Pa vyaru 183 ivyo ukasanda, ukasanga kuti mu vyaru vinandi muli vimbundi vya zanimuwone.’ (Transparency International) Kweni lipoti la mu 2009 la wupu uwu, likalongora kuti vimbundi vili palipose. Likati: “Vikuwoneka kuti palije caru ico mulijirethu vimbundi.”
Nyengo zinyake ivyo vingacitika cifukwa ca vimbundi vingaŵa vyakofya comene. Mwaciyelezgero, magazini yinyake yikayowoya kuti ŵanthu ŵanandi ŵakafwa na cindindindi ku Haiti mu 2010. Ico cikapangiska kuti ŵanthu ŵafwe ŵanandi nthena ni “vimbundi na kuleka kuŵikako mahara.” Yikatiso: “Kanandi nyumba zikuzengeka zambura kukhora, cifukwa ca kuleka kutora pulani yakwenelera ku awo ŵakumanya vyakuzenga. Kweniso ŵanthu ŵa boma awo ŵakuwona vyakuzenga ŵakutondeka kugwira makora nchito yawo cifukwa ŵakupokera vimbundi.”
Kasi cilipo ico cingawovwira kuti vimbundi vimalirethu? Kuti tizgore fumbo ili, tikwenera kumanya vinthu ivyo vikupangiska kuti ŵanthu ŵacitenge vimbundi. Vinthu ivi tiviwonenge mu nkhani yakulondezgapo.
[Mazgu ghamusi]
a Zina lasinthika.
[Cithuzithuzi pa peji 3]
[Mazgu Ghakukhozgera pa peji 3]
“Vimbundi ni para munthu wakulyerapo pa mazaza ghake mu nthowa ziheni. Ŵanandi awo ŵakusuzgika cifukwa ca vimbundi ni awo ŵakugomezga wovwiri wa awo ŵali na mazaza pa iwo.”—TRANSPARENCY INTERNATIONAL
