“Mulara wa Mwaka Wakakhalapo”
Sendelerani kwa Ciuta
“Mulara wa Mwaka Wakakhalapo”
BAIBOLO likuti: “Palije munthu wali kuwonapo Ciuta umo kuli kuŵira.” (Yohane 1:18) Ciuta ngwaucindami comene mwakuti palije munthu uyo wangamuwona na kuŵa wamoyo. (Exodus 33:20) Ndipouli, mu nkhani zinyake tikuwona kuti Yehova wakawoneska ŵanthu ŵacoko waka mboniwoni ya umo kucanya kuliri. Yumoza mwa ŵanthu aŵa wakaŵa nchimi Daniyeli. Wakwenera kuti wakazukuma na ivyo wakawona ndipo wakapeleka ucindami kwa Ciuta, ndimo nase tikwenera kucitira. Wonani umo Daniyeli wakalongosolera ivyo wakawona mu mboniwoni. a—Ŵazgani Daniel 7:9, 10.
“Mulara wa Mwaka.” Mazgu agha agho ni Daniyeli pera uyo wali kuzunurapo, ghakwimira “munthu uyo ngwavilimika vinandi.” (Daniel 7:9, 13, 22) Kasi Yehova wali na vilimika vilinga? Pakuti Yehova ni “Themba lamuyirayira,” vilimika vyake tingavipenda yayi. Iyo ngwamuyirayira kufuma kale kweniso na kunthazi wuwo. (1 Timote 1:17; Yuda 25) Fundo yakuti Ciuta ngwamuyirayira, yikutisimikizgira kuti vinjeru vyake navyo ni vyambura cigoti. Kanandi Baibolo likuyaniska vyaka na vinjeru. (Job 12:12) Fundo yakuti Ciuta ngwamuyirayira njakusuzga kuyipulikiska cifukwa maghanoghano ghithu ngakupeleŵera. Kweni kasi tikwenera kulindizga kuti tipulikiskenge vyose vyakukhwaskana na Ciuta wavinjeru comene uyu?—Ŵaroma 11:33, 34.
Wonani kuti Mulara wa Mwaka “wakakhalapo.” Na cilato wuli? Mazgu ghakuzingilira vesi ili ghakutovwira kusanga zgoro, ndipo mu mavesi agha muli mazgu ghakuti “mphara” na “kweruzga.” (Daniel 7:10, 22, 26) Ntheura, mu mboniwoni, Yehova wakakhala pasi nga ni Mweruzgi. Kasi wakeruzganga njani? Mitundu ya pa caru capasi iyo ŵayiyelezgera na vikoko mu mboniwoni iyo Daniel wakawona pakwamba. b (Daniel 7:1-8) Kasi Yehova ni Mweruzgi wa mtundu wuli?
“Vyakuvwara vyake vikaŵa vituŵa nga ni ciwuvi, na sisi la mutu wake nga ni weya utuŵa.” Utuŵa ukwimira urunji na utozi. Kanandi weya wa mberere ukuŵa utuŵa mu kawonekero. Ntheura, sisi ilo lili nga weya wa mberere ndikuti ndituŵa. Kasi mungaghanaghanira ivyo Daniyeli wakawona? Kasi mu maghanoghano ghinu mukuwona Mweruzgi wa sisi lituŵa uyo wavwara munjilira utuŵa? Mazgu agha ghakutipa cithuzithuzi cakuti Yehova wakweruzga mwavinjeru kweniso mwaurunji. Ni Mweruzgi uyo tikwenera kumugomezga comene na kumucindika.
“Vikwi na vikwi vikamuteŵetera, na vikwi khumi kwandanya na vikwi khumi vikimilira panthazi pake.” Kasi ŵateŵeti ŵakucanya aŵa mbanjani? Baibolo likuti ŵangelo ndiwo ‘mbateŵeti ŵa Ciuta.’ (Salmo 104:4) Ŵangelo aŵa awo ŵalipo mamiliyoni ghanandi, ŵakutangwanika ‘kufiska mazgu’ gha Ciuta na ‘kucita khumbo lake.’ (Salmo 103:20, 21) Kasi fundo iyi yikulongora yayi kuti Ciuta wali na vinjeru vyambura cigoti? Padera pa Yehova ninjaniso munyake uyo wali na gulu likuru nthena ilo ndakukolerana kwa vyaka vinandi?
Mboniwoni ya Daniyeli yikutovwira kuti tigomezgenge Yehova uyo ni Mulara wamwaka. Vyeruzgo vya Yehova ni vyaurunji kweniso vinjeru vyake ni vyakugomezgeka. Mwalekeraci kusambira vinandi vya umo mungaŵira paubwezi na Ciuta wa vinjeru vyose?
Vipaturo Ivyo Mungaŵazga mu Okutobala:
[Mazgu ghamusi]
a Daniyeli wakawona nadi Ciuta yayi. Kweni Ciuta wakamulongora waka vithuzithuzi mu maghanoghano ghake. Ntheura pakulongosora ivyo wakawona, Daniyeli wakavilongosora mu mazgu ghakuyelezgera nga kuti wakulongosora munthu. Mazgu agha ghakutovwira waka kuti tipulikiske makora vyakukhwaskana na Ciuta ndipo tikwenera kughatora umo ghaliri yayi.
b Kuti mumanye vinandi vyakukhwaskana na vikoko vya mu mboniwoni ya Daniyeli, wonani cipaturo 9 mu buku lakuti Samalani Ulosi wa Danieli! lakupharazgika na Ŵakaboni ŵa Yehova.
[Mazgu Ghakukhozgera pa peji 18]
Ni Mweruzgi uyo ise tikwenera kumugomezga comene na kumucindika
