Nga umo ukumanyira, utesi nkhuyowoyera dala cinthu ico nchaunenesko yayi. Kasi wuli kutetapo?— * Nanga mbanthu ŵanji ŵalara awo ŵakutemwa Ciuta ŵali kutetapo. Panji ukumanyapo munthu munyake mu Baibolo uyo wakayowoyapo utesi. Munthu uyu ni Petrosi, yumoza wa ŵasambiri 12 ŵa Yesu. Tiye tiwone ico cikacitika kuti wayowoye utesi.

Yesu wakati wakakika, ŵakaluta nayo kwa musofi mukuru. Ukaŵa usiku pakati. Petrosi wakanjira mu mphara ya musofi mukuru kwambura ŵanthu kumumanya. Cifukwa ca ungweru wamoto, msungwana uyo wakaŵa muteŵeti wa musofi mukuru wakamumanya Petrosi. Msungwana uyu wakati: “Naweso ukaŵa pamoza na Yesu.” Mwawofi Petrosi wakakana.

Baibolo likuti pamasinda “msungwana munyake wakamuwona,” ndipo wakati: “Munthu uyu wakaŵa pamoza na Yesu.” Petrosi wakakanaso. Kanyengo kakati kajumphapo, ŵanji ŵakalutaso kwa Petrosi na kuyowoya kuti: “Nadi, iwe nawe uli yumoza wawo.”

Petrosi wakacita wofi. Ntheura panyengo iyi wakayowoya utesi wakati: “Nkhumumanya cara munthu uyu!” Tambala wakalira. Yesu wakamulaŵiska Petrosi, ndipo Petrosi wakakumbuka kuti kanyengo kacoko waka pambere ivi vindacitike, Yesu wakamuphalira kuti: “Pambere tambala wandalire, unikanenge katatu.” Petrosi wakaluta kuwaro na kulira comene. Citima cikamukora comene.

Kasi cinthu ca nga ni ici nawe cingakucitikira?— Nyengo zinyake ungaŵa ku sukulu ndipo ungapulika ŵanyako ŵakuyowoya za Ŵakaboni ŵa Yehova. Munyake wangati: “Ŵakwimbako yayi sumu ya fuko.” Munyakeso wangati: “Nakuti ŵakukana kulwera caru cawo.” Ndipo munyake wangapokera kuti: “Mbakhristu ŵanadi yayi cifukwa ŵakukana kukondwelera Khisimasi.” Pamasinda munyake wangang’anamukira kwa iwe na kukufumba  kuti: “Asi nawe ndiwe Kaboni wa Yehova?” Kasi ungazgoraci?—

Kuti uzgore makora, ukwenera kunozgekerathu pambere ivi vindakucitikire. Petrosi wakanozgekera yayi. Apo ŵakamufumbanga, wakamba kuteta. Ndipouli, ivyo wakacita vikamupweteka comene, kweni Ciuta wakamugowokera.

Munthu munyake uyo nayo wakayowoya utesi ni Hananiya yumoza wa ŵasambiri ŵa Yesu mu nyengo yakale. Kweni iyo na muwoli wake Safira Ciuta wakaŵagowokera yayi. Safira wakakolerana na mfumu wake kuyowoya utesi. Tiye tiwone cifukwa ico Ciuta wakalekera kuŵagowokera.

Mazuŵa 10, Yesu wati waluta kucanya, ŵanthu ŵakukwana 3,000 ŵakabapatizika. Ŵanthu ŵanandi ŵakufuma mu vyaru vyakutali ŵakiza ku ciphikiro ca Pentekoste. Ndipo ŵati ŵazgoka ŵasambiri ŵa Yesu ŵakakhalira kanyengo kataliko kuti ŵasambire vinandi vyakukhwaskana na cipulikano cawo. Ntheura ŵapositole ŵanji ŵa Yesu ŵakatoranga ndalama zawo kuti ŵaŵapwelelere.

Hananiya na muwoli wake ŵakaguliska munda wawo mwakuti ŵasange ndalama zakovwilira Ŵakhristu ŵaphya aŵa. Apo Hananiya wakapelekanga ndalama izi ku ŵapositole, wakayowoya kuti wapeleka zose izo ŵasanga ŵati ŵaguliska munda wawo. Kweni uwu ukaŵa utesi. Ŵakatorapo ndalama zinyake na kubisa. Ciuta wakavumbulira Petrosi za ici, ndipo Petrosi wakaphalira Hananiya kuti: “Wapusika ŵanthu cara, kweni Ciuta.” Ntheura, Hananiya wakawa pasi na kufwira papo. Maora ghatatu ghakati ghajumphapo, muwoli wake nayo wakanjira. Kwambura kumanya ico cacitikira mfumu wake, nayo wakayowoya utesi ndipo wakawa pasi na kufwira papo.

Apa tikutorapo sambiro likuru comene: Nyengo zose nchakuzirwa kuyowoya unenesko. Enya, tose tikwenera kutorapo sambiro. Ndipouli, tose tikubudiska comenecomene para tili ŵana. Kasi ndiwe wakukondwa yayi kuti Yehova wakukutemwa ndipo wazamkugowokera nga umo wakacitira na Petrosi?— Kweni kumbuka kuti tikwenera kuyowoya unenesko. Ndipo usange tili kutetapo utesi wakofya, ipo tikwenera kulomba Yehova kuti watigowokere. Ici ndico Petrosi wakwenera kuti wakacita, ndipo Ciuta wakamugowokera. Nase usange tikufwilirapo kuleka kupusika waliyose, mbwenu Ciuta watigowokerenge.