Mwanakazi wa vyaka 35 wa ku Dhaka, mu caru ca Bangladesh, zina lake Simita, * wakamanyikwanga kuti ngwacitemwa ndiposo walusungu. Ŵanthu ŵakamumanyanga kuti ni mwanakazi wacimwemwe ndiposo wakulimbikira nchito, uyo nyengo zose wakawovwiranga ŵanyake kuti nawo ŵamanye vinthu vyakukhwaskana na Ciuta ivyo wakasambiranga. Simita wakalwara mwamabuci. Sabata yikamara na kumara wuwo yayi, mbwenu wakuti nagona pano. Ŵabali ŵake na ŵabwezi ŵake ŵakazizikika comene.

Jemusi na muwoli wake, awo ŵakaŵa na vyaka vya m’ma 30, ndipo ŵakakhalanga ku New York, nawo ŵakaŵa na nkharo yakuyana waka na Simita. Nyengo yinyake ŵakaluta ku cigaŵa cinyake ca ku America kukacezga na ŵabwezi ŵawo. Kweni ŵakawerako yayi. Apo ŵakaŵa kwakucezga, ŵakafwa pa ngozi ya galimoto, ndipo nyifwa iyi yikapweteka comene ŵabali ŵawo na ŵanyawo ŵa ku nchito.

Tose tikujiwonera tekha kuti vinthu viheni na masuzgo vyazara comene. Nkhondo zikukoma ŵasilikari na ŵanthu bweka. Ŵanthu ŵambura mulandu ŵakusuzgika cifukwa ca nkhaza na ucigeŵenga. Ngozi zakofya na matenda ghakofya vikuwira waliyose kwambura kuwona msinkhu wa munthu panji cisko cake. Masoka ghacilengiwa nagho ghakumara ŵanthu. Kusankhana mitundu na kucita vinthu mwambura urunji kwazara comene. Panji namwe vinthu ivi vili kumucitikiranipo.

Mwakawiro taŵanthu tikuŵa na mafumbo nga ni agha:

• Cifukwa wuli vinthu viheni vikucitikira ŵanthu ŵawemi?

• Kasi Ciuta ndiyo wakupangiska vinthu viheni?

• Kasi masoka ghakucitika waka yekha, panji ghakucitika na ŵanthu?

• Kasi tikusuzgika cifukwa cakuti mu umoyo withu wakale tikacitanga viheni nga umo ŵanyake ŵakugomezgera?

• Usange kuli Ciuta wankhongonozose, cifukwa wuli ŵanthu ŵawemi wakuŵavikilira yayi ku vinthu viheni?

• Kasi umoyo wambura masuzgo uzamuŵako?

Kuti tizgore mafumbo agha, tikwenera kumanya dankha mazgoro gha mafumbo ghaŵiri agha: Cifukwa wuli vinthu viheni vikucitikira ŵanthu wose? Kasi Ciuta wacitengepo vici?