FUNDO YA MU BAIBOLO: ‘Lutilirani kugowokerana na mtima wose usange munthu wali na chifukwa chakudandawulira munyake. Nga ni umo Yehova wakagowokelera imwe na mtima wose, ndimo namweso muchitirenge.’—Ŵakolose 3:13.

Kasi fundo njakuti wuli? Baibolo likuti kwananga kuli nga ni ngongoli, ndipo kugowokera kuli nga nkhusisita ngongoli. (Luka 11:4) Buku linyake likuti lizgu Lachigiriki ilo lili kung’anamulika kuti “kugowokera” likung’anamura “kumulekera waka munthu ngongoli, kwambura kumulozga.” Ntheura para tagowokera munthu uyo watibudira ndikuti tasankha kumuleka waka. Para tagowokera munthu chikung’anamura kuti tikuzomerezga viheni ivyo wachita yayi. Kweni tikuleka waka kumusungira vyakusingo, nangauli tingaŵa na chifukwa chanadi ‘chakudandawulira.’

Kasi fundo iyi njakovwira lero? Ndise ŵanthu, ndipo tose tikunanga. (Ŵaroma 3:23) Ntheura tikwenera kugowokera ŵanyithu, chifukwa nyengo yinyake nase tizamukhumba kuti ŵanyithu ŵatigowokere. Nakuti para tagowoka, ndise tikusanga uwemi. Uwemi wuli?

Para tikusunga ukali panji vyakusingo, tikujipweteka tekha. Ivi vingatitondeska kuŵa ŵakukondwa, tingaŵa ŵakukakika, ndipo tingasuzgika chomene. Kweniso vingatilwariska chomene. Dr. Yoichi Chida na Professor Andrew Steptoe, ŵakati: ‘Ukaboni ukulongora kuti para munthu wakusunga ukali panji vyakusingo wakukaŵa yayi kulwara nthenda ya mtima.’—Lipoti ili likaŵa mu Journal of the American College of Cardiology.

Kweni wonani uwemi wa kugowokera. Para tikugowokera ŵanyithu na mtima wose, pakuŵa umoza na mtende, ntheura tikulutilira kuŵa na ŵabwezi. Chakuzirwa chomene ntchakuti para tikugowoka tikuyezga Chiuta uyo wakugowokera ŵakwananga awo ŵasintha. Chiuta wakukhumba kuti nase tigowokenge.—Mariko 11:25; Ŵaefeso 4:32; 5:1.