Ŵanthu ŵanyake ŵakuti pakutora mazuŵa 21 kuti munthu wazgoŵere kuchita chinthu chiphya. Kweni ukaboni ukulongora kuti ŵanthu ŵanyake ŵakutora nyengo yichoko waka, ŵanyake nyengo yitali, kuti ŵasinthirethu. Kasi fundo iyi yikwenera kumugongoweskani?

Wonani fundo iyi: Tiyelezgere kuti mukukhumba kuti muchitenge maseŵero ghakukhozga thupi katatu mu sabata.

• Sabata yakwamba, mwakwaniska.

• Sabata yachiŵiri, mwatondekapo zuŵa limoza.

• Sabata yachitatu, mwakwaniskaso mazuŵa ghose.

• Sabata yachinayi, mwatondekerathu.

• Sabata yachinkhondi, mwakwaniskaso mazuŵa ghose ghatatu. Kufuma apo, mukuchita sabata yiliyose.

Mungawona kuti mwatora masabata 5 kuti muzgoŵere kuchita maseŵero. Iyi yingawoneka nga ni nyengo yitali chomene, kweni para mwafiska waka ivyo mwakhumbanga, mukukondwa.

Baibolo likutiphalira kuti maso ghithu ghaŵenge panthazi. Nanga mungawa kanandi wuli, chakuzirwa ntchakuti muwuke na kwambiraso kuchita makora.

• Para mwatondeka kamoza, chikung’anamura kuti mwatondekerathu yayi. Manyani kuti vingachitika yayi kuti muleke kutondekapo, vyose vingenda ndendende yayi.

• Ghanaghanirani ivyo mukachita makora. Tiyelezgere kuti mukukhumba kusambira kuyowoya makora na ŵana ŵinu. Jifumbani kuti: ‘Mphawuli apo nkhakhumbanga kukalipira ŵana ŵane, kweni nkhaŵakalipira yayi? Kasi m’malo mwake nkhachita vichi? Kasi ningachitaso wuli umo nkhachitira para?’ Mafumbo agha ghangamovwirani kuti mughanaghanirenge chomene ivyo mukachita makora kuluska ivyo mukutondeka.

Kasi mungatemwa kuti mumanye umo fundo za mu Baibolo zingamovwilirani pa vinthu vinyake? Baibolo lingamovwirani kuti mukhalenge makora mu banja linu, muŵe ŵakukondwa zanadi, kweniso kuti muleke kwenjerwa chomene. Fumbani yumoza wa Ŵakaboni ŵa Yehova, panji lutani pa webusayiti yithu ya jw.org.