Nyengo zinyake munthu para wakukhumba kusintha vinthu vinyake, wangakhumba kusintha vinthu vyose pa nyengo yimoza. Wangaghanaghana kuti, ‘Sabata yino nilekenge kukhweŵa hona, kutuka, kuchedwa kugona, nambenge kuchita maseŵero ghakukhozga thupi, niryenge vyakurya vyakulongosoka, panji nambenge kuyimbira foni ŵagogo ŵane.’ Kweni para mukukhumba kuti musinthe vyose ivi nyengo yimoza, manyani kuti palije icho musinthenge.

Munthu wakujiyuyura wakumanya ivyo wangafiska kweniso ivyo wangatondeka. Wakumanya kuti pakukhumbikwa nyengo, nkhongono, na vinthu vinyake kuti wasinthe nadi. Ntheura wakusintha chimozachimoza m’malo mwa kuyezga kusintha vinthu vyose nyengo yimoza.

Yezgani kusintha chinthu chimoza panji viŵiri pa nyengo yimoza. Fundo izi zingamovwirani:

1. Torani mapepara ghaŵiri, limoza mulembepo vizgoŵi viwemi ivyo mukukhumba kuŵa navyo, linyake mulembepo vizgoŵi viheni ivyo mukukhumba kuleka. Pa pepara lililose lembanipo chilichose icho mungaghanaghana.

2. Pakulemba, mudankhe ivyo vikukhumbikwira chomene.

3. Pa pepara lililose, sankhanipo chizgoŵi chimoza panji viŵiri, ndipo yezgayezgani kuti musinthe nadi. Kufuma apo, musankheposo chimoza panji viŵiri pa pepara lililose.

Para mwaleka chizgoŵi chiheni, nyengo yeneyiyo mwambe kuŵa na chizgoŵi chiwemi. Tiyelezgere kuti pa vizgoŵi viheni muli kulembapo kuti mukuwonelera chomene TV, ndipo pa vizgoŵi viwemi muli kulembapo kuti mukukhumba kuchezga na ŵabali panji ŵabwezi ŵinu. Para mwawera waka ku ntchito, m’malo mwa kufikira pa TV, muyimbirani dankha foni mubwezi panji mubali winu na kuchezgapo nayo.