Kwambira pa September 1 kufika pa 3, 2023, ŵabali na ŵadumbu awo ŵakuyowoya Chiromany (Romania) ŵakawungana kuti ŵategherezge ungano wachigaŵa wa 2023 wa mutu wakuti ‘Lutilirani Kuzikira’! Nangauli maungano ghanyake gha chigaŵa ghakhala ghakuchitika mu viyowoyero vinyake vya ku Romany, kweni uwu ukaŵa ungano wakwamba wachigaŵa kuchitika maso na maso mu Chiromany (Romania). Paungano uwu pakaŵa ŵanthu 1,353 ndipo ŵakafuma mu vyaru nga Austria, Belgium, France, Germany, Great Britain, Italy, Moldova, na Romania. Ungano uwu ukachitikira mu Holo Yakuchitiramo Ungano ku Turda, Romania, ndipo ŵanthu 26 ŵakabatizika.

Mubali Gage Fleegle, uyo ngwa mu Wupu Wakulongozga ndiyo wakayowoyanga nkhani yaumaliro pa zuŵa lililose la ungano. Mubali Fleegle wakadidimizgapo kukolerana kwapadera uko kulipo pakati pa ŵanthu ŵa Chiuta mazuŵa ghano, ndipo wakachiska ŵategherezgi kuti ŵalutilire kuteŵetera Yehova mwakuzikira kweniso mwakukolerana. Padera pa awo ŵakategherezganga ungano wa chigaŵa uwu, pakaŵaso ŵanthu pafupifupi 900 awo nawo ŵakachitanga ungano wa chigaŵa ku malo ghanyake ghaŵiri ndipo ŵakategherezganga nkhani za umaliro izi mwakuchita kujoyina kwizira pa vidiyokonferensi.

Mubali munyake uyo wakuyowoya Chiromany (Romania) wakayowoya kuti: “Tizamuluwapo yayi ungano uwu. Yehova watitumbika chomene pakuŵa na ungano wa chigaŵa mu chiyowoyero chithu!” Iraklis Exarcheas, uyo ni mulaŵiliri wadera mu mipingo ya chiyowoyero cha Chiromany (Romania) wakayowoya kuti: “Nili na chigomezgo chose kuti ŵanthu ŵanandi awo ŵakuyowoya Chiromany (Romania) awo ŵakaŵapo pa ungano uwu ŵakakhozgeka chomene. Ungano uwu walongolerathu kuti Chiuta wakuŵatemwa ŵanthu wose. Ichi ntchawanangwa chapadera chomene chakufuma kwa Yehova!”

Tikukondwa nawo lumoza ŵabali na ŵadumbu withu awo ŵakuyowoya Chiromany (Romania) awo ŵakawungana kuti ŵalumbe Yehova na kusambizgika na iyo pa ungano wa chigaŵa uwu.—Salimo 26:12.